دەمەتەقەیەكی ئەقڵانی لەگەڵ عەلی حەمەساڵح
ئازاد عەلی
كاك عەلی حەمەساڵح، چەشنی ئەسكوێی ناو هەموو مەنجەڵێك، نە تەلەفزیۆنو نە سۆسیال-میدیا، بۆ بابەتی هەمەچیزە، بەرنادا. ئەسكوێكەی وەردەداتە ناو هەموو مەنجەڵێك، هەر لەمەنجەڵی پیرەژنانی سەر ئاگردانی لادێكانەوە، بۆ مەنجەڵی تیڤاڵی كابانەكانی شار.
ئیتر ئەم (كاكە عەلی)یە پسپۆڕی ئابورییە. شۆڕەسواری ئامارو ڕاپرسییە. ئەفسەری گومرگەكانە. قارەمانی هەڵبژاردنە. نوساوە بە مایكرۆفۆنەكانەوە. سوپەرمانی پەرلەمانە. فەیلەسوفی سیاسییە. وتەبێژی هەقبێژییە. ماوەیەكیشە، لێمان بۆتە واعیزی دینیو دینخوازی بێمونافس!!
لەسیاسەتیشدا، هەر دەڵێی ئەسپی عەرەبانە كۆنەكانە. قایش بەملاوبەولای هەردوو چاویا شۆڕكراوە. جگە لە ئاڕستەی ئاغاكانی، هیچ راستییەكو هیچ سەركردەیەكو هیچ فەیلەسوفێك ناناسێ.
باسی ئابوری زۆر دەجوێتەوە. بەڵام ڕێكخەری بزوتنەوەی گۆڕان بایی (300 ملیۆن دۆلار) زیاتر بۆ مناڵەكانی جێدێڵێ.. ئەم عەلییە، فزە ناكات.. كەچی لە كونی دەرزیەوە دزی كەسانی تر دەبینێ.
ماوەیەكە، زۆر باسی كۆیلەو ئایین دەكات. دوا وتارۆكەی لەسەر (كۆیلە كێیەو كێ كۆیلایەتی بەرهەم دێنێ) وتارۆكەیەكە كۆمەڵێك رستەی بێبناغەی زانستی لەسەر ئایینو كۆمەڵ نوسیووە. كوتومت دەنوسێ:
ئەوەی ئەم كۆمەڵگەیەی لەداڕوخان پاراستووە ئایینو كۆمەڵێك بەهای كۆمەڵایەتییە.
باقی كورتەنوسینۆكەكەی لەدەوری ئەو راستییە چنیووە.
جارێ، لەسەر تاپۆكردنی زەویو گەندەڵیو دزی نوسیویەتی.. ئەم قسەیە ڕاستە. بەڵام عەلی جارێ تفلی دەبیرستان بوو، لەدوای ڕاپەڕین باسی دزیو گەندەڵی كراوە. نیوەی ئەرزەكانی سلێمانی بە بڕیاری بەرپرسە گەورەو بچوكەكانی عەلی، كراونەتە موڵكی یەكێتیو بەرپرسەكان. هی هەولێرو دهۆكیش، بە بڕیاری پارتی.
ئایا، ئایین بەتەنها كۆمەڵگەی لە داڕوخان پاراستووە؟
جەوهەری دەمەتەقێی ئێمە لەگەڵ عەلیدا ڕێك لەسەر ئەم رستەیە.. دادەڕێژین.
نكولی لێناكرێ، ئایین بەئەندازەی خۆی، جارێ لە كوردەواریدا، لەسەر بەشێكی خەڵكە دڵسافەكە، كاریگەری ئەرێنی هەبوەو هەیە. بەڵام..
بەشێكی ئایینو لەسەر بەشێكی خەڵكیش، نەك بە ڕەهایی تەواوی ئایینو كاریگەری ئایینیش لەسەر تەواوی خەڵك.
ئایین.. هەم لایەنی ئەرێنیو هەم لایەنی نەرێنی هەیە.
ئەوەتەی دەسەڵاتی ئیسلام (دوای پێغەمبەر) پەیدا بووە، هەتا روخاندنی عوسمانیەكان، هەزاران تاوانو كوشتوبڕی قێزەونیان ئەنجامداوە. حكومەتە ئیسلامیەكانی ئێستاش، بە شیعە و سوننەوە، دوا نمونەی تاوانو تاڵانین. ئەوە ئەفغانستان، ئەوە سعودیە.. ئەوەش ئێرانو ئەمەش شیعەی عێراق.
عەلی شوڵی ئایین كە هەڵدەكێشێ، بیری دەچێ لە خالیدی كوڕی وەلیدەوە، بۆ تاڵیبانەكان كە تازە تازە ژن قەدەغە دەكەن بچێتە زانكۆو فەرمانگە.. هەر بەناوی ئیسلامەوە ئەم تاوانانە دەكەن.. دەیان هەزاری كەنیزەكیان دەفڕاندو بنیان دەپژاند.. بەناوی سورەتی ئەنفالەوە.
عەلی بیری دەچێتەوە كە: جوندولئیسلامو ئەنسارولئیسلامیش.. چەند تاوانیان ئەنجام دەدا. داعشو ماعش بیردەباتەوە.
عەلی برالە!
تكایە.. بەشێنەیی قسە بكەو بەسە ئیتر چاكەو خراپە تێكەڵو پێكەڵ بكەیت.
هەتا كەسانی وەكو عەلی بەرگری گشتی، بەبێ وردبونەوە لە ئایینی ئیسلامو نەریت، لە ئیسلام بكەن، دڵنیابین دۆخی كوردەواری هەمیشە لە شەڕو شۆڕو فیتنەو رقەبەرایەتی دەمێنێتەوە.
بینیمان كیژۆڵەیەك لەسەر جادە، بەئاسایی دەڕوات.. دەیان كەسی وەكو عەلی چۆن پەلاماریان دا.. گەلەگورگ ئاوها پەلاماری ئاسكە بەستەزمانەكان نادەن.
باسی دابونەریت دەكات.. كام دابونەریت! باشو خراپ، یان تەنها دابونەریتی باش؟
لە دابونەریتیشدا.. سەدان شتی باشو سەدان خراپیش هەن. بەڵكو لە پەندی پیشینانیشدا، هەر بۆ نمونە لە دابونەریتی باوكسالاری.. كە پیاو.. بەئارەزوو حوكمی كۆمەڵایەتی دەكاتو ژنبازی دەسەپێنێ.. هەموو زوڵمە بەرامبەر ژن.
كاریگەری هەرە خراپی دابونەریت، ئەو دابونەریتانەیە لەژێر كاریگەری شەریعەتی بژارنەكراوی ئیسلامی سەبارەت بە ژنو ئەحكامی شەریعەت لەناو كۆمەڵ لەدوای خەلافەتی راشدینەوە تا ئەم سەردەمەی عەولەمەش سەپێنراوە. بەزۆری زۆرداریش، بە هەڕەشەی شمشێری ئەقڵی ژەنگاویش دەسەپێنرێ.
ئێمەش دەڵێین:
هەتا ئەركە دینیەكان تەرخان نەكرێ بۆ خواپەرستەكانو ئەركە دونیاییەكانیش تەرخان نەكرێ بۆ بیرمەندانی دونیاییو سیاسەتی دانراو.. گومانمان نییە، كۆمەڵ هەروا بە دواكەوتوییو لەئاژاوەی كۆمەڵایەتیدا دەمێنێتەوە. لەبری ئەقڵ.. شمشێری سەلەفیەت دادوەر دەبێ. لەبری فەیلەسوفو زاناو داناكانیش.. مەلا مەزهەرو مەلا كرێكارو پەیڕەوەكانیان وەكو عەلی حەمەساڵح.. ئەسپیان تاودەدەن.