هەرێم لەنێوان عەلمانیەت و سەلەفیەتدا

کوردستان پێش 3 هەفتە

ئازاد  جۆڵا 

سەلەفیەکان  عەلمانیەکان بەکافرو بێ دین و دژ بە ئیسلام ناو دەبەن ، لەکاتێکدا ئەم بۆچوونە هیچ ڕاستییەکی تێدانیەو تەنها هۆکارێکە بۆ ووروژاندنی هەست و سۆزی خەڵک و بەلاڕێدابردنی ڕاستیەکان ، ئەگەر سەلەفیەکان و هەڵگرانی بیروباوەڕە  ئایینیەکان بەتووندڕەو و میانڕەویانەوە  دەسەڵات و حکومەتی هەرێم  وەک ( عەلمانی ) دەناسێنن و خراپی بارودۆخی خەڵک و ناداپەروەری و دزی وگەندەڵی و ناشەفافی هتدد ...  دەخەنە ئەستۆی سیستەمی سیکۆلاریزم  ئەوا بێ ئاگان لەوەی  لەدوورو لەنزیک  دەسەڵاتی سیاسی کوردستان و حکومەتی هەرێمی کوردستان  نە عەلمانی بووە  نەباوەڕیشیان  بە عەلمانیەت هەبوە ،  چونکە لەسادەترین پێناسەدا ئەرکی سەرەکی عەلمانیەت جیاکردنەوەی ئایینە لەدەسەڵات و دەوڵەتداری  نەک  دژایەتی هیچ ئاین و ئاینزایەک ، ئەمەش  کاری ڕاستەقینەی  ئاین ڕێز لێگیراوتر  دەکات ،  هەروەک  دوای نزیکەی 1650 ساڵ لەدەسەڵاتی خۆسەپێن و خوێناوی ئاینی  کەنیسە لەتەواوی ئەورووپا  دواجار بەهاتنی سیستەمی سیکۆلار دین لەدەوڵەت جیاکرایەوەو  ئاین جێهێشترا بۆ پیاوانی ئاینی و کەنیسەکان    دەوڵەتەیش تەسلیمی حوکمی گەل و مەدنیەت و کاری دەوڵەتداری کرا ،  ئیتر  لەو کاتەوە  ئاوەدانی و ئاڕامی و خۆسگوزەرانی و پشکەوتن و پاراستنی مافی مروڤ و ژینگەو پێکەوژیان و تەنانەت ئاژەڵەکانیش هاتە ئاراوە ،
 بەخوێندنەوەمان بۆ ڕابردوو ئێستاش  ئەم حزب و دەسەڵات و حکومەتەی هەرێمی کوردستان هیچ کاتێک پێناسەی (عەلمانیەت) نایانگرێتەوە  وە بچوکترین نمونەی حوکمڕانی عەلمانیەتیشیان  پێشکەش نەکردوە   چونکە لەبنەڕەتدا حزبەکان  لەناوەڕۆک و بەکرداریش خاڵین لە بیر و هزری عەلمانیەت و هێندەی ڕاستەوخۆ و ناڕاستەوخۆ  لەخزمەتی بیری ئاینی و دەرەبەگایەتی و بنەماڵەیی و پاراستنی بەرژەوەندی حزبی بوون  هێندە کاریان بۆ دامەزراندنی سیستەمێکی دەوڵەتداری و سیکۆلاریزم نەکردووە ، بەجۆرێکی تر هێندەی کاریگەری ئاینەکان  بەگشتی بەسەر حکومەت و حزبەکانەوە ڕەنگی داوەتەوە  نیو هێندە هەڵگری بیروباوەڕێکی ڕاست و دروستی و عەلمانیەت نەبوون نین ، بۆ ئەمەش  ئەگەر ئاوڕێکی کورت بۆ ڕابردوو بدەینەوە دەبینین  بەدرێژایی مێژووی ئەزمونی 31 ساڵەی حوکمڕانی ئەم هەرێمە  دین و دەوڵەتداری لەیەکتری جیانەکراوەتەوە   ئەم حاڵەتەش لەدوو ئەگەر بەدەر نییە  یان ئەوەتا هەر بەڕاستی لەعەلمانییەت نەگەیشتوون و لەبنچینەدا باوەڕیان پێی نەبوەو کاریان بۆ نەکردوە  ،  یان لەگەڵ بیرو بۆچوونی خۆیان و خەڵک و کۆمەڵگەش   ڕاستگۆ نەبون و نین لەپێناوی بەرژەوەندی حزبی و بەدەست هێنانی دوو کورسی زیاترو لەدەست نەدانی دەسەڵات  مجامەلەو پشی  پشی   بۆ هەڵگرانی ئایدۆلۆژیا ئایینیە جواروجۆرەکان  دەکەن و بوێری ئەوەیان تێدا نیە  بەدەنگێکی زوڵاڵ  بڵێن ئێمە عەلمانین و ڕێگا نادەین دەوڵەت بە ئاینی بکرێ و ڕاشکاوانە  بڵێن ( ئاین بۆ تاک و دیموکراسیش بۆ هەمووان ) ئێستا ئەوەی کە ئەم دەسەڵات و حوکمڕانییە  وەک دەسەڵاتێکی ئاینی ڕووت  ناخاتەڕوو    تەنها ئەوەیە  کە ڕیش پانەکان و توندڕەوەکان خودی خۆیان  ڕاستەوخۆ لەسەر  عەرشی کورسی دەسەڵات دانەنیشتوون ، خۆ ئەگەرنا  ئەوەتا  ناڕاستەوخۆ ئاین بەشدارێکی کارا و کاریگەرە  لە دەسەڵات و دەوڵەتداریدا بەدەرکردنی  یاسای ئایینی و  هەبوونی وەزارەتی ئاینی و تێکەڵاوکردنی دین و دەوڵەت و بڵاوکردنەوەو پێشخستن و خزمەتکردنی بیری ئایینی و تەنانەت چاوپۆشی کردنیش لە ووتارە  توندڕەویەکان و تەکفیرکردنی خەڵک و ڕەتکردنەوی بەرامبەرەکانیان و جیاکردنەوەی دین لەدەوڵەت  بەکردار ، دواجاریش ئەم  دۆخە کوشتن و تیرۆرو ئاشووب و نانەوەی پشێوی لەنێو  کۆمەڵگەو  کوشتنی زیاتری ئینتیمای  نیشتمانی و لەبەین بردن و شێواندنی کلتووری نەتەوەیی بەرفرانتر دەکات  .