كازمی لاوازترین سەرۆكوەزیران دەرچوو
چاودێر:
مستەفا كازمی سەرۆك وەزیرانی عێراق هەڕەشەی وازهێنانی لە پۆستەكەی كردووە تا نامەی وازهێنانەكەی بداتە سەرۆك كۆماری عێراق بەرهەم ساڵح و سەركردە شیعەكان.
هەڕەشەكانی كازمی بەهۆی نەبوونی دەسەڵاتەوەیە بەسەر گرووپ و میلیشیا شیعە چەكدارەكاندا لەكاتێكدا كازمی فەرماندەی گشتی هێزە چەكدارەكانە، بەڵام ئەمە بۆ چەند جارێكە گرووپە چەكدارەكان هێرش دەكەنە سەر ناوچەی سەوز نمایشی سەربازی دەكەن و ماڵی كازمی و دامودەزگاكان گەمارۆ دەدەن، رێگری دەكەن لە سزادانی تۆمەتبارانی كوشتنی چالاكەوانەكان.
بەرپرسێكی پایەبەرز بۆ رۆژنامەی العرب گوتی: هێزە سیاسییەكان لە راوێژدان بە بەردەوامی لەو كاتەوەی چەكدارەكان لەناوچەی سەوز نمایشیان كرد، حكومەت رێگا نادات جارێكی ئەم نمایشە دووبارە بێتەوە.
گوتیشی: كازمی سەرۆك كۆمار و سەركردە شیعەكانی سەرپشك كردووە لە ئەوەی واز لە پۆستەكەی بهێنێت یان رێگا بدەن حكومەت لێپرسینەوە لەگەڵ تاوانباران و گەندەڵان و ئەو كەسانەدا بكات كە كاری تیرۆرستی دەكەن و لەنێو حەشدی شەعبیدان.
ئەندامێكی پەرلەمانی عێراق كە نەیویستووە ناوەكەی بڵاوبكرێتەوە، گوتی: كازمی پلانێكی باشی پێشكەشكردووە گەل تێیدایەتی، گەل لەگەڵیدا دەبێت یان رێگای ئاژاوە هەڵدەبژێرن.
شرۆڤەكارێك گوتی: جێگەی سەرسوڕمان نییە كە كازمی گەیشتووەتە ئاستێك كە رایبگەیەنێت توانی ئیدارەدانی كاروباری دەوڵەتی نییە لە چوارچێوەی بوونی هێزێكی چەكدار لە دەرەوەی حكومەت.
گوتیشی: ئەم رەوشە پێوەندیی هەیە بە خۆبەستنەوەی ئەو گرووپە چەكدارانە بە ئێرانەوە.
عەلی روبێعی شرۆڤەكاری سیاسی گوتی: كازمی روانینی نییە بۆ كۆنترۆڵی دەزگاكانی دەوڵەت و دابینكردنی ئاشتی كۆمەڵایەتی و رەواییی حكومەت، ئەزموونی نییە، لاوازترین سەرۆك وەزیرانە لە دوای كوژرانی خۆپیشاندەرێك لە سەردەمی ئەودا.
نووسەری عێراقی مەسار عەبدول موحسین گوتی: بابەتی وازهێنانی سەرۆك وەزیرانەكان نوێ نییە، پێشتر عادل عەبدولمەهدی هەمیشە نامەكەی لە گیرفاندا بوو بەڵام نامەكەی دایە دامەزراوەی دینی نەك بۆ گەل.