وتار

محەمەد فاتیح

چیتر شكۆی پێنوس مه‌شكێنن

22/04/2020


رۆژنامه‌نوس ناوی ده‌سه‌ڵاتی چواره‌می لێنراوه‌ و له‌ وڵاته‌ پێشكه‌وتوه‌كان پێگه‌یه‌كی تایبه‌تیان هه‌یه‌ و هه‌میشه‌ سه‌رچاوه‌ی زانیاری راست و دروستن و به‌بێ ترس و دڵه‌راوكێ هه‌موو روداو و بابه‌ته‌كان رۆماڵده‌كه‌ن و ئاشكرایان ده‌كه‌ن .
به‌ڵام لای ئێمه‌ یادی رۆژنامه‌گه‌ری كوردی ته‌نها به‌پیرۆزیایی ده‌كرێته‌وه‌ ، به‌بێ ئه‌وه‌ی ره‌چاوی مافه‌كانی رۆژنامه‌نوس بكه‌ن و ده‌سته‌به‌ری بكه‌ن ، هه‌ر بگره‌ له‌ زۆر بابه‌تا ده‌م به‌ستراو و  ده‌ست و پێ به‌ستراوین ، ته‌نانه‌ت ناتوانین بچوكترین گه‌نده‌ڵی به‌رپرسه‌كان ئاشكرا بكه‌ین ، یان ئه‌وه‌تا راپێچی دادگا ده‌كرێین یان روبه‌ڕوی سوكایه‌تی و تێهه‌ڵدان ده‌بینه‌وه‌ ، یانیش ژیانمان ده‌كه‌وێته‌ مه‌ترسیه‌وه‌ و له‌لاكۆڵانیه‌كدا ده‌كوژرێین ! ، نمونه‌شمان زۆره‌ ، له‌وانه‌ چه‌ند رۆژنامه‌نوسێكی بوێر كه‌ چمكێك له‌ راستیه‌كانیان ئاشكرا كرد و بۆ تا ئه‌به‌د بێده‌نگیان كردن !
 دواتر تاكو ئێستاش لایانا به‌رپرس و په‌یوه‌ندیداره‌كان نه‌گه‌یشتونه‌ته‌ هیچ ئه‌نجامێك و بكوژه‌كانیانیان ده‌ستگیرنه‌كردوه‌ و گوایه‌ كه‌س نازانێت له‌لایان كێوه‌ كوژراون ، هه‌رچه‌نده‌ له‌لای ئێمه‌ رون و ئاشكرایه‌ ، به‌ڵام دووباره‌ ئه‌مانكه‌ن به‌ تاوانبار ئه‌گه‌ر به‌بێ به‌ڵگه‌ ئه‌م و ئه‌و تاوانبار بكه‌ین !
یادی رۆژی رۆژنامه‌گه‌ری كوردیمان لێپیرۆز ده‌كه‌ن و ئه‌گه‌ر راستیه‌كانیش بدركێنین زمانمان ده‌بڕن !
ناتوانم بڵێم ئێمه‌ ئازادنین ، به‌ڵام تا ئه‌و سنوره‌ ئازادین كه‌ ناوی به‌رپرسێك ئاشكرا نه‌كه‌ین كه‌ تێوه‌گلابێت له‌ گه‌نده‌ڵی ، یان له‌ كوشتن و شتی خراپ و ناشرین !
له‌یادی 122 ساڵه‌ی ڕۆژنامه‌گه‌ری كوردیدا ، پیرۆزباییمان لێمه‌كه‌ن ، ده‌ستكراوه‌ و ده‌مكراوه‌مان كه‌ن و رێگه‌خۆشكه‌رمان بن بۆ گه‌یشتن به‌ زانیاریه‌كان و بڵاوكردنه‌وه‌یان !
له‌یادی 122 ساڵه‌ی ڕۆژنامه‌گه‌ری كوردیدا چیتر پێنوسه‌كانمان مه‌كه‌ن به‌ كۆیله‌ی خۆتان ، چیتر پێنوسه‌كانمان زیندانی مه‌كه‌ن و خه‌ڵتانی خوێنیان مه‌كه‌ن !
تاكو ئێستاش به‌بێ بڕیاری دادوه‌ر رۆژنامه‌نوسانمان زیندانی ده‌كرێت و سوكایه‌تی پێده‌كرێت !
ئه‌گه‌ر بێینه‌ سه‌ر باسی مافه‌كانی دیكه‌شمان وه‌كو وه‌رگرتنی پارچه‌ زه‌ویی و دابین كردنی موچه‌ و كردنه‌وه‌ی خول و هتد ، له‌م روه‌شه‌وه‌ دیسانه‌وه‌ مافه‌كانمان پێشێلكراوه‌ و قه‌ڵه‌مه‌كانی سه‌ربه‌خۆیان له‌پێشترن و ته‌نها ئه‌وان جێی بایه‌خ و گرنگی پێدانن !
ئه‌ی ئاباشه‌ ئه‌م هه‌مو سه‌ندیكا و رێكخراوانای كه‌ به‌ حیساب داكۆكی له‌ مافی ئێمه‌ ده‌كه‌ن ، ئیشیان چیه‌ ؟ ، ته‌نانه‌ت لایانه‌ په‌یوه‌ندیداره‌كانی په‌رله‌مانیش تاكو ئێستا پڕۆژه‌یه‌كی به‌و جۆره‌یان پێشكه‌ش نه‌كردوه‌ یاخود په‌سه‌ند نه‌كردوه‌ كه‌ له‌به‌رژه‌وه‌ندی رۆژنامه‌نوسان بێت .
وه‌ك ناتوانن بكوژی رۆژنامه‌نووسه‌ بوێره‌كانمان ئاشكرابكه‌ن كه‌ روحی خۆیان به‌ختكرد له‌پێناو هێنانه‌ دی ژیانێكی ئازاد و خۆشگوزه‌ران بۆ میله‌تی كورد ، ئه‌ی خۆ له‌مافه‌ سه‌ره‌تایه‌كانیشدا وه‌ك دابه‌شكردنی زه‌وی ، به‌هه‌مان شێوه‌ به‌به‌رچاوی ئه‌وانه‌وه‌ هه‌زاره‌ها رۆژنامه‌نوسی شایسته‌ بێبه‌شكراوه‌ و زۆربه‌ی هه‌ر زۆری دیسانه‌وه‌ ئه‌و رۆژنامه‌نوسانه‌ ده‌گرێته‌وه‌ كه‌ له‌ حزبه‌كانی ده‌سه‌ڵاته‌وه‌ نزیكن !
سه‌نته‌ری میترۆ بۆ داكۆكی له‌ مافی رۆژنامه‌نوسان رایگه‌یاند "له‌ساڵی 2019دا به‌شێوه‌یه‌كی گشتی 231 پێشێلكاری به‌رانبه‌ر به‌ 209 رۆژنامه‌نوس و ده‌زگای راگه‌یاندن له‌ هه‌رێمی كوردستاندا كراوه‌".
دیار حاجی محه‌مه‌د به‌ڕێوه‌به‌ری سه‌نته‌ری میترۆ رونیكرده‌وه‌ "زۆربه‌ی پێشێلكاریه‌كانی 2019 بریتین له‌ رێگری له‌ روماڵكردن و جیاكاری له‌نێوان كه‌ناڵه‌كانی راگه‌یاندندا، هه‌روه‌ها تۆماركردنی هه‌ڕه‌شه‌و لێدان و ترساندن به‌رامبه‌ر به‌ رۆژنامه‌نوسان، ده‌ستبه‌سه‌ركردنی رۆژنامه‌نوسان به‌بێ‌ بڕیاری دادگا، دادگاییكردنی رۆژنامه‌نوسان به‌ده‌ر له‌ یاسای ژماره‌ 35ی ساڵی 2007، داخستنی كه‌ناڵ و راگرتنی په‌خشی كه‌ناڵمان هه‌بوه‌، به‌شێوه‌یه‌كی گشتی ره‌وشی ئازادی رۆژنامه‌نوسی یان ژینگه‌ی كاری رۆژنامه‌نوسی له‌ هه‌رێمی كوردستاندا ژینگه‌یه‌كی باش نییه‌".
به‌درخانیه‌كان رۆژنامه‌ی كوردیان بۆ ئه‌وه‌ دانه‌مه‌زراند ، كه‌ سوكایه‌تی به‌رۆژنامه‌نوسان بكرێت و لێیان بدرێت و بتۆقێندرێن و مافیان پێشێلبكرێت !
پێنوس پیرۆزه‌ ته‌نانه‌ت خواش رێزی له‌ پێنوس گرتوه‌ و سوره‌تێكی به‌ناو پێنوس ( القلم ) له‌ قورئانی پێرۆزدا دابه‌زاندوه‌ ، ده‌ی ئێوه‌ش رێزی لێبگرن و چیتر شكۆی پێنوس مه‌شكێنن !

وتاری زیاتر

به‌ته‌نها ده‌ستی مامۆستاكه‌ نا، ده‌ستی هه‌مومان به‌ستراوه‌یه‌

محەمەد فاتیح

ئه‌لشه‌رقوئه‌وسه‌خ (رۆژهه‌ڵاتی پیس)

محەمەد فاتیح

سه‌ركوتكردن له‌ سایه‌ی ئازادی و دیموكراسیدا

محەمەد فاتیح

​جیاوازی زاناکانی ئەوان و زاناکانی ئێمە

محەمەد فاتیح

بۆچی یاسایه‌ك نیه‌ بۆ لێپرسینه‌وه‌ له‌ ده‌سه‌ڵاتدارانی هه‌رێم؟

محەمەد فاتیح

دێرین عزەدین

تکایە ئاگاداری هاوژینەکەتان بن..

بارزان شێخ عوسمان

لە پەراوێزی پەلامارە تێرۆریستییەکەی فرەنسادا

رزگار حاجی حەمید

دەسەڵاتی پاشایەتی لە عیراقدا و مەرگی پاشاكان (باپیر و باوك و كوڕ)

رزگار حاجی حەمید

ڕۆڵی وڵاتانی دەوروبەر لە ململانێی مەزهەبییەكانی عیراقدا

گوڵزار حەمە فەرەج

بەرھەمەکانی شێخ سەلام و گەوھەری یەکتا

مامۆستا بورهان

ھەندێک لە دیاردەکانی دوای شەڕی جیھانی یەکەم

کەمال محەمەد

موبیلیزەكردنی پەرلەمان

فەریق حەبیب

حه‌شدی‌ شه‌عبی‌ له‌به‌رده‌م چه‌كوشه‌كه‌ی‌ مسته‌فا كازمیدا

ئەحمەد محەمەد سەعید

سەندیکای کرێکاران بۆچی؟

رزگار حاجی حەمید

پەیماننامەی ساڵی 1930 و كاردانەوەی لەسەر كورد

چێنەر شەرعی

ڕیفراندۆم و لێکەوتەکانی

سامان سنجاوی

لەبری بیرەوەری، هەڵسەنگاندنی روناکبیران و جنێوه‌ كۆمێنتی هەواداران

کەمال محەمەد

سلێمانی، شاری شۆڕش و بریسكە ڕۆشنبیرییەكان

نەشوان ئەحمەد سەعید

كەفوكوڵی گۆران و گۆرانخوازان تا یٔێرە بو!

رزگار حاجی حەمید

دەڤەری كفری لە پێشوازی شێخ مەحمود دا

کەمال محەمەد

رەهەندەكان لە راستینەیی كورددا... كۆمەڵایەتی، كەلتوری

نەشوان ئەحمەد سەعید

مەلا بەختیار، پێویستی بە مەندوب نیە!

بارزان شێخ عوسمان

لەپەراوێزی پێشنیازە قانونییە هەڵپەسێراوەکەی رێكخستنی میدیای یٔەلکترۆنی

نسار مستەفا

شوێنەواری هەڵبژاردنەكان

ئەحمەد محەمەد سەعید

کرێکارو خاوەنکار لەقانونەکانی ناپلیۆندا