(ژیان جوانتر دەبوو ..تۆ لێرە بوویتایە !)

رۆشنبیری 15/11/2022

 

 

جەمال غەمبار

بەلای گوندێکدا تێپەڕیم : 
ژنێک لەبەر پەنجەرەیەک 
گۆرانیی دەوت .
منداڵێک لە کەناری گۆمێکدا 
چاوەڕێی کیسەڵێکی دەکرد 
لە ئاوەکە بێتە دەرێ !
بەیانی زوو بوو 
کە بەلای ئەو گوندە تێپەڕیم ! 
حەزم دەکرد تۆش لەوێ بیت 
بۆ ئەوەی بە ئینگلیزی 
پێت بڵێم ؛  I miss you so much
بە کوردی و بە کورتی واتا 
 زۆر موشتاقی تۆم ! 
دوایی لێت بپرسم ؛ 
تۆ بەیانیان 
حەزت لە دەنگی کامیانە : 
فەیروز  یان مەزهەری خالقی ؟! 
تۆش بڵێی ؛ هەردووکیان ..
ئەوجا بڵێیت ئێوارانیش
 بەدەم پێکێ شەرابی سوورەوە
حەز دەکەم شیعری مەحوی ببیستم 
بە دەنگی تۆ !
منیش نزات بۆ بکەم 
بڵێم : 
یاخوا نەمریت !
سوپاس وام لێدەکەیت
ژیان وەک سادەیی ئاو ببینم !