پیاوان لەگەڵ (سەلامەتی) ئاشت بكەنەوە..

ژن 18/05/2022

نەوال سەعداوی
وەرگێڕانی لە عەرەبییەوە: بابان حەمە
شكست و دەردی كۆمەڵی عەرەبی، تەنها دواكەوتوویی و دواكەوتەیی كوێرانە نییە، بەڵكو ڕەنگدانەوەی ئەو دواكەوتوویی و دواكەوتەییە لەنێو جومگەكانی پەروەردەی خێزانی و ناوەندە ئاینیی و كۆمەڵایەتییەكان.. ئێوە رەنگە لەمن بپرسن دواكەوتەیی مەبەستت چییە؟ منیش دەمەوێت ئەو پرسیارەم لێبكرێت تا بەم شێوەیە وەڵامتان بدەمەوە.. دواكەوتەیی كوێرانە ئەو دەردە گرانەیە كە كۆمەڵگەیەكی وەك مصر بە مەزەندەی من 50 ساڵی دیكەی دەوێت تا لانیكەم وشیاری و كاریگەریی دواكەوتەیی كوێرانە كەم بكاتەوە، ئاگادار بن! دەڵێم كەم بكاتەوە نەك نەیهێڵێت! چونكە دوو شتی جیاوازن..
رەنگە كۆمەڵگەی رۆژئاوایی و ئەمەریكیش تا ئەم كاتەی من قسەی تێدادەكەم دواكەوتەییی كوێرانەیان تێدا بێت، بۆنمونە، ئێستاو حاڵی حازر لە ئەمەریكا گەلێك هەن پێیان دەوترێت گەلی (ئەمیش)، تا ئێستا لە ئەمەریكا وەك سەدەكانی ناوەڕاست دەژین و تەكنەلۆژیاو ئامێرەكانیان رەت كردۆتەوەو ئایدیۆلۆژیاو بیروباوەڕیان ڕێگەیان پێنادات تەنانەت ئۆتۆمبێلیش بەكار بهێنن.. تا ئێستا بە ئەسپ و عەرەبانە هاتوچۆ دەكەن و خاوەنی میتۆدی خوێندنی خۆیان و قوتابخانەی خۆیان و هەموو شتەكانیان هی خۆیانەو نایانەوێت سوود لە حكومەتی ئەمەریكی وەربگرن بۆ هیچ شتێك لە بابەتی ئەلیكترۆنی ئامێری تەكنەلۆژیای زانستی و سەردەمییانە و دواكەوتەی عەقڵی خۆیانن..
جیاوازیی نییە، عەقڵی كۆمەڵگەی مصر-یش، تا سبەی خۆر هەڵدێت قسەی بۆ بكە پێی بڵێ خەتەنەكردنی كچان خراپەو دونیایەك بەڵگەی زانستی و كۆمەڵایەتی و كارەساتی كوشتنی حەز و سێكسی بۆ بكەیت، ئەو مێشكی ئەشڵەقێت و گاڵتەی بە قسەی من و تۆ دێت...
دواكەوتەی كۆمەڵێك پیاوی ئاینین كە كوێرانە هەموو دەدەنە بەر حوكمی شەرعی دەماودەم و رۆژان لێرەو لەوێ شەرعەنەی كوشت و تەكفیر و بەدئەخلاقی و بەدشەرەفیمان دەكەن .. لەگەڵ عەقڵییەتێكدا مامەڵە دەكەیت كە جگە لەرەش و سپی رەنگی دیكەی تێدانییە..
ئێمە دەمانەوێت گەنجەكانمان، كوڕانمان، كچانمان بە ژیان ئاشت بكەینەوە، ئەوان تۆراون لە ژیان، ئەوان ئەزمونی ژیانێكی میسالی تەنها بە خەیاڵ دەكەن .. بە خەیاڵ دەیانبەنە بەهەشت، بەخەیاڵ دەیانكەن بە فریشتە، بەخەیاڵ باڵەفڕەیان دەكەن، بەڵام لە واقعی حاڵیاندا سجنیان كردوون، ئازادییان زەوت كردوون، دۆزەخیان بۆ سازكردوون..
ئێمە دەپاڕێینەوە و تكا دەكەین پیاوان ئاشت ببنەوە لەگەڵ (سەلامەتی)، چونكە پیاوانی كۆمەڵی ئێمە لەگەڵ سەلامەتبوون دا عاجز بوون، ئەوان چیتر لەم كۆمەڵگەیەدا نابنە پیاوی سەلامەت، پیاوان بە هۆكاری دواكەوتەیی كوێرانە یان گێچەڵی سێكسیت پێدەكات یان زۆرەملێت بۆ هەمان كار پێدەكات یان بە بێشەرف و بێئابڕوو دەتچوێنێت، یان لەخۆیت بێبەری دەكات، یان سجن و كۆت و بەندت دەكات، یاخود دەتكوژێت.. پیاوی رۆژهەڵات دەبێت سەرلەنوێ ئاشت بكرێتەوە بە (سەلامەتی)، بەڵێ دوپاتی دەكەمەوە پیاوی ئەم كۆمەڵگەیەی عەرەبی، سەلامەت نین و زۆربەیان لەژێر بەنج و هۆشبەری دواكەوتەیی كوێرانەدان..
ئێمە هاوار هاوارمانە و دەڵێین كچەكانتان فێر كەن ئابووری سەربەخۆیان هەبێت تا لە ژیاندا بە دوای «بەخێوكەر» دا نەگەڕێن، بەڵكو بە دوای هاوژین و خۆشەویستیەوە بن .. كوڕەكانتان فێربكەن كە كاری ناو ماڵ زۆر ئاسایی بێت بەلایانەوە، تا لە ژیاندا بە دوای «خزمەتكار» دا نەگەڕێن، بەڵكو بەدوای هاوڕێی ژیان و خۆشەویستییە وە بن.. كچ شوو نەكات كە تەنهاو تەنها چاوی لە گیرفانی مێردەكەیەوە بێت، كوڕ ژن نەهێنێت، كە ژنەكەی تەنها رۆڵی شێف و گسكی كارەبایی و قاپشۆر و جلشۆر ببینێت..
زەحمەتە ئەمە روبدات تا سەرەتا پیاوان لەگەڵ (سەلامەتی) و (سەلامەتبوون) دا ئاشت نەكەینەوە.. ئەوەش دەبێت كار لەسەر گۆڕینی ماناو مەغزاكانی ئەو میتاڵانە بكرێت كە دوای كەوتوون.. كێشەكە لەوەدایە وا داچۆڕاوەتە نێو جومگە پەروەردەیی و فێركرنەكان، بەئاستەم دەستت تێدەچێت هەموو ئەو زامانە ساڕێژبكەیت.. دروست وەك ئەوە وایە بە پێی پێخاوس و نائاگایە پێ بە پەپكە دڕكە ووشكەیەكی بیاباندا بنێیت و بەجارێ سەدان دڕك بە بنەپێتدا هەڵچەقێت و تۆش بە لەسەر خۆ و بە هێمنی دانە دانە ئەو دڕكانە دەربێنیت و شوێنزامیان ساڕێژ و چارەسەر بكەیت ..
سەرچاوە: سایتی ئەلئەنوار-ی مصری .