مدینە صعب-ـەكەی بەعس و تەراویحەكەی ئەوان!

نەشوان ئەحمەد سەعید 25/04/2021

 
كە  ئینگلیز هەوڵیدا ئەم شارە بكاتە  ژێر  ركێفی خۆیەوە، شێخ  مەحمودی نەمر، لێی یاخی بو. سلێمانی هەر  بەبزێوی هێشتەوە.
كاتێك بەعس دەستی بەسەر تەواویی ناوچە ئاوەدانەكانی كوردستان گرت، هەر  سلێمانی بو وەك شارێكی سرك و ڕام نەكراو مایەوە و سەدام و رژێمەكەی ناویان لێنابوو (مدینە صعبە).
ئەم شارە لە نەسلی یاخیبونە و ڕیشەی لەناو فەرهەنگی سەربەرزیدا درەوشاوەیە، ئەم  شارە، كە خاوەنی جوانی و داهێنانە، جێی كەڵە شاعیری وەك بێكەسە كە بەڕوی ئینگلیزدا كوتەكی بیست و حەوت ساڵە دەدات لە شكۆی بەریتانیای مەزن.. مەنزڵی شیهابە كە بە كەم ژیان و كەڵ ژیان پەتی سێدارە شەرمەزار دەكات، جێی ئارامە كە وەك ئاسكە كێوی سرك بەعسی هێنابوە لەرزین، جێی مەلا عەلی یە كە لەبری ترس، لەناو بەندیخانەوە بەتەوسەوە بە جەلادەكانی دەڵێت، سەربەرزیمە كە پێڵاوم دەبینم، بەسەر سەری دوژمنەوە لە بەرزین.
 
شارێك جێی ئەو هەموو جیاوازی و یاخیبون و نەسرەوتی یە بێت، نە هیچ رەوت و نە هیچ ئایدۆلۆژیایەك ناتوانێ یەك ڕەنگی و یەك دەنگی بەسەردا بسەپێنێ.
شارێك لە دێرزەمانەوە، چۆكی بۆ هیچ دوژمنێكی دانەدابێت، ئیتر چۆن بەو سركییەوە دەستەمۆی رق و كینە و ئەندێشەی تاریكی سەدەكانی ناوەراست دەبێت!؟
 
ئەوانەی بۆ ریاكاری، بۆ بەگژاچونەوەی چەرخی پێشكەوتن و كرانەوە، بۆ نمایشی ئەقڵی داخراو چونە سالم، بۆ جارێك نەمان بینین لەسەر وەستانی ئاوەدانی و نەبونی خزمەتگوزاری  بێنە  ئەم سالمە و رێی هاتوچۆی هەموو كاربەدەستانی ئەم شارە بگرن و بەر بەم غەدرە بگرن كە دەرهەقی دەكرێت.
 
بۆچی ناچنە سەرچنا و شوێنەكانی تر، كە بەرپرسان كردویانە بە تیاترۆخانە و باڕ و جۆرەها شتی تر (ئەگەرچی ئەوەش بەشێكە لە بنەمای شار).؟
بۆ جارێك تەنها یەك  جار لەسەر كوژرانی  ژنێك نەمان بینین بێن لەبەر دەرگای هەمو  كاربەدەستانی شار نوێژ بكەن و بەپێی حەدیس و ئایەتی ئاسمانی كوژرانی ژن و كچانی ئەم نیشتمانە حەرام بكەن؟ 
 
كوا ئەو  ئازادییەی بەقسە بەرجەستەیە و بە كردەوە نامۆیە بەم شارە، كوان ئەوانەی خێر و بێری ئەم شارە گەورەی كردن و ئێستا خەریكە روناكی لە شاریش دەبرن؟
 
ئەم شارە هی هەموانە، نە موڵكی ئەقڵیەتێك و نە تاپۆی ئایدۆلۆژیا و ئەندێشەیەكی دیاریكراوە، چۆن جێی ئێوەیە بێن نوێژی تیا بكەن، جێی ئەوانەشە ئارامی روحیان بە سەما بەدی دێنن.
 
چۆن مەلایەك  ئازاد بێت لە مینبەرەكانییەوە  بە  ئازدی چی  باش و خراپە  بیڵێت، بە هەموو تینی هاوار بۆ چێژی سێكسی حۆری و بەهەشت و شەراب كات، ئاوەهاش بۆچی دوو گەنجی  جوان و ئازای ئەم  جیهانە  ئازاد نەبن سەرەتایی  مافی  خۆیان لەسەر  شەقامێك پیادە بكەن.
 
دەزانین چەكی ئایین چەكێكە ترس و بیمی لەگەڵە، نەك ترس لە خودی ئایینەكە، بەڵكو لە پەیڕەوكەرانی كە پێیان وایە هەڵشاخان و پەلاماردان ئازایەتی و بوێری یە، ترس لەو گۆرانكاریەی لە گوتاری ئایینی هاتۆتە ئارا و دەیەوێ ببێتە كەلتور، بەڵام ئەم شەپۆلی گۆڕانكاری یە بەردەوامە و نە بە هاوار و نە بە هەرەشە و نە بە رێگری لە نمونەكانی وەك ئەو سەمایە رێگەی لێدەگیرێت
 
ئەم  هۆنراوەیەی  نالی،  بەسە  بۆ  ئەوەی  تێ بگەین كە  شار  ئێستاش  وەك  ئەوسا  وایەو، كوا  عەهدو  پەیمانی والی؛
سالم ئەی پیری ڕیش چەرموو
هەستە وا شار خرۆشاوە
ڕێی ژوانی عیشق ئەمڕۆ
پڕ گوڵی سووری ژاكاوە 
ئەگەر سودفەی بێكەست كرد
پێی بڵێ هەر بەخوێن ئەدرێ
ئاوی دارە پیرەكەی تۆ
وەلێ هەر خاری خەم ئەگرێ
 
سالم ئەی عاشقی ماندوو
جوابێ بنێرە بۆ كوردی
بڵێ ئەمڕۆ گوڵێكی تر
باڕەشی بێدادی بردی
ئەگەر ڕێبوارێكی شامیش
گەڕایەوە بۆ لای نالی
پێی بڵی بێ نازە شارو
بێ وەعدو پەیمانە والی