ژینا ئەمینی، محەمەد بوعەزیزی سەقز
كاروان عەبدوڵڵا
ئەو ڕۆژەی لە داخی پۆلیسی سەركوتگەری توونس "محەمەد بوعەزیزی"، گەنج كە لەسەر عەرەبانە دەستییەكەی شتی دەفرۆشت و سوكایەتییان پێكرد، ئاگری لە جەستەی خۆی بەردا، بەدوایدا خەڵكی تونس ڕژانە سەر شەقام و ڕق و توڕەیی چواردە ساڵەی خۆیان بەسەر پۆلیس و دەسەڵاتی ئەو وڵاتە و (زەین عابدین)دا ڕژاند و شۆڕشی هەژاران و خەڵكی ستەمدیدە و كرێكاران و زەحمەتكێشان تەرمی بوعەزیزیان خستە سەر شان و كۆتاییان بە حوكمی عابدین هێنا. مەرگێک، مەرگی بوعەزیزی، بوە داینەمۆی شۆڕشی ڕاپەڕین و بە مەرگی خۆی زۆربەی سیستمە سیاسییەكانی جیهانی عەرەبی قڵپ كردەوە، مەرگی بوعەزیزی وەچەرخانی گەورە بوو لە باكوری ئەفریقیا، دواتر پەڕییەوە بۆ میسر، یەمەن، سوریا و لیبیا و (بەهاری عەرەبی) لێكەوتەوە. دەرهاویشتە و دەرئەنجامەکانی بەهاری عەرەبی هەرچییەک بن و بەرەو هەر ئاڕاستەیەک چووبێت، لە گەورەیی قوربانیدانی بوعەزیزی و کاریگەریی هەڵوێستەکەی کەم ناکاتەوە.
كوشتنی (ژینا ئەمینی) كچە كوردی سەقزی خۆرهەڵاتیش لە لایەن پۆلیسی ئادابەوە، بە بیانووی ئەوەی جلەكانی نەشیاو بوە، پاش لێدان و سوكایەتی، پۆلیس قۆڵبەستی دەكەن و ئازار و ئەشكەنجەی دەدەن، تا سێ ڕۆژ لە بیمارستان مایەوە و دواتر گیانی سپارد، مەرگی ژیناش سەرئەنجام دەبێتە مایەی توڕەیی و نیگەرانی خەڵكی سەقز و ڕۆژهەڵات.
چ بیانوویەكی نالۆژیكی و نامۆڕاڵییە بەهۆی جل و بەرگەوە، گیان لە كەسێك بستێنی و چ زاڵمانەیە ئەم هەموو سوكایەتییە، چ سەختە، کە ئامادە بێت جەستە بکاتە قوربانیی ئەو کەرەستەیەی جەستەی پێ دادەپۆشرێت، هەرگیز ناتوانێت ئەو ڕووداوەی تێدا ڕوونەدات.
ئایا گرفتی ئینسان جل و بەرگییەتی؟ یان عەقڵ و حوكمڕانییەكەیەتی؟ خەڵكی ئێران دەیانەوێت ئازاد بژین، ئازاد جل بپۆشن، ئازاد بخۆن و بخەون، گرفتەكە ئەوەیە ئینسان داوای عەدالەت دەكات، داوای ماف و پاراستنی كەرامەت دەكات. داوای ئەوە دەكات ژن وەكو ئینسان سەیر بكرێت، كورد وەكو ئینسان سەیر بكرێت، فارس و تورك و كورد حسابی هاوڵاتییان بۆ بكرێت. بەڵام لە غیابی هەموو ئەو بێ مافی و ناعەدالەتییەدا ناچار پەنا بۆ كوشتن، زەبر و زەنگ دەبرێت بە بیانووی حیجاب. بەردەوامبوونی دەسەڵاتی سیاسیی ئێران لە سەر ئەم جۆرە کردەوانە، میکانیزمێکی ئەو دەسەڵات خۆیەتی، کە بە حیسابی خۆی دەیەوێت بەمە گرفتە سیاسی و ئازادییە تاکەکەسییەکان لە بیر خەڵک بەرێتەوە. بێئاگا لەوەی ئەمە هێندەی تر ئەو گرفتانە قووڵتر دەکاتەوە.
ئەوەی دوێنی لە سپاردنی تەرمی ژینا لە گۆڕستانی سەقز بینیمان، پێمان دەڵێت توڕەیی خەڵكی كوردستان گەیشتۆتە سەری لوتیان و بێزارن لەم ژیان و جەورە، بێزارن لەم كوشتن، كوشتار و هەژارایی و دەستتەنگیە.
بێزارن لە سوكایەتی بە ژنان و كچان، سوكایەتی بە هونەر، كلتور، زمان، ئۆلگۆ، ڕەمز و سیمبوڵەكانیان.
بێزارن لە قسەی نەوتراوی قوڕگی قوفڵدراوی بێ ئازادییان و خەریكە دەخنكێن.
بێزارن لە نەبوونی سفرەیەكی شایستەی ئینسانی و خاڵی لە تێربوونیشیان.
دەبێت بزانرێت ئەو هەموو خرۆشانە جەماوەرییەی سەقز و شارەكانی تر، بەر هەقە و حەقانییەتی هەیە، ئەوان هەموویان (ژینا)ن و بەو ڕووداوانە حەرەكەتی ڕەوڕەوەی مێژوویی گۆران خێراتر دەبێت.
ئەوەی خەڵكی سەقزی هێنایە سەر شەقام و فەزای كپی گۆڕستانی گۆڕی بۆ نركە و هاوار و سروودی شۆڕشگێڕانە و حەماس و خرۆشی خەڵكی سەقزی شۆڕشگێڕ و شارەكانی ترە، بە تەنها پرسێكی سادەی بەخاکسپاردنی ژنێك نییە، بە تەنها پرسی مەرگی ژینا نییە.
نازانم دەزانن یان نا، پرسی هاواری ناو گۆڕستان، پرسی هەموو ماڵێكی سەقزە، پرسی هەموو ماڵێكی ڕۆژهەڵاتە، پرسی كۆلێت و ماڵەكانی سنە، مەریوان، بۆكان، مهاباد، جوانڕۆ، بانە، سەردەشت، لۆرستان و ورمێیە.
پرسی دەنگ هەڵبڕینە، مەرگی ژینا بیانوویەكی كوردانەی حەقانییە، كە هەموو سات، چركە و سەعاتێك، ڕۆژێك، مانگ و ساڵێ ئامادەیە و سازە.
دڵنیام مەرگی (ژینا ئەمینی) سەقزی ڕێكاوڕێك هاوشێوەی مەرگی (محەمەد بوعەزیزی) توونسە، كە ئەویان لە تونس و ئەمیان لە سەقزە، بەڵام ماجەراكە یەك مانا و مەدولول، یەك پرس و یەك ڕیوایەت و چیرۆكی هەیە، كە سوكایەتی و شكاندنی كەرامەتی ئینسانە.