ژمارەی تووشبوان بە كۆرۆنا لە هیندستان 20 ملیۆن تێدەپەرێنێت
بەگوێرەی داتا رەسمییەكانی وڵاتی هیندستان ئەمرۆ سێشەممە ژمارەی تووشبوان بە كۆرۆنا ڤایرۆس لەوەتەی ئەو نەخۆشیە لەو وڵاتە بڵاوبوەتەوە 20 ملیۆن تووشبووی تێپەڕاندوەو نەخۆشخانەكان توانای وەرگرتنی تووشبووانیان نەماوە و جمەیان دێت.
بەگوێرەی ئامارەیەكی وەزارەتی تەندروستی ئەو وڵاتە لەماوەی 24 كاتژمێری رابردوودا 357هەزارو 229 كەسی دیكە تووشی ئەو نەخۆشیە هاتوون بەوەش ژمارەی تووشبوان گەیشتوەتە 20 ملیۆن و 300هەزار كەس.
هەروەك لەماوەی 24 كاتژمێری رابردوودا 3هەزارو 449 تووشبوو گیانیان لەدەستداوە بەوەش ژمارەی ئەو كەسانەی لەهیند بەهۆی كۆرۆنا ڤایرۆسەوە گیانیان لەدەستداوە گەیشتوەتە 222هەزارو 408 كەس ئەمە لە كاتێكدا پسپۆران و كەسانی شارەزا پێیان وایە ژمارەكە زۆر لەوە زیاترە و ئاشكراناكرێت.
پزیشكان و پسپۆران دەڵێن ژمارەكە بەدەیان جار لەو ژمارەیە زیاترە وپێیان وایە رۆژانە زیاتر لە 3ملیۆن كەس تووشی ئەو نەخۆشیە دەبن.