كشتوكاڵی هەرێم: هەر بەرووبوومێك پێویستی ناوخۆ پڕبكاتەوە هاووردەكردنی قەدەغە دەكەین
بابان – ئاژانسەكان:
وتەبێژی وەزارەتی كشتوكاڵی هەرێمی كوردستان رایدەگەیەنێت، هەر بەروبومێك پێداویستی ناوخۆ دابین بكات، هاوردەكردنی قەدەغە دەكرێت و دەشڵێت لە یەكی ئەیلولەوە هاوردەكردنی تەماتە رادەگیرێت.
حسێن حەمەكەریم وتەبێژی وەزارەتی كشتوكاڵ و سەرچاوەكانی ئاو لە هەرێمی كوردستان، لە كۆنگرەیەكی رۆژنامەوانییدا رایدەگەیەنێت كە بۆ پەرەپێدان و پشتیوانی بەروبومی ناوخۆیی و جوتیارانی هە رێمی كوردستان، بڕیارماندا بە قەدەغەكردنی هاوردەكردنی تەماتە لە رۆژی 2019/9/1 تا كاتێكی نادیار و جەختی لەوەش كردەوە كە هەموو رێگایەك دەگرنەبەر بۆ ئەوەی بەروبومی ناوخۆیی پەرەی پێبدرێت و پشتیوانی بەروبوومی ناوخۆ و جوتیاران بكرێت.
وتەبێژەكەی وەزارەتی كشتوكاڵی هەرێمیش، ئاماژەی بۆ ئەوە كرد كە جگە لە تەماتە نزیكەی 15 بەروبومی دیكەی وەك سەوزە و شەش بەروبومی دیكەی وەك میوە و بەروبومی ئاژەڵیشیی تێدایە كە سەرجەمیان هاوردەكردنیان راگیراوە هاوردەكردنی قارچكیش بە یەكجاریی قەدەغەكراوە و چاودێری ووردیش بۆ ئەوە مەبەستە دەكرێت و بەهیچ شێوەیەك رێگە نادرێت بڕیارەكە بەلاڕێدا ببرێت.
ئەو ووتەبێژەی سەبارەت بە وادەو كاتی قەدەغردنی بەرووبوومە هاوردەكان دەڵێت: هەركاتێك زانیمان ئەو بەروبومە لە بازاڕ كەمبۆتەوە و نرخی زیادی كردوە، ئەوە ئەوكاتە بڕیارێكی دیكە لەو بارەیەوە دەدەین.