قامەتی پاییز، وەفایەك بۆ محەمەد عومەر عوسمان
دیوانە شیعری (قامەتی پایز)، نوێترین بەرهەمی شاعیری نان (سەلام مستەفا)یەو لە دوو توێی (120) لاپەڕەدا كەوتە بەردیدەی خوێنەران، ئەم بەرهەمە نوێیە دەزگای جەمال عیرفان بەچاپی گەیاندووە و لەتاران چاپكراوە.
سەلام مستەفا، ساڵی 1957 لە سلێمانی لە دایكبووە و، خاوەنی چەندین نامیلكە شیعری ناوازەیە لەوانە (پەڕەسێلكەی سپی، كۆماری نان، تەنورەكانی دۆزەخ، نیشتمانێك بۆ كرێ) و چەندین بەرهەمی تر.
دیوانە نوێیەكەی شاعیری (قامەتی پاییز)، وەك لە پێشەكی كتێبەكەدا شاعیر ئیشارەتی پێداوە، سەرلەبەری شیعرەكانی كە لە چوار بەش پێكهاتووە تایبەتی كردووە بە شاعیری پاییز و گەڵاڕێزان (محەمەد عومەر عوسمان) بەهەمان شێوە و ستایلی ئەو شاعیرە نووسیویەتی، ئەمەش وەك (سەلام مستەفا) دەڵێ: وەفایەكە بۆ ئەو شاعیرە كە زیاتر لە (45) ساڵا هاوڕێی بووە.