هەڵسەنگاندنی دوومانگ لە کارەکانی پلاتفۆڕمی دابڕان و فێمێنیزمی رۆشنگەریی
پلاتفۆرمی دابڕان و فێمێنیزمی رۆشنگەریی لە چوارچێوەی چالاکییەکانی ناوەندی رۆشنگەریی چاودێردا، لە دەستپێکی ساڵی نوێی 2021 دا و لە هەنگاوێکی نوێی هەستکردن بە بەرپرسیارییەتی و بایەخدانان بۆ بابەتە رۆشنگەرییەکانی دنیای ئەمڕۆ، سەکۆی جیاوازیی راگەیاند.
لەم سەکۆیەدا، هۆڵی (ئازاد هەورامی) بووەتە ژوان و ژانی لەدایکبوونی ژینگەیەکی ئارام بۆ دیالۆگ و دنیابینی جیاواز و گردبوونەوەی ئەهلی ئەدەب و نوسین و پەرۆشانی پێناوی رۆشنگەریی.
مانگی دووجار رۆژانی شەممە، هۆڵی (ئازاد هەورامی) کەشێکی بەهاریی دەرەخسێنێ بۆ سەوزبونی پرسیاری ئازایانەو ئەندێشەی ئازاد و رەخنە.
ئەمڕۆ ئەم مۆدێلی مشتومڕو دیالۆگە، دەرویەکی دڵبەرو تەشاوێکی تژیە لە زیندویەتی شارو ئاوڕدانەوەیەکی جدیشە لە رۆحی رەنگاوڕەنگی ئەو کوڕو کچانەی کە بەتامەزرۆییەوە چاوەڕوانی ئێوارە پیاسەیەکی کەش و هەوای پاکو دڵگیریی ئەو فەزافیکریی و فەلسەفییەن، کە تێیدا تەنها پێوەر، عەقڵی ئازادو زمانی زانستە.
لە میانی ئەم دوو مانگەدا، بێپسان و بەردەوام، لەسەر ئەو نەخشەڕێیەی کە لەپێناویدا پێکهاتین، تەنها پلاتفۆرمی دابڕان و فێمێنیزمی رۆشنگەریی، چوار دیالۆگی سەرکەوتووی ئەنجامداون.
جیا لە بەڕێوەچوونی دوو خولی دوو ڕۆژەی پەروەردەی رۆشنگەریی و گرێبەستی چالاکی هاوبەش لەگەڵ چەند رێکخراوێکی کۆمەڵی مەدەنی و بەرزڕاگرتنی یادی سەرکردەی مەزنی جوڵانەوەی ئازادیخوازیی مێژووی هاوچەرخی نەتەوەکەمان شەهید ئارام.
هاوکات (بنکەی روناکبیریی گەلاوێژ)یش بەردەوام بازنە ئەدەبی و هونەرییەکەی شانبەشانی هزرو هێزی رۆشنگەریی دابڕان درێژەپێداوەو تەنها لەم دوومانگەدا چوار دیالۆگی دەگمەن و جیاوازیان ئەنجامداوە.
سەبارەت بەو دیالۆگانەی پلاتفۆرمی دابڕان دەمانەوێ سەرنجی گشتی خۆمان لەم چەند خاڵەدا بخەینەروو:
یەکەم: تەنها لەم قۆناغەدا، دەنگدانەوەی بەردەوامی شەممانە دیالۆگەکان، لە ئاستێکدایە جار لەدووای جار نوسەرو رۆژنامەنوس و روناکبیران بۆ خۆیان لەکاتی دیاریکراودا و بەپێی گرنگی راگەیەنراوی ناونیشانی بابەتەکان بەشدار دەبن.
دووەم: تایبەتمەندیی لە جیاوازیی بیرکردنەوەی بابەتی توێژەرو پێشکەشکارەکاندا بەبێ رەچاوکردنی هیچ سنورێک، رچەشکاندنێکی راستەقینەی ئەو میتۆدەیە کە پلاتفۆرمی دابڕان بانگەشەی بۆ دەکات.
سێهەم:بابەتەکان بەگشتی بابەتی لۆژیکی بوون، بۆنموونە
یەکەم دیالۆگ بۆ دکتۆر عیرفان مستەفا بوو بەناونیشانی (تێگەیشتن لەکوردبوون)، کە دەنگدانەوەیەکی فرەی لەنێو ماڵپەڕو پەیجەکانی نێو تۆڕی کۆمەڵایەتیدا هبوو. پاشان، مامۆستا لهۆن قادر بەناونیشانی (ژیانی شایستە لەنێو کلتوری ناعەقڵانیدا)، دیسانەوە گەرموگوڕی و گیانی جیاوازی لەپرسیارو مشتومڕەکاندا کەشێکی کارای دابوویە دیالۆگەکە.
سێهەمین دیالۆگ بۆ پڕۆفیسۆر دکتۆر سەباح بەرزنجی بوو، بەناونیشانی (کاریگەریی لۆژیک لە زانستە ئیسلامییەکاندا) وێڕای بەپێزی بابەتەکە، نابراو وەک کەسایەتییەکی ئیسلامی و سەرۆکی پەیمانگای زەهاوی بۆ بڵاوکردنەوەی فیکری ئیسلامی، ئاڕاستەیەکی نوێمان دا بەگوێی هەموو ئەوانەدا کە سەکۆی ئێمە، سەکۆی جیاوازییەو تەنها لێرە ئەو مەیدانی ئازادییە ئازایانە باوەڕی بە بوونی هەموو رەنگو دەنگێک هەیە کە بیەوێ قسەبکات و گفتوگۆ بکات. ئێرە بەدیلی بازنە بەرتەسکەکانی بیرو ئەندێشەی توندەهێز و توندئاژۆکانە.
چوارەم دیالۆگ بۆ د. نەوزاد جەمال بەڕێوەچوو، لەو کۆڕەدا بەردەوامی درا بە لۆژیک و فەلسفەی ناو زانستە ئیسلامییەکان و باشتر بابەتەکە خرایە بەر نەشتەری رەخنەی راسانسازی ئامادەبووانەوە.
چوارەم: ئامادەیی میدیا لەرووماڵی بابەتەکاندا تاڕادەیەک لە ئاستێکی باشدایە، تەواوی کۆڕو پرسوجۆی بابەتەکان بە شێوەی لایڤ لە ماڵپەرو پەیج و ئەکاونتەکانی چاودێر و پلاتفۆڕمی دابڕان و گەلاوێژدا دادەبەزن و رێژەی بینەرانیان جار لەدووای جار لە ئاستێکی زۆربەرزدا خۆی دەبینێتەوە.