سەرۆکی دادگای سلێمانی: نەرمی بەرامبەر بەکارهێنەرانی چەک و چەقۆ و تاوانە ئەلیکترۆنییەکان مەنوێنن
چاودێر:
سەرۆکی دادگای سلێمانی داوای لە دادوەرانی لێکۆڵینەوە
کرد، ئەوەندەی یاسا رێگەیداوە ئیجرائاتی زۆر توند بكەن لەگەڵ ئەنجامدەرانی تاوانە ئەلکترۆنیەکان،
هەروەها چاوپۆشی لە بەکارهێنەرانی چەک و چەقۆ نەکەن و نەرمییان بەرامبەر نەنوێنن.
ئەمرۆ چوار شەممە دادوەر جاسم جەزا سەرۆکی دادگای
تێهەڵچونەوەی ناوچەی سلێمانی لەگەڵ دادوەرانی دادگاکانی لێکۆڵینەوەی سلێمانی کۆبوەوە.
لەو کۆبوونەوەیەدا گفتوگۆکراوە لەبارەى پلانی کارکردنی
ساڵی نوێ و گرتنەبەری ئەو میکانیزمانەی، کە دەبنە مایەی باشتر بەڕێکردنی کاروباری هاووڵاتییان
و خێراترکردنی یەکلاکردنەوەی داواکان.
سەرۆکی دادگای سلێمانی داوای لە دادوەرانی لێکۆڵینەوە
کرد، ئەوەندەی یاسا رێگەیداوە ئیجرائاتی زۆر توندبكەن لەگەڵ ئەنجامدەرانی تاوانە ئەلکترۆنیەکان
و ئەوانەی لەڕێگەی تۆڕە کۆمەڵایەتییەکانەوە ناو و ناوبانگی خێزانەكان لەكەداردەكەن،
هەروەها چاوپۆشی لەبەکارهێنەرانی چەک و چەقۆ نەکەن و هیچ نەرمییەک بەرامبەریان نەنوێنن.
دادوەرانی لێکۆڵینەوە لەو کۆبوونەوەیەدا
داواکارییان لەسەرۆکی دادگا هەبوو و جەختیان لە زۆری داواکان و كەمیی ژمارەی دادوەر
و لێكۆڵەری دادوەری و فەرمانبەر كردەوە.
ئەو دادوەرانە داوایانکرد، بەپێی توانا کاربکرێت
بۆ زیادکرنی دادوەر و لێکۆڵەر و فەرمانبەر بۆ دادگاکانی لێکۆڵێنەوە، بۆ ئەوەی بتوانن
زووتر داواکان یەکلایی بکەنەوە و ئیشوکاری هاووڵاتییان بەشێوەیەکی باشتر بەڕێبکرێت.