فێمێنزمی ڕۆشنگەری کار بۆ تێزە نوێکەی مەلا بەختیار دەکات
یەکێک لەو چەمکانەی ساڵانێکی زۆرە هاتووەتە نێو فەرهەنگی
سیاسی و کۆمەڵایەتی کوردییەوە، چەمکی دیموکراسییە. حیزب و پارتە سیاسییەکان، رۆشنبیران
و ئەوانەی سەروکاریان لەگەڵ سیاسەتدا هەیە، لە نووسین و ئەدەبیاتی خۆیاندا، باسیان
لەم چەمکە کردووە. جگە لەوە زۆرن ئەوانەی رۆژانە، لە میدیا جیاواز جیاوازەکانەوە،
گفتوگۆو قسەوباس لەسەر ئەم چەمکە دەکەن و بەکاریدەهێن.
لە کۆمەڵگای ئێمەدا،
رۆژانە گفتوگۆو قسەوباس لەسەر ئەم چەمکە دەکرێت، بەڵام لەسەر ئاستی پراکتیککردن، زۆرجار
لای رۆشنبیران و ئەدیبان و ئەکادیمیستەکان، تەنها وەک خەونێک لێیدەڕوانن. لای نوخبەی
سیاسیش، وەک ئامانجێکی سەخت و دژوار تەماشا دەکرێت. هۆکاری ئەوەش زۆرە، بەڵام یەکێک
لە گرنگترین هۆکارەکان بە ئامادە نەبوونی ژن دەبینین لە ژیان و بەرێوەبردنی
کۆمەڵگادا، لە کۆمەڵگای ئێمەدا، جۆرێک لە سیستم و عەقڵیەت پەیڕودەکرێت کە دەسەڵاتی
گەورە زیاتر بۆ کەسەکان/شەخسەکان دادەنرێت کە ئەوانیش پیاوانن، تا دەستورو یاساو
پرنسیپەکان و رۆحی هاوڵاتیبوون و بەشداریی گشتی، هەمو ئەوانە دەکرێنە قوربانی دەسەڵاتی
تاکە کەسێک یان حیزبێک یا بنەماڵەیەک بە یەک جۆر زیهنیەت. لێرەدا باوک چۆن لە ناو
خێزاندا، برا بەسەر خوشک و هاوسەر بەسەر ژناندا موڵکیەتی هەیە و خاوەنی دەسەڵات و
هێزە، مامۆستا لە قوتابخانە زاڵە بەسەر قوتابییەکانیدا، مەلای مزگەوت لە
مینبەرەکانەوە کۆنترۆڵی فکری ناوەوە و دەرەوەی مزگەوتەکانی کردووە، بەرپرسی یەکەمی
زانکۆ باڵادەستی خۆی بەسەر زانکۆکەدا سەپاندووە، ریش سپی خێڵ خاوەنی قسەی یەکەم و
کۆتاییە، سکرتێری سەندیکا یان حیزب بە تەنها پیاوانن خۆیان بڕیارەکان دەردەکەن...هتد.
هەمو ئەم حاڵەتانە و هەمان ئەم وێنە باوەی ناو کۆمەڵگا، بەئاسانی گواستراونەتەوە بۆ
کایەی سیاسی و حوکمڕانی. هەر بۆیە دەبینین سەرۆک و سەرکردەکان، تا لە ژیاندا مابن،
هەر بە سەرۆک و سەرکردە دەمێننەوە، چ بە زۆربێت، یان بە دامەزراندنێکی هەمیشەیی.
بێگومان هەر کۆمەڵگایەک یان دەزگایەک یان سیستمێکی
حکومرانی، ئەگەر بە دەست یەک رەگەزی مرۆڤەوە بێت و لە بنچینەی فکریدا بڕوای بە
هێزو ئیرادەی رەگەزێکی دیکەی مرۆڤ نەبێت کە ژنانن توشی داڕمان و شکست دەبێت وەک
ئێستای حکومەتی هەرێمی کوردستان.. ئەگەرچی بانگەشەی دیموکراسی دەکات و سیفەتی دیموکراسی
بە بەرخۆیدا دەکات. لەم حاڵەتەدا دیموکراسی تەنها وەک چەمک و وەک شکڵێکی بێ ناوەرۆک
ئامادە دەبێت و لە جەوهەردا بوونی نییە.
فێمێنزمی رۆشنگەری ئەم تێگەیشتنە وە هۆشیاری ژنان
بەرامبەر بە سیستەمی حکومرانی لەهەرێمی کوردستان زۆر بەگرنگ و پێویست دەزانێت.
لە میانی کۆبوونەوەی"
فێمێنیزمی ڕۆشنگەری" لەبارەی دۆخی ژن و مافەکانی و بزوتنەوە فێمێنستەکانەوە،
بەرێز مەلا بەختیار تێزێکی نوێ و گرنگ دەخاتە روو کە فێمێنزمی رۆشنگەری بڕوای
پێیەتی و کاری لەسەر دەکات :(پرسی ژن جەوهەری دیموکراسییە لە سەردەمی جیهانگیریدا).
مەلا بەختیار دەیەوێت ڕوانگەیەکیتری جیاواز لەبارەی فێمێنیزمەوە
بخاتەڕوو و دەڵێت لەسایەی دیموکراسییەتێکی ناکامڵدا.مەحاڵە ژن مافەکانی بەدەستبێنێت و لە زیهنیەتی نێرسالاری
و دەستی نەریت ومەزەب رزگاری بێت ، کاتێک
ژن دەکرێت به پێشمەرج و جەوهەری دیموکراسی.ئەوکاتە دیموکراسی کامڵ دەبێت و قۆناخی
خۆی دەبڕێت.
مەلابەختیار باوەڕی وایە کە هەرچی بانگەشەی دیموکراسیەت بکات ، دەبێت ژن
بکات بە جەوهەری دیموکراسی، بۆ ئەوەی ولاتێکی دیموکراسی هەبێت، یان حزبێکی دیموکراسی
بیت، یاخود پیاوێکی دیموکراسیخواز، ئەوە دەبێت ژن بکرێت بە سەنتەر و جەوهەری ئەو دیموکراسیەی
بانگەشەی بۆ دەکەیت، گەر ئەوە نەکرێت ئەوە دیموکراسیەت قۆناخی خۆی نابڕێت نیوەناچڵ
و ناکامڵ دەبێت، بە بوچوونی بەڕێزیان هەموو کارێک پێویستی بە پشوو درێژی و هەنگاو
بەهەنگاو هەیەو پێوەرەکانی کۆمەڵگەی نێر سالاری و نەریتگەرا بە ڕوژێک و دووان لەڕەگەوە
هەڵناتەکێن، ئەوپێوەرو نەریتە نێرگەرایەی سەدان ساڵە.ڕەگ و ڕیشەی خۆیان زۆر بەقوڵی
داکووتاوە، ناتوانین وا بە ئاسانی بەیەکجاری بسڕینەوە،بۆیه ئەوەی لەتێزەکەیدا لەبارەی
شۆڕشێکی مەعریفی و ڕۆشنگەری- فیکری فێمێنیستانەوە دەخاتەڕوو ئەوەیه کە ژن بۆ
ئازادبوون لەیاساکانی نێرسالاری، بۆ ئەوەی کەسایەتی و کەرامەتی خۆی بەدەست بێنێتەوەو
ڕێز و پیرۆزی و بەهای بۆ بگەڕێتەوە، پێویستە هەنگاو بەهەنگاو درێژە بەکاروانی ئەوخەباتە
پیرۆزەبدات.
بۆ کارکردن لە پێناو ئەم ئاماجەشدا فێمێنزمی رۆشنگەری
کارو خەباتی ژنان هۆشیارییان بە پێش مەرجی سەرکەوتن دادەنێت و لەو پێناوەشدا بە
شێوازی جیاواز جیاواز لە کارو چالاکییەکانی بەردەوام دەبێت و داوا لە سەرجەم ژنانی
کوردستان دەکات بە بێ جیاوازی بیرو را، ئاین، حزبی.. لە پیناو راماڵینی عەقڵیەتی
دواکەوتوی نێرسالاری و یەکگرتنی هێزو هەستی نارازی ژنانی کورد لەگەڵ فێمێنزمی
ڕۆشنگەری لە پەیوەندیدابن بۆ کاری هاوبەش و پێکەوەیی.
ناوەندی رابەرایەتی
فێمێنزمی رۆشنگەری
١٧/٦/٢٠٢١