ئەوین دوای پەنجا

کوردستان پێش 2 هەفتە


پشتیوان ئەحمەد 

ئەوین دوای پەنجا، ناوونیشانی كتێبێكی فەوزییە دریعە (( الحب بعد الخمسین – الدكتورە فوزیە الدریع )) فەوزییە دكتۆرای لەزانستی دەروونی سێكسی هەیە.. موتوربەكراوە بە زەخیرەیەكی مەعریفی هەمەچەشن.
فەوزییە لەم كتێبەیدا، باسی باری دەروونی و سێكسی پیاو دەكات پاش تێپەڕبوونی پەنجا ساڵ لەتەمەنی، بەواتایەكی دیكە پاش تێپەڕبوونی دوو لەسەر سێی تەمەنی، گەر ڕێژەی تەمەنی مرۆڤ بە (75) حەفتاو پێنج ساڵ دابنێین، ئیدی پیاو لەم تەمەنە بەدواوە هێدی هێدی غوددەی پرۆستاتی گەورە دەبێت‌و، لەڕووی جەستەییشەوە پوكانەوە دەست پێ دەكات و، توانای سێكسیشی خۆی لەكەمی دەدات.. پیاوە دەردەدارەكە، هەست دەكات تەمەنی بەفیڕۆ چووە.. ئەوەی خاوەن ژن‌و مناڵە، ئەمانە بە بار بەسەریدا دەزانێت‌و، هۆكاری ئەوە بوونە، ئەم نەتوانێ‌ چێژ لەخۆشیەكانی ژیان وەربگرێت.. لەسەرووی ئەم تەمەنەدا، بەشبەحاڵی ئەو جۆرە پیاوانە، خۆشیەكانی ژیان واتای مێ بازی‌و، فرەژنی دەگەیەنێت. 
لەكاتێكدا، پیاو دوای پەنجا ساڵ، لەڕووی فیكریی و زانستیەوە، تواناكانی كەم دەبێت، ئەو دێت وا خۆی پیشان دەدات كە نێرێكی تەواوەو، بەچەند ژنێك تێر نابێت‌و، بۆ شاردنەوەی كەمی وزەی جنسیی، پەنا دەباتە بەر جۆرەها دەرمانی ئاكتیڤكەر لەوانە ڤیاگرا.. بۆئەوەی وەكو گەنج دەربكەوێت، سەری بەكاملی بۆیاغ دەكات، بەبێ‌ ڕەچاوكردنی زەوق‌و، بوونی سەلیقە. 
زاهیرەن وەكو گەنجە بەڵام لەناخەوە وێرانە.. دەروونی ناسەقامگیرە.. لەپەیوەندی دڵداریدا كەم سەبری ‌و كەم تەحەممولی پێوە دیارە.. 
لەبەدواداچونی ژنێك خۆی ماندو دەكات هەر كە كەوتە داوییەوە، ئیدی بەدوای بیانو دەگەڕێت بەمەبەستی بەجێ‌ هێشتنی و، گەڕان بەدوای نێچیرێكی دیكە.

حیكمەت لەئەسپێ‌ وەرناگرێت‌و، لاسایی كیچ دەكاتەوەو لەپەیوەندی ((دڵداریدا)) پشودرێژ نییە.
ئەحلام موستەغانمی لەكتێبی ( coom.نسیان) كە تایبەتە بەژن‌و، لەسەر بەرگەكەی نووسراوە (نابێت پیاو بیخوێنێتەوە) هێرشێكی بەربڵاو دەكاتە سەر پیاو، بەتایبەتی ئەوانەی تەمەنیان سەرو پەنجا ساڵە.. بەناپاك و بێ‌ وەفا وەسفیان دەكات، ئەحلام باسی ئازارو موعاناتی رۆژانەی ژنانی هاوڕێی دەكات كە بەدەست ئەم جۆرە پیاوانەوە هەیانە.
ئەحلام.. ڕێنمایی ژنان دەكات، كە دەبێت لە تەعامولكردنیان لەگەڵ ئەو جۆرە پیاوانە زۆر وریابن، لەهەمان كاتدا ڕووی دەمی دەكاتە ژنانی ئەو پیاوانەی تەمەنیان سەروو پەنجا ساڵەو، پێیان دەڵێت: 

دەست بەپیاوەكانتانەوە بگرن.. نازیان بكێشن، حەز لەچ عەترێك دەكەن ئەو عەترە لەخۆتان بدەن، گەر مێردەكانتان نوێژكەرن ئێوە ببنە بەرماڵیان، بیانو بازن، بیانو بەدەستیانەوە مەدەن‌و، پەڵپ و داواكاریەكانیان بەزیادەوە جێبەجێ‌ بكەن. 
من دەتوانم بڵێم، ئەم كتێبەی ئەحلام ڕاڤەكردنی كتێبەكەی فەوزییە دریعە یان درێژە پێدەرێتی بەڵام بەشێوازێكی دیكە. 
دڵنیام ئەحلام بەوردی كتێبەكەی فەوزییەی خوێندۆتەوەو سودی لێ‌ بینیوە بەڵام بەهیچ شێوەیەك ئاماژەی پێ‌ ناكات.

ئەحلام لەڕۆمانی ڕەش لێت دێت (اڵاسود یلیق بك) هەمدیس لەچواردەوری هەمان بابەت دەخوولێتنەوە، كارەكتەری سەرەكی ڕۆمانەكە پیاوێكی دەوڵەمەندە، تەمەنی سەرو پەنجا ساڵە، سەری كامل بۆیاغە، زۆر بەخۆیەوە ئەنازێ‌ بەڵام لەڕاستیدا متمانەی بەخۆی نییە.. وا ئەزانێت چی ژن هەیە ئەبێ‌ لەژێر حوكمی ئەو بن، ئەو پارە بەهەموو شت دەزانێ‌ و، ژن بە كاڵا، سەرەنجام نائومێد دەبێت. 

بەندە ئێستا لەسلێمانی نیشتەجێم، بەڵام چاوو دڵم لە خانەقینە.. پێش ماوەیەك بیستم پیاوێكی شەست ساڵە لەگەڵ چەند گەنجێك دەستی تێكەڵ كردووە لە كوچە باخەكان سەرقاڵی مێ‌ بازییەو، ناوی زڕاوەو خەڵكیش پێیان سەیرە.. پیاوێك لە سی ساڵی.. چل ساڵی هیچ ڕەفتارێكی نەشیاوی نەبوە، خێرە ئێستا كێچ كەوتۆتە كەوڵی‌و بەیەك ژن‌و دووژن تێر نابێت؟! 
من هاتم نوسخەیەك لە كتێبەكەی فەوزییە دریعم بۆی ناردو، لەسەری نووسیم بەهیوام بەوردی بیخوێنیتەوە و سوودی لێ‌ ببینیت. 
دیارە ئەم دیاردەیە پتر لەنێو ڕیزی چینی مامناوەندی و باڵا دەردەكەوێت، ئەوانەی باری گوزەرانیان تا ڕادەیەك باشە، زیاتریش لەنێو ئەو توێژانەیە كە كاری زهنی دەكەن، مامۆستاكانی زانكۆو، دكتۆرەكانی عیادەكان‌و، بەرپرسە حزبی‌و پەرلەمانتارو، وەزیرەكان گرفتەكە هەیە، سەدان مامۆستای زانكۆ، ئەوانهەی تەمەنیان سەرو پەنجا ساڵە، لەگەڵ خوێندكارە كچەكان سەرقاڵی مێ‌ بازی‌و گێچەڵكردنن پێیان. 

مامۆستایەكی زانكۆ ئەناسم، جارێك پێی وتم: 

تازە، كچە خوێندكارێكم كردوە بەكەپڵی خۆم، پرسیاری لێكردم، دكتۆر لەنێو كەپڵەكانت من نمرە چەندم؟ وتم: بیست 

باشە، باوكان و دایكان، مناڵەكانیان بۆ زانكۆو، پەیمانگەكان دەنێرن، بۆئەوەی فێری زانست و مەعریفەت بن یاخود لادانی سێكسی؟

دەبێ‌ مامۆستایانی زانكۆ، ئەوانەی تەمەنیان سەرو پەنجا ساڵەو، خاوەن خێزانن لەلایەن حكومەت‌و دەزگاكانی كۆمەڵی مەدەنییەوە بخرێنە ژێر چاودێرییەوە، دكتۆرەكانی نەخۆشخانەو، عیادەكان بەهەمان شێوە. 





چارەسەر چییە؟ 

بەدڵنیاییەوە چارەسەر هەیە، ئەویش پەیڕەوكردن‌و پڕاكتیزەكردنی یۆگایە لەژێر سەرپەرشتی مامۆستا‌و ڕاهێنەری شارەزا، لەسلێمانی بۆ نموونە یۆگای هەناسەو، مامۆستا محمود شێرزاد هەیە.. 

یۆگا، وات لێ دەكات باڵانس لەنێوان جەستەو دەروونت ڕابگریت.. 
جارێ‌ پێش دەسپێك دەبێ‌ دەسبەرداری گۆشت خواردن و كحول خواردنەوە و جگەرەكێشان ببیت، هەر كە دەسبەرداری ئەم خواردن‌و خواردنەوانە بوویت یەكسەر كۆمەڵێك نەخۆشی جەستەیی و دەروونی لەكۆڵت دەبنەوە لەوانە ئەم دەردە دەروونیە كە لەسەری دەدوێین.. ڕاهێنانەكانی یۆگا، جەستەیەكی ئارامت پێ‌ دەبەخشن، جەستەیەكی ئارامیش دەروونێكی ئارامت پێ‌ دەبەخشێت.. هەر كە مرۆڤ بو بەخاوەن جەستەیەك و دەروونێكی ئارام، ئیدی دەتوانین بڵێین ئەو مرۆڤە خۆی دۆزیوەتەوەو، خۆی دەناسێت.. 
دیارە تێڕوانینی یۆگا بۆ تەمەنی مرۆڤ جیاوازەو پۆلێن كراوە.. 

تەمەنی مرۆڤ سەدوو پەنجا ساڵە. پەنجا ساڵی یەكەم سەرقاڵی فێربوون‌و دابینكردنی پێداویستیەكانی ژیانە، لە پەنجا ساڵی دەچێتە خەڵوەتەوە تاكو حەفتاو پێنج ساڵی.. 
لە حەفتاو پێنج ساڵی لەخەڵوەت دێتە دەرەوەو وەكو چاكەخوازێك چاكە بڵاودەكاتەوە.

لەكۆتاییدا ئەوە دەڵێم.. ئەوەی من ئاگادار بم دوو ژنی نووسەرو شارەزا لەدوو بواری جیاوازدا باس‌و ڕاڤەی میحنەتی پیاویان كردوە، دوای تێپەڕبوونی پەنجا ساڵ لەتەمەن بەڵام تاكو ئێستا نەمبیستووە یاخود بەرچاوم نەكەوتووە نووسەری پیاو، پسپۆر لەبواری دەروونی و كۆمەڵایەتی و سێكسی باس لە بارودۆخی ژن بكەن پاش تێپەڕبوونی دوو لەسەر سێی تەمەنیان ئەوان وەزعیان چۆن چۆنی دەبێت.. چاوەڕوانین.
دیارە ئەم بیرۆكەیەی دەری دەبڕین ڕەها نیە بەڵكە ڕێژەییە بەڵام وەكو دیاردە هەیە.