بیرەوەری شاسوار هەرشەمی یان تەونی جاڵجاڵۆكەی مرۆڤێكی ناسیاسی
ئازاد حەسەن گەرمیانی
شاسوار هەرشەمی گوتارێكی بڵاوكردۆتەوە لەبن ناونیشانی ” مەلا بەختیار ، لە زیندانی نزرۆكە ” گوایە: ئەمە بیرەوەری نووسەرە . بیرەوەری پێش هەموو شتێك دەبێ راستگۆیانە بنووسرێت و دوور بێت لە هەوڵی فێڵ لە خوێنەر و فریودان و چەواشەكاری .
ئەم نووسینە بێ سەروبەرە ، سەروبنی وڕێنە و قسەبزڕكاندن و درۆ هەڵبەستن و سوكایەتییە بە كەسایەتی خودی خۆی . . مەلا بەختیار و هەر كەسێكیتر ئەم جۆرە قسەیەی بەرانبەری كرابێت ، هیچ بایەخێكی زانستی وای نییە , كەسایەتی ئەوی پێ ناڕوشێنرێت و نرخی بەوە كەم نابێتەوە . دیارە لەناو گەلی كورد و گەلانیتری دنیاش هەروایە : كەسێك بەبێ بۆنە و هۆكار ، بەلەكی ئەم و ئەو بگرێت و قسەی نەشیاو بداتە پاڵ ئەم و ئەو ، كەس چەپڵەی دەستخۆشی بۆ لێنادات و بە گوڵباران ستایش ناكرێت ..
من وەكو كەسێكی بێلایەن وتا رادەیەك ئاگادار لە مێژووی نیو سەدەی رابوردووی ئەم گەلە ، دەمەوێت ئەم چەند دێڕەی خوارەوە بۆ بنووسم ،بە هیوای ئەوەی هەڵەكانی بۆ راست بكەمەوە و لەمەودواش فێری ئەوە بێت ، بەوردی لەسەر مێژووی نوێ بنووسێت ، با خوێنەری وریا بڕوای بە نووسینەكانی لەسەر مێژووی سۆمەری و ئەكەدیش لە دەست نەدات..
١- كەسێك تایتڵی دكتۆرای هەبێت و
خۆی بە زانا دابنێت ، نابێت ئەوەندە بێڕێزی بە خۆی رەوا ببینێت و خۆی وەكو كەسێكی پەراوێزخراوی بوغزاوی و كینە لە دڵ و ئەقڵ پاشكۆ پیشان بدات ..
٢- شاسوار هەرشەمی بەبێ ئەوەی
ئاگای لە خۆی بێت ناسنامە دزێوەكەی خۆی دەخاتە روو :
كاتێك رووداوەكانی جیابوونەوەی (ئاڵای شۆڕش ) روودەدەن، دوو بەرە دروست دەبێت : بەرەیەك بڕوای بە ئازادی بیروباوەڕ و ئازادی كاروچالاكی سیاسی هەیە: یەكێتی نیشتمانی كوردستان لەبری ئەوەی سێ باڵ بێت ،بە رەزامەندی سەركردایەتی یەكێتی ببێتە چوار باڵ : جاچبوو ؟ زەوی لە سووڕانەوە دەكەوت؟ بەرەیەكی دی : بە هیچ شێوەیەك بڕوای بە ئازادی بیروباوەڕ و مافی مرۆڤ نەبوو : تەنیا بڕوای بە زەبروزەنگ و پەڕوباڵ كردن و دیل كوشتن و تیرۆری فیكری و گرتن و كوشتن و راوەدوونان و لەناوبردنی نەیاران هەبوو ...
شاسوار هەرشەمی پاش تێپەڕبوونی ٣٧ ساڵ بەسەر ئەو رووداوە قێزەوەن و دزێوانەدا و پاش چەندین ساڵ لە ژیان لە ئۆروپا دا و خوێندن لە زانكۆكانی ئەوێ ، لە بری ئەوەی بە چاوێكی رەخنەگرانەوە سەیری رووداوە مێژووییەكانی ئەم سەردەمە بكات و بە پەڵەیەكی رەش و تاوان و پڕ شەرمەزاری دابنێت بە نەوچاوانی ئەوانەی تاوانیان دژی مرڤایەتی ئەنجام داوە ، شانازی بەوەوە دەكات ، لە بەرەی ئەوانەدا بووە ، كە دیلكوژ و ژنكوژ و بڕوایان بە دەنگی جیاواز و ئۆپۆزسیۆنی مەدەنیش نەبووە! ئەمە سیفەتی مرۆڤی ئەكادیمی و زانستكار نییە، پێیوابێت ، كات و رۆژگار لە ساڵی ١٩٨٥ راوەستاوە و بە ئاستەمیش جوڵەی تێنەكەوتووە. دیارە ئەو نازانێت چەندین كتێب و لێكۆڵینەوەی زانستی لەسەر رووداوەكانی ١٩٨٥ بڵاوكراوەتەوە : زۆربەی سەرانی بەرەی دژ بە ( ئاڵای شۆڕش ) پەشیمانیان دەربڕیوە و پێیانوابووە ، لێدانی ئەو جوڵانەوەیە هەڵەیەكی مێژوویی زۆر قورس بووە و نەدەبوو ، كێشەكان بەو شێوەیە چارەسەر بكرێن.. شاسوار هەرشەمی تازە بە تازە دەیەوێت ، داكۆكی لە بابەتێك بكات ، كە كەس لە كوردستانی ئەمڕۆدا رەوایەتی پێ نابەخشێت ..
٣- شاسوار هەرشەمی دەنووسێت ( مەلا بەختیار كەسێكی گەلێر نەبووە ..) كابرایەكی دابڕاوی ناكۆمەڵایەتی بووە ، گوایە: سەركردەیەك بووە، لە دەرەوەی رووداوەكان دا ژیاوە ،كەس نەیناسیوە و لە ناو جەماوەردا نەبووە ..
پێشەكی : مەلا بەختیار پێویستی بە هەڵمەت و داكۆكی من نییە و خۆی ئەگەر بیەوێت دەتوانێت وڵام بداتەوە و دووسێ بەرگیش لەسەر رووداوەكان بنووسێت ..
پاش نسكۆی ١٩٧٥ و گرتن و راوەدوونانی سەركردە و كادرانی كۆمەڵە ، بە شایەتی شەهید ئارام وئازاد هەورامی و مامۆستا موحسین عەلی ئەكبەر و مامۆستا جەعفەر و دەیان ئەندام و كادری كۆمەڵە : مەلا بەختیار یەكێك بوو لە دینەمۆ سەرەكییەكانی رێكخستنەوەی رێكخستنە هەڵتەكێنراوەكانی كۆمەڵە و یەكێتی . راستە شەهید ئارام رابەری سیاسی و فیكری كۆمەڵە بوو ، بەڵام چەك و پارە پەیداكردن و دروستكردنی دەستە چەكدارەكان پشكی سەرەكی لەسەر شانی مەلا بەختیار بوو..
پاش تێكشكانی حەملەی هەكاری ( حوزەیرانی ساڵی ١٩٧٨ ) رەوانشاد نەوشیروان مستەفا لە بەردەم مام جەلال و مامۆستا جەعفەر و ژمارەیەك كادر و پێشمەرگە گوتبووی : ( ئەگەر ئێمەو هەموو سەركردەكانی یەكێتیش شەهید بكرێین ، مەلا بەختیار بە تەنیا بمێنێتەوە ، درێژە بە شۆڕش دەدات و رێگە نادات ئەم جوڵانەوەیە دابمركێتەوە..) بڕوانە: كتێبی ( بە خەونی گەورەوە كەوتینە رێ)
٤- لە سێ كۆنفرانسی كۆمەڵەدا مەلا بەختیار بە دەنگی خۆی دەرچووە ، سەرەڕای ئەو هەموو پیلانگێڕی و پاشقول لێگرتنەی لێی كراوە.. كەسێك ئەوەندە ناجەماوەری و گۆشەگیر و دابڕاوە بێت چۆن توانیویەتی لە سێ كۆنفرانسی كۆمەڵە هەڵبژێردرێت و لە كۆنگرەكانی یەكێتیش بەهەمان شێوە .
من ناڵێم : مەلا بەختیار سەرەتای شۆڕش كەسایەتی ژمارە دوو یان سێ بووە ، بەڵام ئەو ژمارەیەكی بەرچاو بووە و سەركردایەتی و هێزی پێشمەرگەش ئەو راستیەیان لە بەر چاو گرتووە..
دوا قسەی من بۆ كاك شاسوار ئەوەیە ، مرۆڤ چەند رێزی خۆی و خەڵك بگرێت ئەوەندە قازانج دەكات ومێژووش ئەحكامی خۆی هەیە و رەحم بە كەس ناكات...