کوردستان

رێگری لەتیمێكی تەندروستی كرا سەردانی مەرزێكی هەرێم بكەن

پێش 2 هەفتە

چاودێر
نەخۆشخانەی گشتیی پێنجوێن ئاشكرایكرد لەدەروازەی باشماخ ڕێگری لە تیمەكانی بەرەنگاربوونەوەی پەتای كۆرۆنا كراوە.
لەوبارەیەوە، د.خالید عەبدوڵا، بەڕێوەبەری نەخۆشخانەی گشتی شەهیدانی پێنجوێن، بەچاودێری راگەیاند: تیمەكانی تەندروستی سەر بە نەخۆشخانەی گشتیی پێنجوێن، كە پێكهاتبوون لەسێ تیمی تایبەت و هەر تیمێك بە سەرپەرشتی پزیشكێكی پسپۆڕ سەردانی دەروازەی باشماخمان كرد، بۆ توندوتۆڵكردنی رێكارەكانی تەندروستی و كەمكردنەوەی بەركەوتن تا نزمترین ئاست و داخستنی ئەو بەشانەی قەرەباڵغی زۆر دروست دەكەن و كەمكردنەوەی ژمارەی ئەو كارمەندانەی كە دەوامیان زەرور نییە و لێپیچنەوە لەهەموو ئەو شۆفێر و خواردنگانەی پابەند نین بە رێنمایییە تەندروستییەكانەوە.
ناوبراو كە هاوكات و سەرۆكی بۆردی تیمەكانی بەرەنگاربوونەوەی پەتای كۆرۆنا لە سنووری پێنجوێنیشە، وتی " هەروەها رێگریكردن لەو ئۆتۆمبیلانەی لەبەردەم دەروازە بە نایاسایی شۆفێری ئێرانی دەهێننە ناو پێنجوێن، بەڵام بەداخەوە لەدەروازەی باشماخ بۆ ماوەی زیاتر لە ٢٠ خولەك ڕێگەمان پێ نەدرا بچینە ژوورەوە و پێیانڕاگەیاندین كە تەنیا ڕێگە بە بەڕێوەبەری تەندروستی و دوو كەسی دیكە دەدرێت ".
روونیشیكردەوە،" تیمەكە نزیكەی ١٥ كەس بووین و سەرجەممان كەسانی تەندروستی بووین و باجمان پێ بووە ".
ئاشكراشیكرد: لێپرسراوی دەروازە بە فەرمی ئاگاداركراوەتەوە لەپلان و ژمارە و كاتی سەردانی تیمەكان و بەهیچ شێوەیەك مافی ئەوەی نییە ژمارەی تیم دیاری بكات و دەست لە كاری تیمەكان وەربدات و بە مەزاجی تایبەتی كاربكات لەم كات و ساتە هەستیارەدا، لە كاتێكدا ڕۆژانە چەندان هاووڵاتی ئاسایی بەناو دەروازەی مەرزی باشماخدا دێن و دەچن و هەندێكیشیان هیچ باجێكیان نیيە.