دزی‌و فزی!

بابان حەمە 31/01/2017

هەرێمی كوردستان لەبارودۆخێكی دژواری ئابوری‌و سیاسیدایە، كە كەس خۆزگەی پێ ناخوازێت.. لەهەرێمێكدا دەژین، لەرووی سیاسیی‌و دەوڵەتدارییەوە، ئەگەر قەبارەی قەرزەكانی‌و فشارە ئابووری‌و بارگرانییەكانی سەرشانی خەڵك‌و چارەكە مووچەیی‌و پەكخستی سێكتەرەكانی خزمەتگوزاری‌و قوفڵدانی باڵاترین سەرچاوەكانی دەركردنی یاسا (كە پارلەمانە)، تاریككردنی سیاسیانەی تروسكاییەك بۆ دانوستانی سیاسی‌و شەڕی كۆنەقین‌و تازەقینی سیاسییە باڵاكان لەسەر حسابی خەڵك‌و قووتی خەڵك‌و فلیقاندنەوەی زیاتری هەژارو بێهێزكردنی زیاتری بازاڕ‌و ئاوەڕووتكردنی زیاتری مووچەخۆرو فەرمانبەرانی دەوڵەت.. رۆژ بەڕۆژ هەنگاوی گەورەتر دەنێت..
ئەم هەرێمە دەكرێت حاڵی حاز پێی بووترێت هەرێمێكی ناساغڵەمی سیاسییە .. بێجگە لەوەی هەرێمێكی پەڕپووتی دارایی‌و رەنگزەردو لاوازی ئابووریشە!
لەوەگەڕێ كە ئەزموونی 25 ساڵی حوكمڕانی لۆكاڵی نەیتوانیوە ئامادەیی سێ ساڵی هاڕەكردنی نرخی نەوت‌و شەڕی دژی داعش بگرێت‌و بە مەمرەوبژی لاشەڕو پینەوپەڕۆ كارەكانی (یاسایی‌و نایاسایی) بەڕێبخات‌و فڵچەی لێبدات!
لەوەش گەڕێ داهاتی نەوت‌و قەرزەكان‌و بڕی فرۆش‌و ناردەنی نەوت نادیارەو پارلەمان مەقفولە‌و لایەنەسیاسییەكان لەسەر بورجی عاجەوە تەماشای بارودۆخی عامی ئەو خەڵكە دەكەن‌و هەندێكیشیان چوونەتە سەر كەلی شەیتان‌و بە ئامان‌و زەمانی رەحمان دانابەزن‌و ئینكارییان سەرشێتییان حەددو حدودی تێپەڕاندووە. لەوەش گەڕێ جاروبار هەندێك لێدوان‌و قسە تووڕدەدەن وەك ئەوەی بڵێن (قەیچێكا خەڵك برسیانەو نان نییە بیخۆن.. با كێك بخۆن!)..
بەس لەوە ناگەڕێم، ئەوەی كە لەو بارگرانی‌و پەڕپووتە ئابوری‌و داراییەی حكومەت بارگرانترو دژوارترە.. ئەوەیە سەرباری ئەو دۆخە هەندێك (سیا30!) باس لە چاكسازی‌و بەگژاچوونەوەی گەندەڵی‌و دزی‌و فزی بكات! باس لە ئینتیمای نیشتمانی‌و خۆڕاگری خەڵكی رەش‌ورووتی هەرێمی كوردستان بكات! باس لەپەیامی دڵخۆشیی‌و موژدەی نەفەوتانی (پاشە+كەوت!) بكات! باس لە دەوڵەتی سەربەخۆیی كوردستان بكات!
جێبەجێكردنی ئەو پەندە عەرەبییەی كە دەڵێت "پۆلیس‌و دام‌ودەزگاكانی ئاسایش دزە بچووكەكان دەگرن‌و پارێزگاری لەدزە گەورەكانیش دەكەن" .. ئاخر خۆخەڵەتاندنە نەزانیین دزە گەورەكان‌و چەورەكانی حزب‌و پیسخۆرو ژێرزەمین پڕپارەكان‌و چنگی قوڕگی بازاڕ‌و خاوەن سەفەقاتی چەند دەیەیی نەوت‌و دۆشینی ژێرزەوی ئەم هەرێمە كێن‌و كێ نیین.. بۆ ئەوانەشی خۆیان بەدڵسۆزو پاك‌و زاناو ئابووریناس‌و روناكبیر دەزانن.. ئەوانەی پێیان وایە كە (دال)ەكە پە پێشیانەوە بوو دكتۆرن‌و (پێ)یەكە با پێشیانەوە بوو پرۆفیسۆرن .. ئەوانەی قسەی هەژدە هەژدە لەسەر كۆمەڵی مەدەنی‌و فشارە سپی‌و دیموكراسی‌و ئاشتەوایی‌و خەمخۆرییەكان دەكەن‌و (وەستای قسان‌و كڵۆڵی دەستانن).. كوان؟! بۆ نایەن ئەم فش‌و فاڵی چاكسازی‌و بەگژاچوونەوەی گەندەڵی‌و دزی‌و فزییە لەم چەورەو چەكل‌و پارەخۆرو نەوت دۆشانە وەربگرنەوەو پرۆژەیەكی مەدەنی‌و نیشتمانیو فشارێكی گەورەی سپی‌و دیموكراسیانەی پێ بونیادبنێن‌و تا دەگات بەدادگاییكردن‌و سزا..  من لەوە دڵنیام هەندێك سیاسی‌و حزبیش (ئەمما سیاسی‌و حزبی مێژوو پاك‌و گیرفان پاك‌و دەست پاك‌و بێ ژێرزەمین!) دەبنە پشتیوان.. هەندێك روناكبیرو ئابووریناس‌و چالاك‌و پارلەمانتاری وریاو خەڵكی نیشتمانپەرەوەرو دڵسۆزیش سكانداڵەكان زیاتر دەكەنە هەڵڵا‌و گوڕو تین زیاتر دەدەن بەم فشارە سپییە .. ئەم فشارە مەدەنی‌و دیموكراسی‌و مرۆییە ..
خەڵك‌و هاونیشتمانی بێدەرەتان‌و زوڵملێكراوی برسیكراوی مووچەبڕاوی توڕە. چیدی قسەی زل‌و ماكیاژكراوی ناوێت. دەركردن‌و بەدادگاگەیاندن‌و سزادان‌و كەشفی سكانداڵ‌و گەورەدزانی، دەوێت كە هەم سیاسەت‌و كاری حزبی‌و دەوڵەتدارییان بەچەشنێك ناشرینكردووە، بێزت نەیا سەیری بكەیت! خۆدەكرێ حزبەكان ئەمە لەماڵی خۆشیانەوە دەست پێبكەن ئەگەر جەسارەت بكەن‌و بوێربن!