بیرەوەرییەكانی فوئاد مەعسوم... نهێنییە نەوتراوەكانی دوو شۆڕش

کوردستان 6 کاتژمێر پێش ئێستا

ئەنوەر حسێن (بازگر)
"دوو بەرگی كتێبی (بیرەوەرییەكانی د.فوئاد مەعسوم، یەكەم سەرۆكوەزیرانی كوردستان)، كە لە ئامادەكردنی شێرزاد هەینییە، بیرەوەری كەسایەتییەكە، كە لە هەردوو شۆڕشی كوردستاندا وەكو كارەكتەرێك دەورو نەخشی بوە، یان لە زۆرینەی ڕووداوەكانی نیوسەدەی ڕابردوودا لە شۆڕش و خەبات و حزبایەتی و حوكمداری نوێ دوای ڕاپەڕین بەشدار بوە، ڕۆڵی هەبوە؛ پیاوێكی ئارام، بەڵام پشوو درێژ، نەرم و نیان، دبلۆماسێكی بەتوانا، پێشمەرگەی شاخ، دانوستكاری گفتوگۆكان، سكرتێری حزبێكی شۆڕشگێڕی ناسیۆنالیست، هاوڕێی زۆرینەی سەركردەكانی ئەو نیو سەدەیە بوە".
لە دەورانی دوای ڕاپەڕین، وەكو یەكەم سەرۆكوەزیرانی حكومەتی هەرێمی كوردستان، پیاوێكی حكومی دەركەوت و یەكەم كارەكتەری ناو ئەو حكومەتە سی ساڵەیەشە، كە بە خواستی خۆی دەستی لەكار كێشاوەتەوە.
فۆڕمی ئەم بیرەوەرییە، چەند خاسیەت و شێوازی جیاوازتر لە هەندێ بیرەوەرییەكانی تری كەسایەتییەكانی كوردستانی لەخۆ گرتوە:
یەكەم: بەكورتی بابەتەكانی گێڕاوەتەوە و زۆر دوورودرێژی نەكردوەتەوە، لە هەندێ بەش و فەسڵی كتێبەكە، بە شێوەی سەردێڕی هەواڵی، بابەتەكەی گێڕاوەتەوە.
دوەم: شەفاتر و ڕاستگۆیانەتر، بەشێك لە ڕووداوەكانی گێڕاوەتەوە، كە پێشتر یان ورد باس نەكراوە یان هەقیقەتەكانی باس نەكراوە.
سێیەم: مێژووەكان و شوێنی كەسەكانی بەوردی داناوە، كە ئاماژەیە بۆ پشتبەستن بە دۆكیۆمێنت نەك گێڕانەوە.
جیا لەوانە دەبێ ئەوەش بڵێم؛
هەندێ ڕووداوی گرنگی ئەو مێژووەی كوردستانی بەمەبەست یان بێ مەبەست باس نەكردوە (جا لەبەر خاتری باردوخەكە بێت، یان بەمەبەست چاوپۆشی لێكردوون، كە من هەقیقەتی ئەو ڕووداوانەم لە خەڵكانی هاوڕێ و هاوسەنگەری خۆی لەناو ئەو مێژووە بیستوە).
ئەوەی لەم بەشەی خوارەوەدا دەیخوێنیتەوە، هیچی قسەی من نین و هەمووی ناوەڕۆكی ناو كتێبەكەیە، من كورت و پوختم كردون و وەكو ڕووداوی مێژوویی گرنگ و تەنها سەرنجی (كتێبی یەكەمە) و كتێبی دوەم ماوە، بەڵام هەموویان ڕووداوی گرنگن بۆ خوێنەرێك كەلەناو شۆڕش نزیك نەبوە.

نامەی بارزانی بۆ تیتۆ
لە بەشێكی كتێبەكە لە پەیوەندی بارزانی و تیتۆ باس لە شۆڕش و پارتی دیموكراتی كوردستان دەكات و پەیوەندی بوونی خۆی بەپارتییەوە دەكات و دەڵێ؛ "بوومە پارتی و بارزانیم بینی.
مەعسوم دەڵێ؛ ئەوكات مەلا مستەفا وتی؛ "نامەیەك دەنووسم بیبە قاهیرە، لەوێ بیدە دەستی بەرپرسێكی یوگسلافی، بگاتە دەست سەرۆك (تیتۆ) وا ڕێككەوت لە قاهیرە جەمال ببوڤیچ جێگری تیتۆم بینی و نامەكەی بارزانیم پێدا".

بارزانی، داوای حكومەتی مەنفا دەكات
لە ڕەمەزانی (1974) مەلا مستەفا نامەیەكی تر دەنێرێت بۆ ئەنوەر سادات، سەرۆكی میسر، بەمەبەستی ئەوەی ئاخۆ هەڵوێستی چییە، ئەگەر لەگەڵ لایەنەكانی ئۆپۆزسیۆنی عێراق، حكومەتێك لە دەرەوە (مەنفا) پێكبێنن، ئایا میسر پشتگیری دەكات، بەڵام كە ساداتمان بینی، وتی؛ سڵاوم بۆ مەلا مستەفا هەیە، بەڵام بۆ ئەو بابەتە لەگەڵ عێراق و ئێران پەیوەندی دەگرین، بەڵام دوای ئەو نامەیە، سەرەتای ڕێككەوتنی جەزائیر بوو...، ئاكام لە (6/3/1975) كارەساتەكە ڕوویدا.

مام جەلال خەڵك كۆدەكاتەوە
مام جەلال لە بەیروت بوو، دەهات و دەچوو، بینیم، وتی؛ دەچمە سۆڤیەت بزانم بۆچوونیان چییە و زوو دەگەڕێمەوە، دواتر چوە لیبیا موعەمەر قەزافی بینی و بەڵێنی پێدانی چەكی پێدابوو بۆ شۆڕشی نوێ.

(22/5) نەك (1/6) دامەزراندنی (ی.ن.ك)ەوە
 د. فوئاد باوەڕی وایە ڕۆژی دامەزراندنی (ی.ن.ك) لە (22/5/1975)ە نەك (1/6) و دەڵێ؛ "مام جەلال، د. فوئاد، عەبدولڕەزاق فەیلی، عادل موراد) لە (طلیطە) لە دیمەشق بەیانی دامەزراندنی (ی.ن.ك) دەنوسن، دواتر ناوی (شێخ مووس، د.كەمال فوئاد، نەوشیروان، دەبابە)یان بۆ زیاد كرد.

ناوی یەكێتی گۆڕا بۆ (ی.ن.ك)
شەوی (17/12/1975) یەكەم كۆبوونەوەی دەستەی دامەزرێنەران لە دیمەشق لە ماڵی مام جەلال دەستپێدەكات لە ڕۆژی (30/3/1976) ناوی ڕەسمی یەكێتی كرا بە (ی.ن.ك) كە پێشر لە (12/5/1975) ناونرا بوو (یەكگرتووی نیشتیمانی كوردستان)، لە (13/9/1976) بڕیارماندا بە ناساندنی (ق.م) و دژایەتیان.
بەشێكی زۆری كتێبەكە، باس لە كۆبوونەوە بەردەوامەكانی سەركردایەتی و دەستەی دامەزرێنەری (ی.ن.ك) دەكات.

نامەیەكی توند بۆ كەمال فوئاد
لەناو ئەم دیدارەدا نامەیەكی گرنگی (شێخ حوسێن بابە شێخ، دكتۆر خالید و عەلی عەسكەری) هەیە، كە زۆریش توندە، بۆ كەمال فوئاد كە سەردەمی هەكاریە لە باكوری كوردستان لە ساڵی (1978) كە چوون بۆ چەك بۆ باكوور.

لە پاریس خومەینی دەبینن
بەمەبەستی پشتیوانی لە ئیمام خومەینی (فوئاد مەعسوم، عادل موراد، ئەحمەد بامەڕنی) دووجار لە ساڵی (1978) خومەینی دەبین لە پاریس و پێی دەڵێن: "دەمانەوێت كاربكەین دژی ڕژێمی شا"، ئەو دەڵێ؛ "جارێ خەریكی ڕاپەڕینی جەماوەرین"، ئەم دیدارە لەلایەن سازمانی ئینقلابی حزبی تودە (ڕەنجبەران) سازكراوە.

تاڵەبانی و بارزانی و باقر یاسین لە سوریا كۆدەبنەوە
بەئامادەبوونی لایەنی سێیەم (قیادە قەومی حزبی بەعسی عەرەبی ئیشتراكی لە سوریا)، مام جەلال و كاك مەسعود لە سوریا كۆدەبنەوە، بۆ یەكەم جار پاش نسكۆی شۆڕش لە (1/3/1977) بۆ هاوكاری سیاسی، عەسكەری ئیعلامی دژی بەعس.

پەیوەندی (ی.ن.ك) لەگەڵ دەوڵەتی لیبیا، سوریا، ئێران بابەتێكی گرنگی زۆری كتێبەكەیە
دیموكراتی ئێران، پشتیوانی خومەینی دەكات و دژی شێخ عیزەدین و كۆمەڵە بوو
(18/6/1979) لە مهاباد، دانشتنی نێوان (ی.ن.ك و حدكا) سەبارەت بە كۆبوونەوە و پەیوەندی لەگەڵ بەعس و ڕێگەپێگرتن و گومرگ دانان لە نۆكان بەڕێوەچوو.
(حدكا) لەو دیدارەدا وتویەتی؛ "ئێمە دۆستایەتی خومەینیمان دەوێت، قیادە موەقەتە پێشتر سەر بە ساواك بوون و ئێستا لەگەڵ ئێراندان و ئێمەش ئەوەمان پێ باشە، ئێوە پشتیوانی لە كۆمەڵە دەكەن دژی حزبی دیموكرات، سەبارەت بە شێخ عیزەدین وتیان وەك مەلای موسڵمانە قبوڵمانە نەك سیاسی و نامانەوێت بارزانییەكی تر لە ڕۆژهەڵات دروست بێت، چونكە هەڵوێستی باش نییە دژی خومەینی جیالەوانە شێخ عیزەدین دژی ئێمەیە و حەزی لە چەپڵە لێدانە. جیا لەوانە وتیان؛ كوردی عێراق خۆیان بە كوێخای هەموو كوردستان دەزانن و

قاسملوو جێگەی سیقە نییە
لەم دیدار و بیرەوەرییەدا، گلەیی لە عەبدوڵڵا موهتەدی سكرتێری كۆمەڵە دەكات و باس لە دیدار لەگەڵ سازمانی ئینقلابی، چریكی فیدایی، جەبهەی میللی دیموكرات، باسی حزبی تودە دەكات، دەڵێ؛ "بەرامبەر دیموكرات" وتیان: "چۆن ئێوە بڕوا بە قیادە موەقەتە ناكەن، ئێمەش باوەڕمان بە قاسملوو نییە، هیچ قسە و وەعدێكی ڕاست نییە"، باسی دیدار (لەگەڵ موجاهیدنی خەڵق، حزبی میللی ئێران) دەكات.   
*  *    *
مام جەلال؛ باری دارایمان زۆر خراپە
لە بەشێكی تری بیرەوەرییەكانی د.فوئاد، بە مێژووی (11/12/1979) نامەیەكی مام جەلالی بڵاوكردۆتەوە، كە داوا دەكات تا (1/1/1980) كاك حازم یارمەتییەكە وەربگرێت، چونكە زۆر بێ پارەین و لەسەر رینگ دەڕۆین و دەڵێ؛ لە كاك عەباس (400) دینارمان قەرزكردوە، مانگانە (53) پێشمەرگە هاتوون بۆ لامان و مەسەلەی حەمەی حاجی مەحمود بەخۆشی حەل بوە.
لە كتێبی بیرەوەرییەكانی د.فوئاد مەعسوم، بەشێكی گرنگی ناو لاپەڕەكانی تەرخانكردوە بۆ ڕۆڵی كارەكتەرێكی گەورەی ناو شۆڕش، بەتایبەت ئەركە قورسەكان و نامەی نهێنی و تایبەت ئەویش دلێری سەید مەجیدە.

دلێری سەید مەجید، پیاوی ئەركە قورسەكان و فلتەری شۆڕش
نامەی سەرۆككۆمار بۆ مام جەلال
(11/12/1981)، دلێری سەید مەجید، ئاگاداری د.فوئاد دەكات، كە مامۆستا موحسین و شیهاب لە ڕەزایە گیراون، مەعسوم خۆی دەیگێڕێتەوە لە باسی دلێری سەید مەجید دەڵێ؛ (22/12/1981) قسەم لەگەڵیدا كرد و وتی؛ لە تارانم، نامەی سەرۆككۆمار بۆ مام جەلال دەبەم، لۆك كراوە، بەڵام نازانم چی تێدا نووسراوە، حاجی (د.موحسین ڕەفیقدۆست) وتوویەتی؛ وەزع بەرەو باشی دەڕوا، بەڵام وەزعی قیادە موەقەتە بەرەو خراپی دەچێت.
دلێری سەید مەجید، وەكو كارەكتەرێكی گەورە و كاریگەری شۆڕشی نوێ لەم كتێبەدا، باس لە ڕۆڵی ئەو و پەیوەندی تایبەتی لەگەڵ مام جەلال كراوە، بەتایبەتی لە ئەرك و بەرپرسیارە قورسەكان و زۆر تایبەتەكان، ئەو ڕای پەڕاندون.
بۆنموونە فوئاد بەمێژووی (18/12/1981) باس لەوە دەكات، دلێری سەید مەجید گەڕاوەتەوە وڵات و نامەیەكم بۆ مەكتەبی سیاسی نارد، بەڵام چاوەڕوانی هاتنەوەی بووم تا ڕەئی مەكتەبی سیاسیم بۆ بگەڕێنێتەوە.

دلێری سەید مەجید بە پارەوە گەڕایەوە
بەڵام (11/3/1981) كاك دلێر گەڕایەوە و هاتە تاران و نامەیەكی هێنابوو بۆ مام جەلال باسی مفاوەزاتیشی كرد.
لە ڕۆڵی دلێری سەید مەجید لە بەشێكی تری بیرەوەریەكەیدا د. فوئاد دەڵێ؛ (9/4/1981)، كاك دلێری سەید مەجید گەڕایەوە بە هەگبەیەكی پارە.
زۆر لە بیرەوەرییەكان دەڵێن: هەموو ئەو پارانەی لە لیبیا و سوریا و شوێنی تر بۆ یەكێتی دەهاتن، ئەم بە نهێنی و شارەزایی دەیهێنان و دەیبردن و بەنهێنی دەیگەیاندە شوێنی خۆی جا لەڕێگای كۆمەڵەی ئێران، دیموكرات، ڕەنجبەران، قاچاغەكانی سنوور، بەڵام بۆ یەكجاریش مام جەلال گلەیی لێ نەكردوە جگە لە دەستخۆشی.
زۆرینەی بیرەوەرییەكانی دوای ڕاپەڕینی كوردستان، كەم و زۆر بێ ڕۆڵی كاریگەری دلێری سەید مەجید بڵاونەكراونەتەوە، چونكە جیالەوەی یەكێك بوە لەو سەركردانەی مام جەلال زۆر سیقەو متمانەی پێ بوە، زۆرینەی كارە نهێنی و تایبەتەكانی بەو سپاردوە، ڕۆڵی گەورەشی هەبوە لە پەیداكردنی سەرمایە و پارە بۆ شۆڕش.
بۆیە گەر دیقەت بدەین لە شوێنێكی تری بیرەوەریەكەیدا د.فوئاد دەڵێ: (19/4/1981)، كاك دلێری سەید مەجید هاتبوو، نامەیەكی نەوشیروان مستەفای بۆ مام جەلال هێنابوو، نامەیەكیشی بۆ من هێنابوو، جیا لەوانە نامەیەكی تری عومەر شێخ موس-یشی هێنابوو.
نامەی سێ كارەكتەری سەرەكی و هێنان و گواستنەوەیان جگە لە باری ئەمنی، لە سیقە و متمانەش زۆر ڕۆڵی هەبوو لەلای ئەو سەركردانە، كە وایكردوە، زۆرینەی نامە تایبەتەكانی بەڕێگا و فلتەری دلێری سەید مەجیدا بڕوات، هەربۆیە دەكرێت لێرە باسی ئەو بابەت بكەین، كە زۆرجار دلێری سەید مەجید، بە (قاسەی ڕەشی شۆڕش) ناودەبرێت، لەم چەمكە، بەتەنها مەبەست دارایی و سەرمایە و پارە نییە، نەخێر، بەڵكو بەشێكی تری پەیوەندی هەیە بەو هەزاران نامە تایبەتییەی سەركردایەتی حزبەكانی كوردستان و وڵاتان و بەتایبەتی نامە زۆر و تایبەتەكانی مام جەلال و كاك نەوشیروان و زۆرینەی ڕووداوەكانی ئەو پەنجا ساڵەی ڕابردوو.

پارە و چەك بۆ ناوزەنگ
لەوەش گرنگتر، تا ئەم ساتەش، یەك دێڕ یەك، نامەی لەو نامانە و لەو نهێنیانە بڵاونەكردوەتەوە و هیچ كاتیش لە هیچ شوێن و كاتێكدا بەدژی كەس و لایەنێك بەكاری نەهێناون و خۆشی دەڵێ: "ئەوانە ئامانەتی شۆڕشن و پێویست ناكات ئێستا باسیان بكرێ و بڵاوبكرێنەوە و گەر بۆ ڕۆژگاری خۆی گونجا، ئەویش ئەگەر پێویست بوو".
ڕووداوێكی تری گرنگی ناو ئەم كتێبە، كە د.فوئاد دەیگێڕێتەوە دەڵێ: دوانیوەڕۆی ڕۆژی (20/6/1981) دلێری سەید مەجید لەسەردەشتەوە تەلەفوونی بۆ كردم وتی؛ "مام جەلال بە فڕۆكە هاتۆتە سەقز و شتوومەكەكانیش لەڕێگای زەمینی نێردراون، خۆشم هەموویم بۆ ڕێكخستوون و دەرچوونیان لە سەقزەوە بۆ نێو زەنگ.
واتا هەر بابەتێكی پارە، چەك و نامەی تایبەتی، دیداری گرنگ بوە، بە دلێری سەید مەجید سپێردراوە.
وەكو خۆشیان دەڵێن بێ سێ و دوو هەموویانی ڕاپەڕاندوە. 

نامە بۆ قەزافی و ئەسەد
باس ڕووداوێكی تر دەكات و دەڵێ: "19/9/1981 كاك دلێری سەید مەجید، نامەی مام جەلالی هێنابوو، باسی لەوەش كردوە، كە مام جەلال سێ نامەی ناردوە بۆ حافز ئەسەد و دواینیشیان بۆ لیبیا، یەكێكیان بۆ موعەمەر و قەزافی و ئەویتریان بۆ ئەبوبەكر یونس وەزیری بەرگری لیبیا".

نامەیەك بۆ خامنەئیی
هەروەكو دیارە دلێری سەید مەجید، پیاوی ئەركە قورسەكان و فلتەری ئەمنی و نامە تایبەتەكان و ڕووداوە زۆر هەستیارەكان بوە، بەپێی بۆچوونەكانی د.فوئاد بێت، چونكە لە شوێنێكی تر دەڵێت: "ڕۆژی 17/1/1982 دلێری سەید مەجید لە تاران بوو نامەیەكی مام جەلالی بردبوو بۆ خامنەئیی ڕابەری شۆڕشی ئیسلامی ئێران، لەو نامەیەدا مام جەلال نووسیویەتی: "دۆستەكانتان لێمان دوور دەكەونەوە - واتا سوریا و لیبیا-".
نامەی مام جەلال و خامنەئیی یان قەزافی و ئەسەد وەكو كەسایەتی ئەو كات و سەردەمە زۆر تایبەت و گرنگبوون و ئاماژە بوون بۆ ڕۆڵی كارا و لێزان و پڕ متمانەی دلێری سەید مەجید لای مام جەلال و سەركردایەتی (ی.ن.ك) و تا ئێستاش هەروا مایەوە.
دیقەت بدەن جیا لەوانە، هەموو زانیاریە وردەكان سەید مەجید ئاگادارییان بوە، د.فوئاد دەڵێ: "دارۆی شێخ نووری، دلێری بینیوە، پێی وتم؛ كە دلێر وتوویەتی؛ پەیوەندی لەنێوان یەكێتی و قیادە موەقەتە دروستبوە و بەمزوانەش كۆبوونەوەیەك لەنێوان هەردوولا دەستپێدەكات."
تەنانەت لە پرسە كۆمەڵایەتییەكانیش باسی ئەوە دەكات كە ڕۆڵی هەبوو.
لە ئەركێكی تری گرنگ دلێری سەید مەجید، كە د.فوئاد دەیگێڕێتەوە دەڵێ: لە (19/7/1982) دلێری سەید مەجید وتی: (كوێخا-باڵوێزی سوریا لەتاران، لیوا ئیبراهیم یونس-)، بەنسبەت عەبدولڕەزاق فەیلی نا ئومێد بوە، دلێر ئەوەشی وت كە ئێرانییەكان موافقن.
جگە لە ئەوەش ئێرانییەكان ڕازیببون، كە هێرۆخانیش بە ئێرەدا سەفەر بكات بۆ دەرەوە، بەڵام ئەوەشی وتوە كە وادیارە مەوقفی ئێرانییەكان توندتر دەبێت لەبەرامبەرمان.

دلێری سەید مەجید (400) هەزار دۆلای هێنا
وەكو پێشتر وتم: (قاسەی شۆڕش) ڕۆڵی گەورەی هەبوو لە سەرچاوەی دارایی شۆڕشدا، بۆیە د.فوئاد لە شوێنێكی تر لە كتێبی (بیرەوەرییەكانی د. فوئاد مەعسوم) باس لە بابەتێكی گرنگ دەكات كە دلێری سەید ڕای پەڕاندوە، دەڵێ: لە (15/9/1982)
كاك دلێر پارەیەكی باشی ئامادە كردبوو، ئاگاداری كردم كە (400) هەزار دۆلار گەیشتوە و وتوویەتی ڕادیۆیەكی (ئێستگە)مان بۆ پەیدا بكەن و لە شام یان تەرابلووس جیهازێك دانێن بۆ پەیوەندیەكانمان، هەوڵی نەخۆشخانەی مەیدانی بدەن، ئۆفیسێكمان دەوێت و زەمالەكان چیان بەسەرهاتوە؟، ئایا حكومەتی لیبیا خەڵكمان بۆ وەردەگرێت بۆ كولیەی عەسكەری؟
د. فوئاد دەڵێ لەبارەی كۆنفڕانس، لە دلێری سەید مەجیدم پرسی وتی: زۆر باش بوە، دەرچوەكان ئەوانەی پێشوو و عەلی بچكۆل و مامۆستا جەمال، ئەوەشی وت كە مولازم فوئاد (25) ڕۆژە بەڕێ كەوتوە، وەجبەی دووەمیش (دە) ڕۆژە بەڕێ كەوتوون.
لە شوێنێكی تر دەڵێ:
هادی لە تارانەوە تەلەفوونی بۆ كردم گووتی: (15)كەمان وەرگرت واتا (150) هەزار دۆلارەكە، دلێری سەید مەجید دەگەڕێتەوە كوردستان و دەیهێنێتەوە، ئێمە و نەسرین هەڵوێستمان یەكە.
*  *    *
عەلی عەبدوڵڵا وتی؛ قاسلوو بەكرێگیراوی بەعسە
 لە (21/12/1981) د.فوئاد لە زمانی شێخ محەمەد سەرگەڵوویی دەگێڕیتەوە؛ كە مام جەلال بەلای قاسملودا چوە و نەوشیروان-یش بەدەست خۆی عەبدوڵڵا سووری كوشتوە. عەلی عەبدوڵڵای جێگری سەرۆكی پارتی وتوویەتی؛ ئێمە شەڕی عێراق و بەكرێگیراوەكانیشیان دەكەین، كە د.قاسلوو یەكێكە لەو بەكرێگیراوانە.
لە زۆر شوێن ئەم كتێبە باسی پارە و تەخشان و پەخشانی دەكات لە شوێنێك دەڵێ: (5,000) لیرەم لە مام جەلال وەرگرت (1,400 بۆ فەرەیدوون، 1,500 بۆ عادل موراد، 10,000 بۆ منزر، 5,000 بۆ خۆم، 500 لیرە بۆ نەوشیروان)، واتا كەمترین پارەی وەرگرتوە نەوشیروان.

عادل عەبدولمەهدی نوێنەرایەتی حزبی شیوعی دەكات
(28/11/1975) كۆبوونەوەیەك لەنێوان یەكێتی و حزبی شیوعی (وحدة القاعدة) لەنێوان مام جەلال، د.فوئاد، مونزیر نەقشبەندی، عادل عەبدولمەهدی، حازم، فازیل مەلا مەحمود لە ماڵی مام جەلال كۆبوونەوە و هەر ئەو ڕۆژەش كۆمەڵێك (پ.م) بۆ مەشق گەیشتنە دیمەشق.

مەسعود بارزانی، سێ پارتی ڕایانكردوە لای ئێوەن
ڕۆژی (1/1/1977) كۆبوونەوەی نێوان مەسعود بارزانی و نەوشیروان مستەفا، د.فوئاد و د.كەمال خۆشناو بوو، سەبارەت بەو كەسانەی دەچنە لای پارتی، لە وەڵامدا مەسعود بارزانی وتی: سێ كەسی ئێمە ڕایانكردوە لای ئێوەن؟
(د.مەحمود عوسمان، شەمسەدین موفتی، قادر جەباری).

مونزیر نەقشبەندی جاسوس دەرچوو
ڕۆژی (5/2/1977) سوریا مونزیر نەقشبەندی دەستگیر كرد، بەتۆمەتی ئەوەی جاسوسی بۆ عێراق كردوە و مام جەلال لە زیندان سەردانیكرد.

پلانی كوشتنی سەدام، بە پارەی سوریا
د.فوئاد دەڵێ: ڕۆژی (15/12/1977) جانتایەكم لە پاریس لە كەسێكی موخابەراتی سووری، وەرگرت كە (جانتایەك قونبەلە، دەمانچە، ڕەشاشی بچووك،25,000 هەزار فەرەنكی فەڕەنسی) بە مەبەستی كوشتنی سەدام حسێن، كەوا بڕیار بوو سەفەری فەڕەنسا بكات، دەڵێ شتەكانم لای ئەحمەد بامەڕنی دانا، بەڵام كارەكە كرا...؟

عادل موراد، نەوشیروان دیارییەكی باشە بۆ بارزانی
د.فوئاد دەڵێ: "25/8/1981، شێخ مووس نامەی ناردبوو، كە نەوشیروان مستەفا لەلایەن حسك، و تاهیری عەلی والی دەستگیركراوە، عادل موراد تەلەفوونی بۆ ڕائید عەزیز كردبوو دڵخۆشی خۆی بە گرتنەكەی دەربڕیبوو وتوویەتی؛ نەوشیروان بۆشەڕی براكوژی چوە، وتوویەتی؛ "دیاریەكی باشە بۆ مەسعود بارزانی".

چەكی ئێران مەدەن بە كۆمەڵە
بینینی سەرۆككۆماری ئێران (بەنی سەدر)  لە (10/2/1981)، بەمەبەستی دانەوەی ئەو چەكانەی (ی.ن.ك) كە ئێران دەستی بەسەرداگرتبوون، وتوویەتی؛ دەترسین ئەو چەكانە بگاتەوە دەست كۆمەڵەی ئێران، چونكە ئێوە پەیوەندیتان لەگەڵیان هەیە، دژی خۆمان بەكاریان بهێنین.

سامی عەبدولڕەحمان لە یەكێتی نزیك دەبێتەوە
سامی عەبدولڕەحمانم بینی پاش جیابوونەوە لە پارتی و وتی؛ تووشی شەڕبووین لەگەڵ ماڵی بارزانی و كەسێكمان برینداربوو، بەڵام حەزدەكەین لە بادینان شوێنی خۆمان قائیم بكەین و لەگەڵ یەكێتی ڕێككەوتنی تایبەت ئیمزا بكەین.

قاسملوو شەڕی قیادە موەقەتە دەكات
لە (19/3/1982) قاسملوو وتوویەتی؛ گەر قیادە موەقەتە وازبێنن ئێمە ڤیتۆمان لەسەریان نییە، بەڵام گەر لە ئێران دەرنەچن، ئێمە لێیان دەدەین، چونكە پەیوەندییان لەگەڵ ئێران خراپ بوە.

د.جەعفەر شەفیعی دەچێتە لوبنان
(3/4/1982) چووینە بەیرووت لەگەڵ دارۆی شێخ نووری، د.جەعفەر شەفیعی كۆمەڵەمان بینی، ڕازیبوو لە دیدارەكە لەگەڵ جەبهەی شەعبی جۆرج حەبەشی و جەبهەی تەحریر-غوشە، دوایی د.جەعفەر وتی؛ بەنیازین حزبی كۆمەنیست-یش دروست بكەین، بەڵام دارۆ لەگەڵ د.جەعفەر لە بەیروت مایەوە بۆ هاوكاریكردنی و دوایی حزبی كۆمەنیست-یان دروستكرد.

ئیدریس بارزانی چەك و پارە لە موعەمەر قەزافی وەردەگرێت
د.فوئاد دەڵێ: (23/5/1982) زانیم كە ئیدریس بارزانی (700) هەزار دۆلاری لە لیبیا-موعەمەر قەزافی وەرگرتوە و بەڵێنی (2,500) كڵانشیكۆف و (50) ئاربی جی، (20) دۆشكە و ساروخی سترێلا وەرگرتوە، ئەوانەشی لەگەڵی بوون یەكی (1,000) كڵاشینكۆفیان وەرگرتوە.
وەفدەكە (10) كەس بوون و یەكی (7,000) دۆلاریان وەرگرتوە.

عەبدوڵڵا ئۆجەلان ئامادەی هاوكارییە
ڕۆژی (30/9/1982)، (ئاپۆ-عەبدوڵڵا ئۆجەلان)مان بینی لەگەڵ دارۆ بۆ هاوكاری نێوانمان، ئەو وتی: ئێوە چیتان دەوێ ئێمە هاوكارتان دەبین (سنوور، ناردنەوە بۆ باكوور یان ڕۆژئاوا، بەڵام لەگەڵ پارتی تەفاهم بكەن، وتی؛ دەبێ تەركیز بكەینە سەر كوردستانی عێراق، چونكە ئەساسە، دواتر گلەیی لە كەمال بورقای كرد و وتی: مانعم نییە بۆیان بنووسم ئەوان وڵات پارێزن).
پاش چەند ڕۆژێك نامەیەك هات، كە ناردنی پارە لەڕێگای دكتۆر قاسملوو و نەسرینەوە باشە.
جیالەوانە پاش ماوەیەك لە (28/4/1983)، ئۆجەلانم بینییەوە، زۆر ناڕازی بوو لە ڕەفتارەكانی قیادە موەقەتە بەنسبەت عێراق و توركیا و ئێران.

قاسملوو پیاوی عێراقە
عەبدوڵڵا ئەحمەرمان بینی، وتی؛ موشكیلەی سەرەكی قاسملوویە و ئێمە لەگەڵتان موافق نین بەرامبەر قاسملوو، چونكە بەڕەئی ئێمە بەتەواوی پیاوی عێراقە، تا عیلاقەكەتان هەبێت لەگەڵیدا زەرەر دەكەن و تكایە هێرش مەكەنە سەر ئێران.

بەرپرسێكی لیبیا، كەریم ئەحمەد، سەگبابە
(8/5/1983)، (36) كەسی حزبی شیوعی و كەریم ئەحمەد جێگری سكرتێر، ئەحمەد بانیخێڵانی كەوتە دەست یەكێتی بە دیلی، دوایی من و سامی عەبدولڕەحمان چووینە لیبیا، بەرپرسێكی لیبیا هات و دواتر وتی؛ ئەو سەگبابە، (كەریم ئەحمەد) بەرمەدەن.

جوقد و جود، یەكێتی و پارتی
(12/11/1980)، (جوقد) دروستبوو لە (28/11/1980)، (جود) درستبوو كە ئەسڵیەكەی (یەكێتی و پارتی) بوون، دوایی سۆسیالیست و شیوعی لە جوقد سڕ كران، ئێران پشتگیری جود و پارتی دەكرد، دژی یەكێتی، چونكە پشتیوانی كۆمەڵە و دیموكراتی دەكرد.
كەچی لەبەرامبەردا قاسملوو و حزبەكەی بە هێزەكەی یەكێتیان دەوت: (هێزی پشتیوان).

د.قاسملوو، گفتوگۆی یەكێتی و بەعس و ڕێكخستن
ساڵی (1983)، لەگەڵ توركیا وەزعمان خراپ بوو، لەگەڵ عێراق لەشەڕدابووین بۆ پشتیوانی لە (كۆمەڵە و دیموكرات) شەڕی ئێرانمان دەكرد، لەگەڵ ئەوەشدا (حدكا) و قاسملوو بە هێزەكانی ئێمەیان دەگوت (هێزی پشتیوان)، بەڵام بەهۆی پەیوەندی لەگەڵ (عێراق و سەدام حسێن) قاسملوو بە سەدام حسێن دەڵێ: بۆ لەگەڵ یەكێتی ڕێك ناكەون سەدام بە قاسملوو دەڵێ؛ قسەیان لەگەڵ بكە و منیش پێم باشە دووجار وەفدی حكومەت لەڕێگای قاسملوەوە هاتنە ناوزەنگ، دواجار مام جەلال چوە بەغدا و پڕۆسەكە بەردەوام بوو، عەبدوڵڵا ئەحمەر گلەیی كرد كە سوریاتان لێ ئاگادار نەكردوەتەوە، ئیمام خومەینی لەسەر ئەو بابەتە قسەی كرد، بەڵام دواتر لە (13/5/1984) مام جەلال گەڕایەوە كوردستان و (500,000) هەزار دیناری لەگەڵ خۆی هێنابوو ڕۆژی دواتریش حكومەتی بەعس (350,000) هەزار دۆلاری بۆ ناردین و نامەیەك درا بە قاسملوو بۆ گلەیی و لە (18/6/1984) وەڵامی نامەكەی هێنایەوە.
گوایە سەدام حسێن بە مام جەلالی وتوە؛ شتێكی وات بۆ دەكەم لە نێو كوردان سەرت بەرز بكاتەوە.
ڕۆژێك مام جەلال بە عیزەدووری دەڵێت: وەفدێكی توركیا لە بەغدایە، پەیوەندی بە ئێمەوە هەیە، دەڵێ؛ عیزەت دووری جوێنێكی بە توركیا و تورك دا.