رۆژئاوا و باشووری كوردستان لە بەردەم مەترسییەكی بێ پێشینەدا
چاودێر:
هەردوو دەسەڵاتی كوردی باشووری كوردستان و رۆژئاوای كوردستان دوای ئەو گووشارانەی لە ساڵانی رابردوودا رووبەڕوویان بووەتەوە، ئێستا مەترسییەكی نوێ ڕووی تێكردوون، بەڵام ئەوەی جێگای پرسیاری شارەزایانی بارودۆخەكەیە، لەم دوو بەشەی كوردستان نە لەنێوخۆدا و نە لەگەڵ یەكدیدا هیچ هەنگاوێكیان بۆ پرۆژە و ئامادەسازییەكی هاوبەش نەناوە.
باشووری كوردستان
لەسەر ئاستی نێوخۆیی و نێودەوڵەتی هۆشداری لە مەترسیداری رەوشی هەرێمی كوردستان دەدرێت.
نوێنەری نەتەوە یەكگرتووەكان لە عێراق و باڵیۆز و كونسوڵی ئەمریكا لە هەرێمی كوردستان لە چەند لێدوانێكدا دووپاتیانكردەوە كە مەترسی لەسەر هەرێمی كوردستان هەیە و رەوشەكە بەو شێوازە نامێنێتەوە.
لەسەر ئاستی ناوخۆش ئەمڕۆ هێمن هەورامی جێگری سەرۆكی پەرلەمانی كوردستان هۆشداری دا لە مەترسیداری رەوشەكە و گووشارەكانی سەر هەرێمی كوردستان.
لەم سەروبەندەدا بڕیارە لەم هەفتەیەدا نوێنەری نەتەوە یەكگرتووەكان لەگەڵ سەرۆكی حیزبەكانی هەرێمی كوردستاندا كۆببێتەوە بۆ تاووتوێكردنی رەوشی هەرێمی كوردستان و وادەی هەڵبژاردنەكانی هەرێم.
بچووكردنەوەی قەوارەی هەرێمی كوردستان و دەرهێنانی كەیسی نەوت و غاز لەو مەترسییانەن كە رووبەڕووی هەرێمەكە بوونەوە.
رۆژئاوای كوردستان
رۆژئاوای كوردستان ئەگەرچی بەراورد بە باشووری كوردستان كێشە نێوخۆییەكان و گەندەڵی و ململانێی سیاسی و حیزبی كەمترە، بەڵام لەلایەنی دەرەكییەوە لەژێر گووشارێكی قورسدایە، كە زۆرجار لەلایەن دەوڵەتانی زلهێزی ناوچەیی و نێودەوڵەتییەوە جۆرێك مامەڵەیان پێوەدەكرێت بەتایبەت رووسیا و ئەمریكا و توركیا و ئێران.
رۆژی رابردوو رەجەب تەیب ئەردۆغان سەرۆكی توركیا ئاشكرایكرد لە بەرنامەیاندایە ئۆپەراسیۆنێكی نوێ بۆ سەر رۆژئاوای كوردستان دەسپێكەن.
ئەردۆغان گوتی ئەم ئۆپەراسیۆنە بە درێژایی سنووری سووریا و توركیا یان باكور و رۆژئاوای كوردستان دەبێ بە قوڵایی 30 كیلۆمیتر.
گوتیشی: ئامانج لەم ئۆپەراسیۆنە جێبەجێكردنی دروستكردنی ناوچەی ئارامە.
توركیا لە هەوڵدایە یەك ملیۆن و 500 هەزار ئاوارەی سووری بگەڕێنێتەوە ناوچە داگیركراوەكانی رۆژئاوای كوردستان ئەمەش مەترسی گەورەی دروستكردووە.
چی كراوە؟
چاودێران دەپرسن ئەرێ كە ئەم هەموو مەترسییانە لەسەر دوو دەسەڵاتی كوردی باشوور و رۆژئاوا هەبن، بۆچی لەنێوخۆی ئەم هەرێمە یان لەگەڵ یەكدی هیچ ئامادەسازییەك نییە؟، بەڵكو بەپێچەوانەوە ناكۆكییەكان زیادبوون.
چاودێران لەوبڕوایەدان هەنگاوی یەكەم رێككەوتنی كۆی هێز و لایەنە سیاسییەكانی هەردوو پارچە لەنێوخۆ و لەگەڵ یەكدی وەك دوو هەرێم، هاوكات دووبارە گەڕانەوە بۆ نێو هاووڵاتیان و هاتنەخوارەوە لە كۆشك و ڤێلاكانیان تا هەمووان بتوانن پێش بەم مەترسیانە بگرن.