وەڵامێكی وەڵامەكەی عەلی حەمەساڵح
سەردار حسێن-ستۆكهۆڵم
كاك عەلی حەمەساڵح لە كۆمێنتێكدا، لە وەڵامی وتاری (دەمەتەقەیەكی ئەقڵانی لەگەڵ عەلی حەمەساڵح) كۆمێنتێكی درێژی نوسیووەو پەیجی چاودێریش كارێكی باشی كردووە وەكو خۆی بڵاویكردۆتەوەو سانسۆری نەكردووە.
كۆمێنتەكە خۆڵ و دۆ تێكەڵاو دەكات. ناچارین وەڵامی یەك دوو ڕستە چەواشەخواریەكەی بدەینەوە. عەلی دەڵێ:
هەركاتێك بەرگری لە مبادئی ئاینی‌و بەهای كۆمەڵایەتی بكەین.. میدیاكەی مەلا بەختیار پەلامارمان دەدات!
جارێ.. كێ جەنابتی كردۆتە پارێزەری ئایینی پیرۆزی ئیسلام هەتا وای پیشان بدەیت بەردەوام بەرگری لە ئیسلام دەكەیت‌و گوایە پەیجی بەڕێز مەلا بەختیاریش بەردەوام پەلامارت دەدەن؟
ئایین.. ئایینی خودایەو مافی هەموو تاكێكە. پێغەمبەریش نەیفەرمووە ئاینەكە تاپۆی منە. بەڵكو پێغەمبەر باوەڕی بەو ئایەتەیە كە دەقاودەق دەڵێ: تەبشیری ئەو عەبدانەم دەكەم گوێ لە هەموو قەولێك دەگرن‌و دوای باشەكەی دەكەوون.
باشە.. مەعقولە عەلی حەمەساڵح كە لەچاو زاناكانی ئیسلامی نەخوێنەوارە، باشتر لەو ئایەتە تێگەیشتبێ؟
پاشان.. چۆن "چاودێر" وتاری هەموو كەسێك بە كاك عەلیشەوە بڵاودەكاتەوە هی (ئازاد عەلی)یشی بڵاوكردۆتەوە. ئەگەر عەلی نیخاو نیخ ناخی پڕ نییە لە كۆنەقینی سیاسی‌و ڕقی مەزهەبی‌و هاندراوی لایەنێك نییە بۆچی لە كۆمێنتەكەیدا باسی مەلا بەختیار دەكات.
لە بەشێكی تردا دەنوسێ: من باسی گەندەڵی‌و دزی‌و نادادیم كردبێ ژێرەكەی ستەمكاری‌و قاچاخی داگیركاری حیزبەكەی كاك بەختیارم كردووە.
جارێ (ئازاد عەلی) لە وتارەكەدا پشتیوانی قسەكانی عەلی لەسەر گەندەڵی كردووەو سەلماندویەتی. عەلی لەمەشیاندا بێویژدانی كردووە ویستویەتی مەلا بەختیاریش وەكو باقی بەرپرسەكان لەگەندەڵیەوە بگلێنێ. پاشان ئایا عەلی چ گلەییەكی لەسەر هەڵوێستەكانی مەلا بەختیار لەسەر گەندەڵی هەیە. هەرچی عەلی فەرمویەتی بەقەد ئەوەی نەوتووە كە مەلا بەختیار بە دزەكانی وتووە (لەنەوتەوە بۆ جەوت دەدزن) قەتیش لەوە زیاتری نەوتووە كە مەلا بەختیار وتویەتی (پارەی ژێرزەمینەكانتان دەربكەن‌و موچەی خەڵك بدەن). عەلی دەیەوێ خۆی بە پێشەنگی دژایەتی گەندەڵی بزانێ‌‌و هەوڵەكانی تر، تەنانەت لەناو بزوتنەوەی گۆڕانیش نادیدە بگرێ. بۆ؟
چونكە عەلی ئەگەر لاف لێدانی دژایەتی گەندەڵی لێ بسەندرێتەوە لەسیاسەتدا وەكو گاڵتەجاڕ باسی دەكرێ. ئێستاش دەزانێ بزوتنەوەی گۆڕان باری خوارەو عەلیشیان قبوڵ نییە. بۆ هەڵبژاردنی ئایندە بایداوەتەوە لای ئیسلام. بەڵكو خۆیشی كردووە بە پارێزەری نەریت‌و شمشێر لە ژنانیش هەڵدەكێشێ بەناوی دژایەتی جێندەرەوە.
دێتە سەر مەلا بەختیارو دەڵێ: پرسیاری سودەكانی ڕەشكە لەو بكە، یەك سەعات قسەی لەسەر دەكا.
لەم حوكمدانانەدا دەری دەخات ئەم عەلی حەمەساڵحە چەند ویژدانی لە چاڵە بەفردا سڕ سڕە. لەبەرئەوەی خۆی مێژووی خەباتی نییە، بەغیلی بەهەموو ئەو تێكۆشەرانە دەبات كە مێژوویان هەیە!
بەڕێز مەلا بەختیار (20) ساڵ بەرپرسی ڕێكخراوە دیموكراتیەكان‌و سەرۆكی ئۆڵۆمپی بووە. بایی ئەوە فێربوەو فێری كردووە بزانێ چی دەڵێ‌‌و لەسەر چی قسەدەكات. پێشنیاز بۆ عەلی دەكەین ڕاپرسیەك لەناو ڕێكخراوە دیموكراتیەكان‌و ئۆڵۆمپی كوردستان، ئینجا فیستیڤاڵی گەلاوێژ بكات.. ئەوسا ڕای ئەو ئۆرگانانە لەسەر مەلا بەختیار بە ڕاپرسی ساغ بكاتەوە. ئەم عەلیەش جگە لە فیستیڤاڵی كۆنگرە ڕۆژنامەنوسیەكان چی تر دەزانێ؟ زۆربەی ڕەخنەكانیشی لەسەر ناوچەكانی یەكێتییە.. كەمتر توخنی هەولێرو دهۆك دەكەوێ!!
مەلا بەختیار.. بیتاقەی لیستی پەرلەمانی بە جنێودان بە مام جەلال‌و یەكێتی‌و پارتی بۆ دەرنەچووەو چوبێتە پەرلەمان. مەلا بەختیار لە سیاسەتدا وەكو قارچك هەڵنەتۆقیووەو كوردستان ئەنفال كرابێ.. دێهات ڕاگوێزرابێ.. كیمیابارانی كوردستان كرابێ.. تەماشای دیمەنە كارەساتاویەكانی كردبێ. لەناو ژانی ڕوداوەكان‌و ململانێكان‌و شەڕەكان‌و هەڵوێستەكاندا، مەلا بەختیار پێگەیشتووە. نەك وەكو عەلی نە ڕەگی مێژوویی هەیەو نە ئێستاش سەنگین سەنگین سیاسەت دەكات. تەنانەت لەناو بزوتنەوەی گۆڕانیشدا هەڵبەزو دابەزێتی!!
سەبارەت بە ناوی پیرۆزی (محەمەد)یش..
لێرەدا شەرمەزاری تۆمەت هەڵبەستن دەگاتە لوتكە. هەركەسێك گوێی لە قسەكانی بەڕێز مەلا بەختیار بوبێ، دەزانێ كوت‌و مت وتویەتی: بە محەمەد، ناوی محەمەد لە مناڵەكەت دەگۆڕی.
سوێنی بە ناوی پێغەمبەر خواردووە. نەك ناوی پێغەمببەری ڕەتكردبێتەوە. سوێندخواردن یانی باوەڕبون.
پاشان بۆچونی مەلا بەختیار لەكۆنەوە لەسەر تەعریب ڕوونە كە وتویەتی: تەعریب لە فتوحاتی ئیسلامیەوە دەستیپێكردووە. (من خۆم كەسێكی چەپم‌و دەزانم لە ڕۆژنامەی حیزبی شیوعیدا مەلا بەختیار لەسەردەمی فتوحاتەوە باسی تەعریب دەكات) ناوی عەرەبی سەپاندنیش بەسەر ناوی كوردیدا بەشێكە لە تەعریب. هەتا سەدەی ڕابوردوش لەناو زۆربەی خەڵكدا وا باو بووە ئەگەر مناڵیان ببێ ناوێك لە قورئان‌و حەدیسدا نەبێ، گوناحە مناڵەكانیان ناو بنێن. دەی ئەم تێگەیاندنە سەقەتە ملیۆنەها ناوی عەرەبی هێناوەتە ناو زمانی كوردی. كۆماری مەهابادو شۆڕشی ئەیلول‌و شۆڕشی نوێ نەبوایە ناوە كوردیەكان هەر لەبیر دەچوون!
خوا كوردیشی وەكو نەژادو زمان‌و نەتەوەیەكی جیاواز دروستكردووە، زمانی كوردی‌و ناوی كوردی بەشێكە لە شوناسی نەتەوایەتی. ئەگەر هەموو جۆرە قسەكردنێك لەسەر ناوی محەمەد حەرام بێ، خۆ نیوەی كورد بە مەحەمەد دەڵێن (حەمە!) حەمە لەكوێ‌‌و محەمەد لەكوێ؟ حەمە كورداندنی ناوی محەمەدە. باوكی عەلیش ناوی (حەمەساڵح)ە.
وەكوتر لە عەلی حەمەساڵح دەپرسین. لە (10 بۆ 20 ملیۆن) عەرەب بەدەگمەن ناوێكی كوردی دەنرێ. بۆچی شۆڤێنیەتی عەرەبی هەر لەبەرئەوەی پێغەمبەر عەرەبە، عەلی قبوڵێتی؟ ئەی بۆچی بەرگریكردن لە زمان‌و ناوی كوردی قبوڵ نییە؟
ئەوە دەزانین ناوی (عەلی) عەلییەو خۆیشی سوننەیەو ناوەكەی عەرەبیشە (خوا دەزانێ چی تریشە). ئەی بۆ باوكت ناوی (محەمەد)ی لێ نەناوی؟ سەیرتر ئەوەیە خۆی ناوی مناڵەكانی كوردین‌و هیچیان ناوی مەحەمەدیان لێ نەنراوە. ئەم كەسایەتیانە لەناو بەرداشێكدان دەرونیان جۆرێكەو بەرژەوەندیان جۆرێكی ترەو زمان‌و قسەشیان جۆراوجۆرە!! گەورەترین كێشەی مرۆڤی سیاسی.. نەخوازەڵڵا پەرلەمانتار ئەوەیە كە تێ نەگەیشتبێ لە چ سەردەمێكدا سیاسەت دەكات. ئایا عەلی ئاگادارە جێنشینی شای سعودیە چ چاكسازیەكی دەستداوەتێ..؟ ئایا ئاگادارە ئیماراتی عەرەبی.. پێچەوانەی ڕێساو شەریعەت مافە مەدەنیەكانی بۆ ژنان گێڕاوەتەوە؟ بۆ سعودیەو ئیمارات وا دەكەن.. چونكە سەردەمەكەیان باش خوێندۆتەوە. ئەی بۆ ئەفغانستان ژنان دەخاتەوە زیندانی ماڵ..؟ چونكە وەكو عەلی حەمەساڵح بیر لە سەردەمەكە دەكەنەوە.
هەرچەند ئەقڵیەت‌و تێگەیشتنی دەخوێنینەوە، تەعریبەكەی لە كوردایەتیەكەی بەهێزترە. نازانێ كوردێك كولتوری تەعریب لەناو نەتەوەكەی بەكاربهێنێ، مەترسیدارترە لە عەرەبێكی شۆڤێنی. تەعریب تاوانە.. بە پەردەی ئایین داناپۆشۆرێ كاكە عەلی حەمەساڵح!!