"دواهەمین هەناری دونیا"ی بەختیار عەلی بە عەرەبی بڵاو دەکرێتەوە
ڕەخنەی چاودێر
ڕۆمانی "دواهەمین
هەناری دونیا"ی بەختیار عەلی لە لایەن وەرگێڕێکی بەغداییەوە لە زمانی
فارسییەوە کراوە بە عەرەبی و بڕیار وایە لە ماوەی دوو هەفتەی داهاتوودا لە لایەن چاپخانەیەکی کوەیتییەوە بچێتە
چاپەوە و دواتریش بڵاو بکرێتەوە.
مەریوان هەڵەبجەیی، وەرگێڕی
دیاری کورد کە بۆ زمانی فارسی و بە پێچەوانەوە وەرگێڕان دەکات و بەشێکی بەرچاوی
بەرهەمەکانی بەختیار عەلی و نووسەرانی تری کوردی کردووە بە فارسی، بە "ڕەخنەی
چاودێر"ی ڕاگەیاند، ئەو کارە لە سەرەتای بەهاری ساڵی ڕابردووەوە قسەی لێ
کراوە و ئێستاش کارەکانی تەواو بووە و تەنها چاپکردنی ماوە.
وەرگێڕی ڕۆمانەکە غەسان
حەمدانی بەغداییە و ڕۆمانەکەی لە فارسییەوە وەرگێڕاوەتە سەر زمانی عەرەبی. غەسان حەمدانی، وەرگێڕێکی دیاری عەرەبییە و زیاتر لە بیست کتێبی لە فارسییەوە کردووە بە عەرەبی و نزیکەی دە کتێبیشی لە عەرەبییەوە کردووە بە فارسی. ئەو وەرگێڕە کۆبەرهەمی سادقی هیدایەت، سوهرابی سپهری و خیامی کردووە بە عەرەبی و هەڵبژاردەی لە شیعرەکانی ئەحمەدی شاملو، فروغی فروخزاد و چەندان نووسەری تری فارسی وەرگێڕاوەتە سەر زمانی عەرەبی.
هەڵەبجەیی وتیشی: "٢٥
ساڵە کاک بەختیار عەلی دەنووسێت و جیهانگیریترین نووسەری ئێمە بووە لە باشوور،
بەڵام وەرگێڕێک نەهاتووە لە زمانی کوردییەوە بیکات بە عەرەبی، جا بە هەر هۆکارێکی
سیاسی و ئایدیۆلۆژی بێت یان هۆکاری تەکنیکی کە وەرگێڕێکمان نەبووە بتوانێت
وەرگێڕان بکات بۆ زمانی عەرەبی، دیارە ڕیشەکە کۆنترە و لە ئیبراهیم ئەحمەدەوە ئێمە
ڕۆمانمان بە عەرەبی و لە چاپخانە و بڵاوکراوەیەکی گرنگی عەرەبی بڵاو نەکراوەتەوە و
کاریگەری و دەنگدانەوەی هەبێت، ئەمەش کێشە و پرسیاری گەورەیە کە سەدان ساڵە لەگەڵ
نەتەوەیەکدا دەژین و دەبووایە ئێستا هێندە وەرگێڕمان هەبووایە کۆمەڵە کتێبێکمان
هەبێت بە زمانی عەرەبی."
"دواهەمین هەناری
دونیا"ی بەختیار عەلی جگە لە زمانی فارسی، کە مەریوان هەڵەبجەیی وەریگێڕاوە،
بۆ زمانەکانی ئەڵمانی، ئیتاڵی وەرگێڕدراوە و بڕیارە وایە بە زمانی فەڕەنسیش بڵاو
بکرێتەوە و دەنگدانەوەی باشیان هەبووە.
"جێگەی نیگەرانییە بە
ئەڵمانی و فارسی و ئیتاڵی و چەند زمانێکی تر ڕۆمانەکانی کاک بەختیار هەبن، بەڵام
بە عەرەبی نەبێت کە ٢٣ وڵاتن و خۆشمان لە وڵاتێکداین ئەکسەرییەتی عەرەبە."
مەریوان هەڵەبجەیی وای وت.
ساڵی پار، بەختیار عەلی لە
بەرامبەر وەرگێڕان و دەنگدانەوەی هەر دوو ڕۆمانی "دواهەمین هەناری
دونیا" و "شاری مۆسیقارە سپییەکان" خەڵاتی نیلی زاکسی لە ئەڵمانیا
وەرگرت.
ئەو وەرگێڕە وتیشی:
"غەسان حەمدان وەرگێڕانە فارسییەکەی منی بە دڵ بوو، کاک بەختیاریش بینیویەتی
و بە ڕەزامەندیی کاک بەختیار کراوە، ئەو بەشانەی کە لە فارسییەکەشدا سانسۆر کراوە
من هەموویم خستووەتەوە بەردەم ئەو وەرگێڕە و لەم ماوەیەشدا دێتە سلێمانی کە
وەرگێڕێکی زۆر باشی بەغداییە و دەیەوێت سەرجەمی کارەکانی کاک بەختیار بکات بە
عەرەبی."