رەخنەی چاودێر

نوێترین شیعری سامی هادی

23/10/2020

 

 

جگە لە شتە ونبوەكانی نێوانمان
چیتر ماوە كۆی بكەینەوە
شار بە ڕەشەبا داپۆشراوە
دیوارەكان پڕن لەوێنەی ئەو مناڵانەی
باڵیان هەیەو ناتوانن بفڕن
..لەم یەكشەممەیەدا
نازانم بۆ ناوی هەموو درەختەكانم
.بیرچۆتەوە
هەینی بۆنی دار چوالەكانم بیرە
بەڵام، بۆ كۆكردنەوەی زەمەنی گوڵەكان
بە پێكەنینەوە.. وردە بەردم خستبوە گیرفانم
دەزانم، ئاو نەبۆنی هەیە نەڕەنگ.. هتد
تۆ بڵێی تیمساحیش، بەو ئیحساسەوە
سەیری ئاو بكات؟
جگە لە خۆم
لەو پێنج شەممەی دوای عەسرێکی درەنگ
بیر لە كۆكردنەوەی كام وەرز بكەمەوە؟
داوای لێبوردنیش
لەو ژنە بكەم، لەسەفەرێک لە سەفەرەكاندا
ویستی لەگەڵما بخەوێت
شەرمەكانم بیری بردمەوە