ڕاوە بەراز و درۆنی تورکی
ئەنوەر حسێن (بازگر)
1
بێ دەنگبوونی ئەمەریکا لە هەرێم
واشنتۆن بەبێ دەنگبوونی لە کێشەکانی نێوان هەرێم و بەغدا، لە پرسی موچە و نەوت .... دەکرێت بەو مانایە بێت، کە لە هەرێم نیگەرانە و چاوپۆشی لە مامەڵەکانی بەغدا دەکات، نیگەرانییەکانی ئەمەریکا لە هەرێم لە پرسی پێشمەرگە، دەخالەتی ئەنکەرە و تاران، پرسی نەوت و غاز دایە، کە لە هیچکام لەوانە نەیتوانی لایەنەکان ڕازیبکات و بەپێی خواست و بەرژەوەندییەکانی ئەو هەنگاو بنێن.
بەڵام چانسی هەرێم لەوەدایە، بارودۆخی ئەمەریکا لە عێراق باش نییە، بە دەست حەشدی شەعبی و گروپە چەکدارەکانەوە و هێرشەکانی حەماس بۆ سەر ئیسرائیل، ئەو پلانەشی لێشێواند کە بە نیاز بوو هێرش بکاتە سەر گروپە چەکدارییەکانی سوریا، عێراق و لوبنان.
گەرمی شەڕەکانی نێوان حەماس و ئیسرائیل، هێندەی تر ئەمەریکای سەرقاڵکرد.
2
غازی هەرێم
دۆسیەی غازی کۆرمۆر، پاش سێ ساڵ لە مامەڵە و ململانێی نێوان یەکێتی و پارتی، لە دوای شەڕی ئۆکرانیا، ڕەواجی زۆری لەناو جیهانی بازرگانی و سیاسی پەیدا کرد، سەرۆکی حکومەت زوو سەردانی تورکیا و ئیماراتی کرد بۆ ساغکردنەوەی وەکو ئەڵتەرناتیڤی غازی ڕوسیا بۆ ئەوروپا، بەڵام هەر زوو ئەم پلانە توشی بەربەست بوەوە، بەوەی کە بەرهەمهێنان لە زۆنی سەوزدایە، وتیان؛ ڕێگا نادەین بە دەردی نەوتەکە بچێت، پاشان ڕوسیا و ئێرانیش هاتنە سەر خەت.
ناردنە دەرەوەشی لە تورکیاوە شکستیخوارد، ئێستاش وەکو داهاتێکی گەورەی ئابوری کوردستان سەیر دەکرێت و ڕەنگە فرۆشتنی لە ڕێگای عێراقەوە، وەکو باشترین ئەڵتەرناتیڤ سەیر بکرێت، کە لەسەر مێزی گفتوگۆی ئەمەریکا، عێراق و یەکێتی دایە، ئێرانیش لە پشتی پەردەوە پێدەچێت بە ئاکام بگات.
3
ئاڵوگۆڕەکانی هەرێمی کوردستان
واشنتۆن، پاریس و لەندەن، بە دڵنەرمی، ئەنکەرە، بەغدا و تاران و تەنانەت یەکێتیش بیر لەوە دەکەنەوە، حکومەتی هەرێمی کوردستان گۆڕانکاری بەسەردا بێت و بیر لە ئەڵتەرناتیڤی نوێ و کار بۆ هێنانە پێشەوەی کەسانێک بکەن، کە ئەزموونی ڕابردوویان لە گەڵیدا هەیە، لایەنەکانی هەرێم و عێراق ڕەزامەندن لەسەر مامەڵە و بەڕێوەبردنی قەیرانەکان، بەڵام ئەوەی پرسیارە بۆیان، ئایا ئەم ئاڵوگۆڕە، کە ڕەنگە بکرێت پاش هەڵبژاردنەکان ئاسانە؟ ئایا توشی گرفتی ناوخۆیی و حیزبی نابێتەوە؟ ئایا دەخالەت نییە لە کاروباری سیاسی و حیزبی ناو حکومەت و حیزبێک؟ ئایا مەترسی لێ ناکەوێتەوە؟ بە هەرحاڵ ئاڵوگۆڕێك لە هەرێم و حكومەتدا ڕوودەدات، بەڵام بۆ ئەو ئاڵوگۆڕە پەیوەندی بە هەڵبژاردنەوەكانەوە هەیە، كە ڕەنگە دوابخرێت.
4
حەماس و ئیسرائیل
شەڕی بەردەوامی حەماس و ئیسرائیل، ڕووداوێکی چاوەڕوانکراوی سیاسی و سەربازی بوو، بە تایبەتی وەکو شکست بۆ ئیسرائیل و موساد، کە وەکو دوو دەزگای یۆتۆپی بەهێز سەیر دەکران، بەڵام دەرکەوت، بزوتنەوەیەکی ئیسلامی بە بیروباوەڕە، دەتوانێت هەم سنوری عەسکەری، هەواڵگری و ئەمنییەکان بشکێنێت، هەم هیچ زانیارییەکی ناوخۆیی دزە نەکاتە دەرەوەی.
ئەم شکان و شکستە ئیسرائیلی توشی شۆک و بەربەریەتی بێ وێنە کردۆتەوە، تا دەستیداوەتە کوشتنی خەڵکی بێ دیفاع بەناوی حەماسەوە.
پرۆسەکە ئیمکانی نییە بێ مۆسکۆ و تاران ئەنجامدرا بێت، بە ئامانجی هەڵوەشاندنەوەی پلانی واشنتۆن بۆ لێدانی هێزە دۆستەکانی ئێران و فشار لەسەری لە بەرامبەر پشتیوانی لە شەڕی ئۆکرانیا.
بەڵام پلانی مۆسکۆ بە ئامانجی تێوەگلانی ئەمەریکا لە شەڕێک لەگەڵ ئێران، هاوشێوەی شەڕی خۆی لەگەڵ ئۆکرانیا، کە پێناچێت ئەمەریکا و ئیسرائیل ئەو شەڕە بکەن.
ململانێی واشنتۆن و تاران لە دەرەوەی سنورەکان، شەڕی بە وەکالەت دەکەن، بەڵام تاران دەتوانێ یارییەکی بەهێز بکات و نەیارەکان مەشغوڵ بکات بۆ بەرهەمهێنانی چەکی ناوەکی و دڕۆن، لەسەر جوگرافیای واقیعیش، بە هەر هەموو وڵاتانی عەرەبی بە قەدەر تاران ڕۆشن قسە ناکەن، لە پشتیوانی حەماس و فەڵەستین.
5
ڕاوە بەراز و درۆنی تورکی
ئەنقەرە بۆ شەڕی (پەکەکە) و (هەسەدە)، کۆتاییهاتنیان بە یەکجاری، تۆڕێکی هەواڵگری، جاسوسی، ئەمنی و چاودێری تەکنەلۆژیای گەورەی دروستکردوە لە ئاسمانی هەرێمی کوردستان و ڕۆژئاوای کوردستان و سنورەکانی خۆی، واتا لە (تورکیا بۆ ئێران، لە تورکیا بۆ سوریا)، هەموو ئاسمانی خستۆتە سەر تۆڕێکی (شەبەکەیی) چاودێری ورد بە فڕۆکەی بێ فڕۆکەوان و بەردەوام دەیان فڕۆکەی بێ فڕۆکەوان، بە ئاسمانی ئەم سێ وڵاتەوەن.
تەنانەت هێندە چاودێرییەکەی ورد کردۆتەوە، زۆرجار لە جوڵەی بەرازەکانی ئەو ناوچە شاخاوییانە ئاگادارە و دەیانکاتە قوربانی و لەسەر کوشتنی گەریلاش حسابی دەکات.
سێ ساڵە چاوەڕوانی گڵۆپی سەوزی ئەمەریکایە بۆ هاوکاریکردنی بۆ هێرشی زەمینی بۆ سەر قەندیل تاوەکو پڵنگەکانی تامیل کۆتایی بە (پەکەکە) بێنێـن، بەڵام سەرکەوتوو نەبوە.
6
کشانەوەی ئەمەریکا و چارەنووسی هەرێم
گەر بەیانییەک لە خەو هەڵساین و ئەمەریکا بڕیاریدابێت هێزەکانی خۆی لە عێراق و کوردستان بکشێنێتەوە چی ڕوودەدات؟ هاتنی ئێران و تورکیا بۆ کوشتنی نەیارەکانیان؟ هاتنی داعش و جینایەتی نوێ و پەلاماردانی کوردستان لەلایەن حەشدی شەعبییەوە، واتا هاوشێوەی سیناریۆی گەڕانەوەی تاڵیبان بۆ ئەفغانستان، ئایا حکومەتی هەرێم بیری لەوە کردۆتەوە؟ كە چ كارەساتێك ڕوودەدات و یەكەم قوربانیش هەرێمە.