کۆمەڵی دادگەری.. لەئیسلامیەكی شەریعەتییەوە بۆ ئیسلامیەکی مەبەستگەرایی

ڕاپۆرت 21/02/2021

چاودێر- سەرکۆ جەمال:

لە كۆنگرەی چواری كۆمەڵی ئیسلامی كوردستان دوو گۆڕانكاری ڕوویاندا، ئەوانیش گۆڕینی ناوی ئەمیری كۆمەڵ و ناوی حزبەكەبوو، وتەبێژی كۆنگرەی كۆمەڵ دەڵێت: گۆڕینی ناوی كۆمەڵی ئیسلامی لەسەر پێشنیازی عەلی باپیر بووە، نوسەرێك ئاماژە بەوەدەكات "گفتوگۆی لێكردنەوەی پاشگری ئیسلامی لەناو ئیسلامیيەكاندا دەمێكە هەیە"، مامۆستایەكی زانكۆش پێی وایە "ئەوان كاریگەریی رەوتی ئیسلامگەرای توركی، بەتایبەت دادوگەشەپێدانیان لەسەر دیارە، بۆیە ئاساییە ئەم پارتە پەنابەرێتە بەر پەیامی پۆپۆلیستانە لەنێوخودی ئەندامانی خۆیاندا".

وتەبێژی كۆنگرەی كۆمەڵ:" پاشگری ئیسلامی بۆ كاتێكی دیاریكراو بووە"
پەیوەند عومەر، وتەبێژی كۆنگرەی "كۆمەڵی دادگەری كوردستان-عێراق"، لە لێدوانێكدا بە دابڕانی وت: "دوای لێكۆڵینەوە و تێڕامانێكی زۆر بەتایبەت لەلایەن كەسی یەكەمی كۆمەڵی ئیسلامییەوە، كە ئێستا سەرۆكی كۆمەڵی دادگەری كوردستانە، بەجۆرێك لە جۆرەكان ئەوە خەمڵیبوو كە پێویستە كۆمەڵی ئیسلامی هەم ناوەكەی، هەم ناوی كەسی یەكەمیش لە ئەميرەوە بۆ (سەرۆك) بگۆڕدرێت".
وتەبێژی كۆنگرەی چوارى كۆمەڵی دادگەری كوردستان-عێراق وتیشی "چیتر كۆمەڵی ئیسلامی بڕوای بەوە نەمابوو كە تەنها بۆ چینێكی جیاواز و لە چوارچێوەیەكی دیاریكراودا حزبایەتی بكات، ئەو حزبە بڕوای بەوە هەیە كە باوەشی گەورە بێت و لە بازنەیەكی داخراودا نەمێنێتەوە و سیاسەت بكات، دەیەوێت هێزێكی كوردستانی بێت".
وەك پەیوەند عومەر دەڵێت "پاشگری ئیسلامی بۆ كاتێكی دیاریكراو بووە، لە هەشتاكاندا بڕوای ئەوە هەبووە كە پێویستە دیدی ئیسلامیانە بەهێز ببێتەوە، ئێستا كە دەبینین بزاوتی ئیسلامی بەهێزە، كۆمەڵی ئیسلامی دەیەوێت چیدیكە ئایدۆلۆژيیانە كارنەكات، بەڵام هەندێك پێیان وایە كە پاشگری ئیسلامی لێكرایەوە واز لە مەبدەئە ئیسلامیەكان دەهێنین، ئەوە بەهیچ شێوەیەك گۆڕانكاری بەسەردا نایەت، خودا بە پێغەمبەرەكەی فەرمووە كە دەمانەوێت رەحمەت بیت بۆ هەموو جیهان، خەڵكی كوردستان هەمووی موسوڵمانە چیتر ئەو تایتڵە ئایدۆلۆژییە خزمەت بە سیاسەتی كۆمەڵی ئیسلامی ناكات".
لە بارەى دروستبوونی ئەو ناڕەزاییانەی بەهۆی لێكردنەوەی پاشگری ئیسلامی لە كۆمەڵ دروستبوون، وتەبێژی كۆنگرەی چوارى كۆمەڵ ئەوەی خستەڕوو "ئەو ناو گۆڕینە لەسەر پێشنیازی مامۆستا عەلی باپیر بووە و زۆرینەی ئەندامانی كۆنگرە دەنگیان پێداوە، پێشنیازەكانیش بەمشێوەیە بوون: یەكەم، ناوی كۆمەڵ وەك خۆی بمێنێتەوە، دووەم، پاشگری ئیسلامی لاببرێت، سێیەمیش ئەوەبوو كە هەر ناوەكە بە تەواوی بگۆڕدرێت، گفتوگۆی زۆر جددیش لەناو كۆنگرە دروست بوو، بەڵام لە ئەنجامدا ئەندامانی كۆنگرە بڕیار دەدەن چی دەگۆڕێت و چی دەمێنێتەوە".

مامۆستایەكی زانكۆ:" لێكردنەوەی پاشگری ئیسلامی بابەتێكی كلاسیكیی ئیسلامییەكانە"
ماجید خەلیل، مامۆستای زانكۆ، سەبارەت بەو پرسە لە لێدوانێكدا بۆ دابڕان وتی "لێكردنەوەی پاشگری ئیسلامی بابەتێكی كلاسیكیی كەلتوری سیاسیی ئیسلامییەكانە، ئەمڕۆ بە دەگمەن لەجیهانی ئیسلامیدا پارتە ئیسلامییەكان ناونیشانی ئیسلامیی بەناویانەوە هەیە، بۆیە كۆمەڵیش لەبەر ئەوەی لە ژینگەیەكی پۆپۆلیستیدا دروست بوو، دروستبوونی ناكۆكییەكی سیاسی بوو نەك پێویستییەكی سیاسی. شتێكی چاوەڕوانكراوبوو كە زووتر لە یەكگرتوو یادیكەوێتەوە ئەم ئیسلامییە لابەرێت". 
وەك ئەو مامۆستایەی زانكۆ دەڵێت "ئەوان كاریگەریی فرەی رەوتی ئیسلامگەرای توركی، بەتایبەت دادوگەشتپێدانیان لەسەر دیارە، بۆیە ئاساییە ئەم پارتە پەنابەرێتە بەر پەیامی پۆپۆلیستانە لەنێوخودی ئەندامانی خۆیاندا".

نوسەرێك: "كۆمەڵی ئیسلامی لەم كۆنگرەیەدا لەڕووی رەمزییەوە دوو شتی گرنگی كردووە"
بەهمەن تاهیر، نوسەر و شارەزا لەكاروباری ئیسلامی سیاسی، لە لێدوانێكدا بە دابڕانی وت "لە ڕاستیدا گفتوگۆی لێكردنەوەی پاشگری ئیسلامی لەناو ئیسلامیەكاندا دەمێكە هەیە، پێشتر چاوەڕوان دەكرا كە یەكگرتووی ئیسلامی ئەم كارە بكات، بەڵام نەیكرد، كۆمەڵی ئیسلامی توانی پێشبكەوێت، كۆمەڵی ئیسلامی لەم كۆنگرەیەدا لەڕووی رەمزییەوە دوو شتی گرنگی كردووە، چاوەڕوان دەكرێت لەناو ئەو حزبەدا گۆڕانكاری ديكە بكرێت، یەكێكیان ئەوەیە كە وشەی ئەمیری گۆڕیوە بە سەرۆك، ئەمیر مەفهومێكی ئاینییە، بەڵام سەرۆك مەفهومێكی دنیایی هەیە، وشەی دادگەریشی لە جێگەی ئیسلامی داناوە، كە وشەیەكی زەقە و بەرامبەر خودی وشەی ئیسلامیەت دەوەستێتەوە".
وەك بەهمەن تاهیر دەڵێت "ئەو گۆڕانكارییە بێگومان لەگۆڕانكارییەكی جیهانبینیيەوە ڕوویداوە، بابەتەكە تەنها ئەوە نییە كە تەكتیكێكە و ئەو حزبە جێبەجێی دەكات، بەڵكو لە ئایدۆلۆژیای ئەو حزبەدا گۆڕانكاریی ڕوویداوە، لە ئیسلامییەكی شەریعەتییەوە گۆڕاون بۆ ئیسلامێكی مەبەستگەرایی".

مێژووی گۆڕانكاری لە حزبە ئیسلامیەكاندا
 مێژووی گۆڕانكاری لەناوی حزبە ئیسلامیەكاندا لە جیهان شتێكی نوێ نییە،  بۆ نمونە پێشتر بزوتنەوەی نەهزەی تونس لە كۆنگرەی ساڵی ١٩٨٩ ناوی حزبەكەیان لە كۆمەڵی ئیسلامییەوە گۆڕی بۆ بزوتنەوەی نەهزە و پاشگری ئیسلامییەكەیان لێكردەوە، لە كۆنگرەی ساڵی ٢٠١٦ دا، ناسنامەی حزبەكەیان لە بزوتنەوەیەكی ئیسلامییەوە گۆڕی بۆ بزوتنەوەیەكی سیاسیی مەدەنی و دیموكراتی، راشد غەنوشی سەرۆكی بزوتنەوەكە ڕایگەیاند، ئایین زیانی پێ دەگات گەر بلكێنرێت بە حزبێكی دیاریكراوەوە، ئاماژەی بەوەشكرد لەمەودوا حزبەكەی خۆی یەكلایی دەكاتەوە بۆ كاری سیاسی و چاكسازیی، بەو كارەش جیاكاری دەكەین لە نێوان سیاسەت و بانگخوازییدا.

رۆژی  پێنجشەممە 18/2/2021 بە ئامادەبوونی 900 ئەندام، كۆمەڵی ئیسلامیی كوردستان كۆنگرەی چوارەمی خۆی لە سلێمانی دەستپێكرد و دوو رۆژی خایاند.
كۆمەڵی ئیسلامی پارتێكی ئیسلامیە كە لە هەناوی ناكۆكیە قوڵەكانی بزووتنەوەی ئیسلامیەوە لە دایكبووە، لە رووی مەنهەجەوە ئەهلی سونە و جەماعەن، وەك خۆیان دەڵێن سیاسەتیان ئەوەیە برایەتی و هاوكاريیان لەگەڵ سەرجەم گروپە ئیسلامیەكان هەبێت، كۆمەڵی ئيسلامی بەسەرۆكايەتی لە 31/5/2001 لە بزوتنەوەی یەكبونی ئیسلامی جیابوەوە كە پێشتر ئەويش لەدەرئەنجامی لەتبونی بزوتنەوەی ئیسلامی جیابوبوەوە.