ڕێوڕەسمێك بۆ ڕێزنان لەمزەفەر نەواب ئەنجامدەدرێت
چاودێر:
بە دروشمی (مزەفەر نەواب لە ویژدانماندا دەدرەوشێتەوە) بنكەی روناكبیریی گەلاوێژ، لە مەراسیمێكی ئەدەبی و روناكبیریدا، رێز لە شاعیر و شۆڕشگێڕی عەرەب، مزەفەر نەواب دەنێت.
وا بڕیارە رۆژی شەممە 22/2/2020 كاتژمێر (2)ی پاشنیوەڕۆ لە هۆڵی عیزەدین مستەفا رەسوڵ لە هۆتێل گراند ملینیۆم بنكەی روناكبیریی گەلاوێژ، لە مەراسیمێكی ئەدەبی و روناكبیریدا بە دروشمی (مزەفەر نەواب لە ویژدانماندا دەدرەوشێتەوە) رێز لە شاعیر و شۆڕشگێڕی عەرەب، مزەفەر نەواب بنێت.
لەو مەراسیمەدا، چەند توێژینەوەیەكی گرنگ دەربارەی مزەفەر نەواب لە لایەن توێژەرانی پسپۆڕەوە پێشكەش دەكرێن، لەوانە: (پ. د. قاسم حسێن ساڵح، د. عەمار عەبدولباقی. غەزای درع التائی، د. قەحتان جاسم جەواد، د. سەعد حەسەنی و كازم غەیلان).
جگە لە پێشكەشكردنی ئەو توێژینەوانە، چەندین كەسێتی و روناكبیری عەرەب و بیانی لە دەرەوەو ناوەوەی عێراق، بانگێشتی مەراسیمەكە كراون و باس لە ژیانی و خەباتی شۆڕشگێڕی نەواب دەكەن، هەروەها چەند دەقێكی شیعر شاعیر دەخوێندرێتەوە لەگەڵ پێشكەش كردنی چەند گۆرانییەك لە شیعرەكانی مزەفەر نەواب كە كراون بە گۆرانی.
واش بڕیارە لە مەراسیمەكەدا كتیب لەسەر ژیانی و بەرهەمەكانی بڵاوبكرێتەوە.