مەلا بەختیار رەخنەی توند لە وڵاتانی ئەوروپا دەگرێت

کوردستان 04/11/2023

مەلا بەختیار، سیاسەتمەدار و رۆشنگەر، لە چاوپێکەوتنێکیدا لەگەڵ دەزگای (جەست پرێس)ی هۆڵەندی، رەخنە لە وڵاتانی ئەوروپا دەگرێت کە کەمتەرخەم بون لەوەی ئەو تاوانانەی بەرامبەر کورد کراون تا ئێستا بە جینۆساید نەیانناساندوە. هاوکات دەربارەی باردۆخی سیاسی عێراق و ناوچەکەش بۆچونی خۆی دەخاتەڕوو، باسی دەستوەردانەکانی ئێران و تورکیاش دەکات کە لە عێراقدا دەیکەن.


دەقی چاوپێکەوتنەکە:
هاوڕێیەکی فەڕەنسی پێشنیاری جەنابتانی کردووە چاوپێکەوتنتان لەگەڵ بکەم بۆ ئەوەی گۆڤارێکی هەفتانەیان هەیە، ئەو چاوپێکەوتنە لەوێ دابنێن.
مەلا بەختیار: هاوڕێ فەڕەنسییەکە کێیە؟
ئاوات دەریا، ئەوەی لە زەردەشتییەکانە
مەلابەختیار:  بەڵێ بەڵێ
شارۆ- وەرگێڕ: بەڕێزیان لە دەزگایەکی باڵا هاتوون لە هۆڵەندا (جەست پرێس)ی پێدەڵێن، دەزگایەکی هۆڵەندی مەسیحی یە، لەلایەن ئەوانەوە هاتووە بۆ ئێرە، ئەم بەڕێزە (گۆرهات ج.بلانکیرس) خۆی لەهەمانکاتدا قەشەشە، بەڵام رۆژنامەنوسیشە لە پاڵ پیشەکەی، لەوێوە کاری کردووە ساڵانێکە لە ئەوروپا.
مەلابەختیار: بەڵێ، دەی با بفەرمووێ.

گۆرهات ج.بلانکیرس: ماوەی دە ساڵە لە  رۆژهەڵاتی ناوەڕاست (شەرقی ئەوسەت) ئیش دەکەم، یارمەتی کەنیسەکانی رۆژهەڵاتی ناوەڕاست دەدەم، بەتایبەت ئەو کەنیسەیەی کە لە سلێمانی بەناوی مریەم عەزرایە یارمەتییان دەدەم.
گەر حەز دەکەیت دایرێکت بچینە ناو پرسیارەکانەوە.
مەلا بەختیار: باشە

گۆرهات ج.بلانکیرس: بەگشتی بارودۆخی سیاسی کوردستان چۆنە، تێڕوانین ئێوە چیە بۆ ئەو هەلومەرجەی لە ئێستایە هەیە، بەتایبەت ئەو رەوشو کاریگەریانە سیاسیانە چیە کە لەسەر مەسیحیەکان هەیە، لەناو ئەم زۆنە پڕ لە ئاڵنگاری کردنەی کە هەیە؟
مەلا بەختیار: بەڵێ، با لە عێراقەوە دەستپێبکەین..

گۆرهات ج.بلانکیرس: گەر ئیزنم بدەی پرسارێکی شەخسیم لە جەنابتان هەیە، رەنگە جەنابتان لە ئەوروپا ناسراوبن بە رادەیەکی زۆرنا بەتایبەت بۆ خودی خۆشم ئاشنا نەبوم بە ناوی تۆ، بەڵام ئەوەی کە من بیرم بێت دوو ساڵێک بەر لە ئێستا لە میدیاکاندا ئەوەم بەرچاو کەوتووە کە جەنابتان لە خەستەخانەیەک بوون لە ئەڵمانیا لە بەرلین، بەوەی کە ژەهر خوارد کراوون، ئایا دەتوانی ئەم پرسی ژەهر خواردنە، کەمێک باسی بکەیت بۆم، بەتایبەت ئەوەی کە باستکردووە لەناو خەڵک بەجۆرێک لەجۆرەکان لەناو یەکێتییەوە لەناوە ئەو حزبەوە شتەکە روویداوە..
مەلا بەختیار: بەڵێ ژەهرخوارد کرام، کۆنگرەی رۆژنامەوانیم بەست، بەڵگەکانم ناردووە بۆ هەموو دەوڵەتان، بۆ هەموو سەفارەت و قونسڵەکان، لە ئەڵمانیا چارەسەرکراووم، پرۆفیسۆرەکەم لە ئەڵمانیا کۆنگرەی رۆژنامەنوسی بەست، ئێستا رزگارم بووە.

گۆرهات ج.بلانکیرس: فەرموو کاک بەختیار بۆ ئەو پرسیارەی جەنابتان با دەست پێبکەین.
مەلا بەختیار: بەڵێ، با لە عێراقەوە دەستپێبکەین، عێراق وڵاتێکە بیست ساڵە سەدام رووخاوە لەم بیستە ساڵە کێشەی بەعسییەکان و پاشماوەی بەعسییەکان و ئەم نیزامە تازەیە هەبوو، داعش سەریهەڵدا پێش داعش چەندین گروپی تیرۆرستی تر تەقینەوەیان دەکرد لە عێراق بەتایبەتی لە بەغداد و موسڵ و تا ئێستا دەتوانم بڵێم عێراق سەقامگیر نەبووە. مەعلوم بووە ئێستا کە لە هەموو هەڵبژاردنەکان شیعە باڵادەستە، لە باشترین حاڵەتدا شیعەی عێراق سیستەمێک بنیات دەنێن وەکو کۆپیکراوی ئێران دەبێت، ئەگەر سەیری دەستوری عێراق بکات دوو ئاراستەی ناکۆک دەستوری عێراقی نوسی ئەو هێزانەی باوەڕیان بە دیموکراسی بووە هەندێک مەبادئی دیموکراسییان چەسپاندووە، ئەو هێزانەی باوەڕیان بە مەزهەب و شیعە بووە زەمانی ئەوەیان کردووە ئەو پرنسیپانەی بۆ دیموکراسی چەسپێندراوون هیچ زەرەری بۆ شیعەکان و مەزهەب و دین نەبێت، تۆ ناتوانی ئێستا بەدەستوری عێراق بڵێیت دەستورێکی سیکولارە ناشتوانی بڵێیت دەستورێکی مەدەنییە، سیکولار و مەدەنیەت لە دیموکراسی دەرکەیت دیموکراسییەکی رواڵەتی بۆ دەمێنێتەوە و جەوهەری نامێنێت لە وڵاتێکدا کە دیموکراسی وابێت وەکو روونم کردەوە چی دەمێنێتەوە بۆ سونەو کورد بەرامبەر بە شیعە؟  سێ هێز لە عێراقدا هەیە  سێ هێزی سیاسیی نەتەوەیی، شیعە زۆرینەیە سونە پێکهاتەی دووەمە ئەویش زۆرە بەڵام زۆرتر نیە لە شیعە، دوای ئەوان کورد دێت لە سەدا پانزە بۆ لە سەدا حەڤدەو هەژدەی عێراقە. کاتێک کە دیموکراسی لاواز دەبێت لە عێراقدا مافە دیموکراسییەکان بۆ کورد مەترسی لەسەرە چی قەرەبووی دەکاتەوە لە تەوازنی هێز، بۆیە ئێستا عێراق بەڵانسە لەنێوان سێ هێز هێزی شیعە کە زۆرینەو بەهێزن، سونە و کورد ئەم بەڵانسە خۆی بگرێ ئیدارەی عێراق باش دەکرێت بە پێچەوانەوە هەر لایەنێک لەم سێ لایەنە لاواز بێت باڵانسەکە تێکدەچێت چەند ساڵێک لەمەوبەر سونە لاواز بوو شەڕ لە نێوان سونە و شیعە دەستیپێکرد باڵانسەکە لەگەڵ سونە تێکچوو لەوکاتە دوای ئەوان لە ریفراندۆم ئێمە زەعیف بووین باڵانسەکە لەگەڵ ئێمە تێکچوو شیعەی حاکم بەناوی دەستورو یەکێتی خاکی عێراق هەم پەلاماری سونەی دا هەم پەلاماری کوردیدا، ئەمە نەخشەی سیاسی عێراقە.

گۆرهات ج.بلانکیرس: بەڕێزتان ئاماژەتان پێکرد ئەمە نەخشەی سیاسی عێراقە، بەڵام ئێمە گەر باسی هەژمونی تورکیا بکەین، بۆنمونە، باسی هەژمونی ئێران بکەین، ئەمانە دەیانەوێت لەڕێگەی ئەو تەداخولاتانەی لە رێگەی عێراقەوە دەیکەن بیانەوێت عێراق وەکو سیستەمێکی غەیرە تەوازن سەیر بکرێت باسی سیستەمە ناوخۆیەت کرد رات چیە لەسەر ئەو سیستەمە دەرەکییانە؟
مەلابەختیار: ئێران و تورکیا دوو سیستەم و دوو فەلسەفەی سیاسی جیاوازن بەدرێژایی مێژوو ئەو دوو سیستەمە چ لەسەردەمی ئیمپراتۆرەتەکان چ لەسەردەمی کۆمارەکان و شا چ ئێستاش ناکۆکیان لە رۆژهەڵاتی ناوەڕاست هەیە، ئێستا پانزە بیست ساڵێکە جەنگی سارد لەبەینی تورکیا و ئێران هەیە، هەریەکیشیان هەوڵ دەدەن کاریگەرییان لە عێراق زۆر بێت، تورکیا لەرێگەی تورکمانەکانەوە و لەرێگەی ئابورییەوە و لەڕێگەی کاریگەری سیاسەتی جیۆپۆلەتیکەوە، هەروا بەهەژمونی عەسکەری و سیاسی و ئەمنی هەوڵ دەدات کاریگەری زۆری لەسەر عێراق هەبێت، ئێران یەکەم لەڕێگەی مەزهەبەوە، شیعە، سنوری ئێران لەگەڵ عێراق و کوردستان زۆر زیاترە لە تورکیا لە بەسڕاوە هەتا حاجی ئۆمەران سنوری ئێرانە، ئەمە بوارێکی زۆرە بۆ ئێران کە سیاسەتی مەزهەبی، سیاسەتی ئابوری، سیاسەتی ئەمنی، سیاسەتی عەسکەری و سیاسەتی جیۆپۆلەتیکی هەمووی کاریگەری لەسەر عێراق دادەنێت؛ مەعلومیشە ئێران کاریگەری زۆر زیاترە لە تورکیا ئێستا لە عێراق.

گۆرهات ج.بلانکیرس: تورکیا دەیەوێت تەداخولاتی زۆر بەسەر عێراق بکات و لەهەمانکاتدا ئەندامی ناتۆشە. رای ئێوە چیە لەسەر ئەمریکا کە تەداخولاتی دوو جەنگی کردووە لە عێراقدا بەتایبەت لەڕێگەی ئەم دوو جەنگەوە سەدامی لاواز کرد یەکەمیان جەنگی کەنداوە، دووەمیشیان ئەوە بوو کە بینیمان لە ٢٠٠٣ هاتن لە عێراق سەدامیان روخاند.
مەلابەختیار: دیارە تورکیا لە ناتۆیە دیاریشە تورکیا بۆ بەرژەوەندی ئەمنی قەومی خۆی هەندێک جار پێچەوانەی سیاسەتی ناتۆ بڕیاری عەسکەری و سیاسی دەدات، پەنجا ساڵە قوبرسی کردووەتە بە دوو بەش، بەشێکی کردووە بە تورک نشین و دەسەڵاتی تورکی، ناتۆ قبوڵیشی کردووە، لەکاتێکدا قوبرس سەر بە ناتۆیە، قوبرس بە سەدان کیلۆمەتر بە سنوری دەریایی دوورە لە تورکیا بەڵام تورکیا حسابی ئەمنی قەومی خۆی دەکات، لەهەمان روانگەی ستراتیژی تورکیا سەیری بکەیت لە سنووری زەمینی لە عێراقیش و لە سوریاش، ئەم سیاسەتە بۆ ئاساییشی ژیوپۆلیتیکی ئێستا تورکیا دەیسەپێنێت، ئەگەر واز لە بڕیاری سیاسی و دبلۆماسی و راگەیاندن بێنین، خۆ ئەمریکا خۆی کەم تەداخولی کردوە؟ فەڕەنسا و بەریتانیا کەم تەداخولیان کردووە؟ هەفتەیەکە فەڕەنسا خەریە لە ساحلی ئەفریقا دەکشێتەوە، بەدەیان ساڵە لەوێیە، لەبەرئەوەی تەداخول لەلای دەوڵەتە گەورەکان تاوانێکی زۆر گەورە نیە بۆیە بەدەرئەنجام ووردە ووردە تەفەهومی تەدەخولی وڵاتانی تریش دەکەن، خۆشیان تەداخولیان لە بەشێکی ئەوروپای شەرقی کرد خۆ لەدوای جەنگی ساردەوە لە کۆسۆڤۆ لە هەرزەگۆڤین بەرامبەر بە سڕبییەکان....

گۆرهات ج.بلانکیرس: ئەمانە زۆر خەتەرناکن.
مەلابەختیار: بەڵام دەیکەن یان نا؟

گۆرهات ج.بلانکیرس: بەڵێ.
مەلا بەختیار: ئێ تورکیاش دەیکات، تورکیا بە ئەمریکا دەڵێ دوو ئۆقیانوس دەبڕی تەداخول دەکەیت، بەڵام من لەسەر سنورەکەم، ئێمە نەیکەین. من باسی مەنتیقی حکومەتەکان دەکەم.

گۆرهات ج.بلانکیرس: ئەوەی کە جەنابتان باستان کرد من خودی خۆشم ئەوەم بینیوە زۆر لەسەر جادەو لەناو خەڵک  پرسیارم لە هاوڵاتی عێراقی کردووە لەبارەی ئەوە زۆربەیان وتوویان ئێمە رقمان لە ئەمریکایە  پێمان وایە ئەمریکا داگیرکەرە، سەرنجت چیە لەسەر ئەمە؟
مەلابەختیار: سەرنجم لەسەر ئەمە، زۆر گرنگە؛ ئەمریکا پێش جەنگی سارد و، ئەمریکا دوای جەنگی سارد، ئەمریکا پێش جەنگی سارد بە حوکمی ئەو ناکۆییەی لەگەڵ یەکێتی سۆڤیەت و چین هەیبوو، شەڕی بەرژەوەندی و ناکۆکی بەرژەوەندی بوو، هەموو داگیرکرەکانی ئەوکاتەی ئەمریکا ناڕەوا بوو، لەدوای جەنگی دووەم  جگە لە ژاپۆن و کۆریای باشور و ئەڵمانیا، ئەمریکا لە هیچ داگیرکاریەکدا سەرنەکەوت، لە هەموی شکستی خوارد، بەڵام دوای جەنگی سارد کە سیستەمی تۆتالیتاری رۆژهەڵاتی دەڕوخێ، ناسیۆنالیزمی فاشی حاکم دەبێت لە یوغۆسلافیا، سڕبییەکان، سەدام، بەڵێ ئەمە بوو بە کێشەیەکی جیهانی لەبەرئەوە دەستێوەردانە عەسکەری بە بڕیاری ئەنجومەنی ئاسایش شەرعیەتی درایێ، لە یوگسلافیا دەستێوەردانی عەسکەری نەکردایە، میلۆسۆفیج لە کۆسۆڤۆ دوو ملیۆن کەسی دەکوشت، ئەلبانیا،  سلۆڤینیا تەدەخول زۆر کرا، کۆتایی بە محنەتی فاشیەت هێنا، عێراق سەدام فاشی بوو، فاشییە نیو ملیۆن کوردی کوشتووە ١٨٣ هەزار کەسی ئەنفال کردووە پێنج هەزار کەسی لە هەڵەبجە شەهید کردووە یەک ملیۆن و نیوی لە عێراق و ئێران کوشتووە لە شەڕی ئێران و عێراقدا، کوێتی داگیر کرد، یەکێک لە سیفەتەکانی فاشی چیە؟ ئەوەیە بە جوگرافیای حوکمڕانی خۆی رازی نیە، زیادی دەکا، لەبەرئەوە هەمیشە بەعسییەکان پەلاماری کوردستانیان داوە، ١٩٨٠ پەلاماری ئێرانیان داوەو ویستیان خوزستان و ئەو ناوچانە بخەنە سەر خاکی عەرەب، ئێران توانی عێراق تێکبشکێنێت، کە شکا ویستی شەڕێکی سوکتر بکات کوێتی داگیرکرد، هەموو ئەو سیاسەتە دەگەڕێتەوە بۆ چی بۆ سروشتی فاشیانەی سەدام و بەعس، بەداخەوە لە ئۆروپا خەریکە پێناسەی فاشیەت و نازیەتی ئیتاڵی و ئەڵمانیان بیردەچێتەوە، بۆچی ئەوەی ئەڵمانەکان و ئیتاڵیەکان ئەوەی کردوویانە لە جەنگی دووەمی جیهان تاوانە، جینۆسایدە؟ ئەی بۆ ئەمەی سەدام لە کوردستان لە ئێران لە کوێت تاوان نیەو جینۆساید نییە؟ دەبێ ئاوا سەیری ڕووداوەکان بکەین، خۆ مێژوو مینۆی چێشتخانە نیە تا ئەوەی بەدڵی خۆتە هەڵیبژێریت و ئەوەی بەدڵی خۆت نیە وازیلێبهێنیت.

گۆرهات ج.بلانکیرس: راستە ئەو تاوانانەی لە ئەڵمانیا کراوە لە ئیتاڵیا کراوە ئەوان ئەوروپییەکان لەڕێگەی پەرلەمان لەڕێگەی دەنگدانی حزبەکانیاندا ئەم مەسەلانانەیان بە جینۆساید ناساندووە، هەتا جینۆسایدی ئەرمەنیەکان و جینۆسایدی ئێزیدییەکان لە پەرلەمانی ئەڵمانیا و ئەوروپا وەکو جینۆساید سەیر کراوە، منیش هاوڕاتم لەوە کە کوشتنی خەڵک هەرخۆی وەک خودی خۆی جینۆسایدە نەک ئەوەی بیخەینە ناو قاڵبی سیاسیەوە.

مەلابەختیار: گوناحم چیە پەرلەمانەکانی ئەوروپا لەهەندێ شوێن دەڵێن جینۆسایدە لە هەندێ شوێن بیست ساڵیش چاوەڕوان دەکەن، ئێمە گوناحمان چیە؟ بەشی زۆری پەرلەمانەکانی ئەوروپا کە ناڵێن جینۆسایدە، ئایا مردووەکانمان زیندوو دەبنەوە، مێژوو ئەوەیە کە روویداوە ئەوەنیە کە ئێستا بیر لە چی دەکەیتەوە.

گۆرهات ج.بلانکیرس: لە ئەوروپاش کۆدەنگی هەیە لەسەر ئەو بابەتەی کە بەشێک لەو کەسانەی ئەوان سەدام دەبینن، وەکو کەسێکی فاشیزم، کەسێکی  بکوژ، بەڵام ئەوانیش دوو فاقیان هەیە سیاسەتی دوو فاقی لەوەیە کە ئەسڵەن ئەوانەی وەختی خۆی لە نازییەکان فەرماندەی باڵا بوون، ئێستاش نەوەکانیان لایەنگرەکانیان خەڵک دەکوژن، لە ئۆکرانیا ئاخیر جار لە کەنەدا یانەیەکیان بۆ داناون بۆ ئەو کەسانە کە زۆرترین کوشتنیان کردووە لە ئۆکرانیا ئەمە من هاوڕام لەوە.
مەلابەختیار: ئێستا مەسەلەن جوولەکە، جینۆساید بەرامبەریان کرا حەقی خۆیەتی بەرگری لەخۆی دەکات، حەقی خۆیەتی ئەیەوێت قوربانییەکانی هەمیشە وەکو شوناسی نەتەوەیی و شوناسی دینی خۆی باسکات، ئەوروپییەکان بەگشتی زۆرینەیان بە حکومەت و خەڵکەکە جینۆسایدی جوولەکەکان ئەسەلمێنن و پشتیوانیشیان دەکەن، پرسیارەکەم ئەوەیە: دەبێ بۆ کوردیش وابێت.

گۆرهات ج.بلانکیرس: گەر سەد بۆ دوو سەد ساڵ بگەڕێینە دوواوە، دەبینین کۆمەڵێک گوندی ئەرمەنی، ئێزیدی هەبووە کوردەکان هەبوون پێکەوە ژیانیان هەبوە تەنانەت هەندێک جار شەڕیش روویداوە لەبەینیاندا، بەڵام پرسیارەکەی من ئەوەیە ئایا ئەم مەسەلەی پێکەوە ژیانە لە ئێستادا هەڕەشەی لەسەرە یان چی؟
مەلابەختیار: بەڵێ هەڕەشەی لەسەرە، بەڵام ئەوەی باشە ناخی کورد، ناخی ئەرمەن، ناخی پێکهاتەکانی تر، وەکو میلەت ناخی پاکمان بەرامبەر بە یەک هەیە، تۆ واز لە نەخشەی حکومەتەکان و نەخشەی مەزهەبی و ئایدیۆلۆجی بێنە، کە زەرەر دەگەیێنێت، بەڵام ناخی خەڵکەکە، ویژدانی خەڵکەکە پاکە، ئێمە تێگەیشتوین، ئەرمەن، سریانی کلدانی، بەشێکی زۆری تورکمان، ئێزیدی، کاکەیی، تێگەیشتیون بەدرێژایی مێژوو یاریمان پێکراوە، خۆمان دوژمنی یەکتری نین، هەمومان لە خێزانی مرۆڤایەتی ئەندامین.

گۆرهات ج.بلانکیرس: من پشتڕاستی دەکەمەوە ئەم قسانەی تۆ لەوەی کە خەڵکێکی زۆرم دیوە لێرە ڕایانکردووە، هاتوون بۆ ئەوروپا کێشەیان هەبووە، بەتایبەت ئەو کەمەنەتەوایەتیانە کە هاتوون، کەمایەتیە ئاینیەکان هاتوون، کێشەیان هەبووە، گرفتیان هەبووە، بەڵام ئەوەی ئێستا لێرە دەیبینم هەستدەکەم تۆزێک پێکەوە ژیانێک هەیە پێکەوەژیانێکی نیمچەیش بێت شتێکی وا هەیە
مەلابەختیار: ئێستا کەسوکاری خۆم شیعەی تێدایە، سونەی تێدایە، کاکەیی تێدایە، تورکمانی تێدایە، عەرەبی تێدایە، سروشتیشە نەمانهێشتووە کەس کێشە بخاتە نێوانمان.

گۆرهات ج.بلانکیرس: بەڕاستی من زۆر زۆرم پێخۆشە پشتگیری کورد بکەم، زۆر زۆرم پێخۆشە یارمەتی میلەتی کورد بدەم، من هاوکارییەکی باشم کۆکردۆتەوە، لەڕووی پارەوە، بەپێی ئەو پرنسیپەی هەیانە پارە کۆدەکەینەوە، دەمانەوێت یارمەتی ئەو پرۆجێکتە ئینسانییانەو پرۆژە ئینسانییەکان بدەین، داواکارم کاک بەختیار، لینکێک بدۆزێتەوە بۆ سمێڵکا لە رۆژئاوا بۆ ئەوەی هاوکارییان بکەین.
مەلابەختیار: بۆ رۆژئاوا؟
گۆرهات ج.بلانکیرس: بەڵێ.
مەلابەختیار: یەکەم لێرە ئۆردوگا لای عەربەت هەیە خەڵکی رۆژئاوان، دووەم لێرە رۆژئاوای کوردستان نوێنەرایەتییان هەیە دەتوانین کۆبونەوەیەکتان بۆ رێکبخەین.
گۆرهات ج.بلانکیرس: باشە.
مەلابەختیار: هەتا کەی لێرەن؟
گۆرهات ج.بلانکیرس: دوو هەفتەی تر
مەلابەختیار بۆ وەرگێڕ: لە رێگەی تۆوە کۆبونەوەکەی بۆ رێکدەخەین،لەگەڵ سکرتێرەکان، شارۆ پەیوەندیت هەبێ، پەیوەندی بە برادەرانی رۆژئاوا بکە، بڵێ لێرە کەسێک هەیە مەسیحییە رۆژنامەنوسە هاتووە  دەیەوێت هاوکاری رۆژئاوا بکات و بیبینن و ئیشەکەی لەگەڵ رێکبخەن بکەن، باش، بڵێ ئەگەر هاتمە هۆڵەندا لەڕێگەی تۆوە وادەکەم بیبینم لەوێ، من زۆر دەچم بۆ هۆڵەندا.
گۆرهات ج.بلانکیرس: باشە، ماڵی من ماڵی تۆیە.

 

دەقی چاوپێکەوتنەکە بە زمانی هۆڵەندی