چاودێری سایت؛ چۆن چاو ئەدێرێ‌!

مەلا بەختیار 04/08/2018




چاودێری رۆژنامە، پێش چاودێری سایت، لە (4/10/2004) چاوی بەدونیای سیاسەت‌و رۆژنامەگەری‌و روناكبیری‌و رۆشنگەریدا، دەدێرا. پاشان، سایتی چاودێر. تەمەنی رۆژنامەی چاودێر، (13) ساڵ‌و (6)مانگ بوو، (651) ژمارەشی لێدەرچێنرا. نەبونیی پێیداخستین‌و، بەداخستنیشی رەخنە ناڕاستەكانمان كپكردەوە، كە پێیانوابوو، بۆ چاودێر رژاوە. رێك پێچەوانەكەی وا بوو. جگەلەوەی یەكێتی بەسوپاسەوە درێغی لەگەڵ نەدەكردین، بەڵام كە یەكێتی كەوتە تەنگژەی داراییەوە، چاودێریش ئاستەنگی زۆر بۆ هاتەپێش. تەنانەت بە سپۆنسەرو هاوكاری سەرمایەداری تێگەیشتوی روناكبیری نەبوایە، دەمێك بوو ناچاری داخستنی دەبوین. قەرزاریشین‌و بەهیواین بتوانین قەرەبوی بكەینەوە.
سەبارەت بە چاودێری رۆژنامە، لەیەكەم ژمارەوە هەتا دوا ژمارە، پەیامی خۆی بردەسەر كە گوتمان: لیبرالی ناڤینین. واتا: نە شەتەكدراوی دەسەڵات‌و نە رێبازی رۆژنامەگەری بێدەربەست. هەڵسەنگاندنی رادەی ئازادی‌و، رەخنەی ئەقڵانی‌و، دەربەستی رۆشنگەری‌و سیكولاریزم، بۆ توێژەرانی بواری رۆژنامەگەری جێدێڵم. بەڵام ئەو رۆژەی وەكو سەرنوسەر، بڕیاری داخستنی كاتیی رۆژنامەكەم دا، كەوتمە خەیاڵی رۆژانی دەرچواندنی یەكەمین ژمارەو ناولێنانی رۆژنامەكە، بەویژدانی ئاسودەوە، گەیشتمە ئەو باوەڕە، كە هەمووان، ستافی چاودێر، پابەندی پەیامی "چاودێر"ی چاودێر بوین. چاومان بە ژیری دەدێرا، هەتا، نەریتێكی نوێی رۆژنامەیەكی لیبراڵ ناڤین، بخەینە سەر خەرمانەی رۆژنامەگەری. كورتیەكەی ناولێنانەكەی بە"چاودێر" بەفیڕۆ نەچوو.
دڵنیابن، كە وزەی داراییمان بێتەوە بەر، ئەو رێچكەیە بەرنادەین. پێشمانوایە زۆری نەماوە، بۆ كوردستان، دیسان دەربكەوێتەوە، نوسەرو نوسینی ئەقڵانی رەخنەگر، چەند گرنگە. چەندین گرنگترە، پابەندی دیموكراسی كۆمەڵایەتی‌و تێگەیاندنی رای گشتی بین.. كە ئەویش، بە فەلسەفەی رۆشنگەری دەكرێ‌، لەبەرامبەر هەژمونگەری كۆنەپەرست‌و كۆنەپارێزانی مەزهەبی‌و كۆمەڵایەتیدا.
ئێستا كە سایتی چاودێر، بە پەرەپێدراوی، ئەركی چاودێری پێپەری رادەپەڕێنێ‌، دەمانەوێ‌ دوای ئەزمونێكی دەوڵەمەند لەسەر فەلسەفەی لیبرالیزمی رۆژنامەگەری ناڤین، بڵێم؛ ئێمە لەسەر  فەلسەفەی دەربەستی رۆژنامەگەری، كە چاودێرانی رەخنەگرانەی ئەقڵانییە، دوور لە زۆربەركێ‌ (مزایدە) بەردەوام دەبین. بەهیواین، ئەوانەی سەرگەرمی توێژینەوەو تێزن لەبواری رۆژنامەگەریدا، بەراوردكارییەك لەنێوان پەیامە جیاوازەكانی رۆژنامەو گۆڤارەكاندا بكەن، هەتا بزانن، كام رێبازی رۆژنامەگەری، فەلسەفەكەی بۆ ستراتیژی دیموكراسی‌و بونیاتنانی كۆمەڵی مەدەنی، میتۆدی زانستی‌و پشوودرێژیی هەبووە. كامانەشیان، زیانیان زۆرتر بووە. لەخۆڕا نەبووە:
-رۆژنامەی لایەنی سیاسی، كە پەكی لەسەر توانای دارایی نەدەكەوت، رۆژنامەكەی داخست‌و دەركەوت شكستی لە بەدیهێنانی پەیامەكەیدا هێنا.
-گۆڤاری جۆراوجۆرـ دادەخران‌و نەیاندەتوانی بە ژمارەی پەنجەی دەستێكیش، بەردەوام بن.
-تەلەفزیۆنەكان.. لەبەر بێ فەلسەفەی میدیایی هاوچەرخ، كەمترین بینەریان هەیەو هەندێكیان بون بە بار بەسەر خاوەنەكانیانەوە.
-رۆژنامەی بەناو ئەهلی، ناوبەناو دادەخرێن، یان بازاڕیان كز بوو.. مەگەر بە داهاتی ریكلام ببرێن بەڕێوە.
-دەیان نوسەر، كە سایكۆلۆژیەتی دۆخی سیاسی نالەباریان كردبووە هەوێنی رەخنەئاژن كردنی سەرجەم ئەزمونەكەمان، ئەمانیش، فەلسەفەی كۆپیگەراییان شكستیخواردو خۆشیان لەناو خۆیاندا، یەك دەخۆنەوە.

مێژوو، نە بۆ دەسەڵاتەكان‌و، نە بۆ هێزە سیاسیەكان‌و، نە بۆ رێكخراوەكان‌و، نە بۆ نوسەرانیش، هەتا سەر چەواشەناكرێ‌. راستیەكان هەر دەردەكەون‌و چەواشەكارانیش ئاوای روداوەكان دەبن.
سایتی چاودێر؛ بەڵێن دەدات، چاوی ویژدان‌و ئاكاری میدیایی، بە دەوروبەدا بگێڕێ‌.. بە هەڵە بڵێ‌ هەڵە و بە راستیش بڵێ‌ راست. نە چاوی لەئاستی راستیەكاندا دادەخات‌و، نە راستیەكانیش بە مەرام دزێو دەكات!
وەكو هەندێك سایت‌و پەیج‌و نوسەر، پەلەمان نییە‌و بە پارەی سپۆنسەر نافڕین.. دەمانەوێ‌ بە پەیامە فەلسەفیەكەمان، ئارام ئارام، بە ئاسمانی رۆژنامەگەریدا، لەشەقەی باڵی راستیەكان بدەین‌و رەخنەكانمان بونیاتنەرانە بێ‌.. نەك روخێنەرانە.
وا كەوتوینەڕێ‌.. ئومێدەوارین، چەند ساڵێكی دیكە، چاودێری سایتیش بتوانێ‌، شوێنێكی شیاو بۆ فەلسەفەی ناڤینی رۆژنامەگەری، لەجیهانی پڕ لە جەنجاڵی میدیای ئەلكترۆنیدا، دابین بكات.