سوودە تەندروستییەكانی توو

تەندروستی 20/05/2020


چاودێر:


 توو یەكێكە لە میوەكانی وەرزی بەهار و سەرەتای هاوین كە پزیشكە پسپۆڕەكان كۆكن لە سەر سوودەكانی بۆ تەندروستی مرۆڤ  و هەروەها  بەپێ جۆری رەنگی توو ( رەش ، سور، سپی) سودی زیاتری هەیە، لەبەر ئەم هۆكارانەیە پێویستە  گرنگی بەخواردنی توو بدرێت، لەوانەش :
1. پاراستنی تەندروستی دڵ و خۆپاراستن لە نەخۆشی دڵ وەك جەڵتەی دڵ و نەخۆشی تەسك بوونەوەی خوێنبەرەكان ۰
2. یارمەتی دابەزینی كولیستڕۆڵی خراپ دەدات لە خوێن دا ۰ 
3.ڕێگری كردن لە نەخۆشی شێرپەنجە بە هەموو جۆرەكانیەوە، چونكە دەوڵەمەندە بە چەندین ماددە دژە ئۆكسانەكان و كۆئەندامی بەرگری لەش بەهێز دەكات ۰ 
4.یارمەتی دابەزینی فشاری خوێن دەدات ۰ 
5.بۆ خانمانی دوو گیان و كۆرپەلەی ناوسكی زۆر بەكەڵكە، چونكە ڕێگری دەكات لە تووش بوون بە هەوكردن و دەوڵەمەندە بە ڤیتامین و كانزا و ماددە خۆراكیە جیاوازەكانی تر ، هەروەها ڕێگری دەكات لە مناڵ لەبارچوون ۰ 
6. چارەسەركردنی كەمی ماددەی ئاسن و كەم خوێنی و ڕێگرتن لێی بە تایبەت تووی ڕەش۰ 
7.پاراستنی تەندروستی چاو و بەهێز كردنی بینین و خۆپاراستن لە شەوكوێری ۰ 
8. بەهێزكردنی خانەكانی مێشك و دەمار و كەمكردنەوەی ئەگەری ئەلزەهایمەر ۰ 
9.چارەسەری قەبزی و ڕێگە گرتن لێی و چالاك كردن و پاككردنەوەی ڕێخۆڵە لە ماددە ژەهراویەكان و كەمكردنەوەی غازات ؛ هەروەها شەربەتەكەی زۆر باشە لە كاتی سك چوون ۰ 
10.پاراستنی لەش لە هەوكردن بە تایبەت هەوكردنی گورچیلە و میزەڵدان و نەخۆشی ڕۆماتیزمی جومگەكان ۰ 
11. بەهێزكردنی توانای سێكسی لە هەر دوو ڕەگەزدا لەگەڵ زیادكردنی ژمارەی سپێرمەكان لە پیاوان دا ۰ 
12.بەهێزكردنی مووەكانی قژ و پاراستن لە سپی بوون و هەڵوەرینی قژ ۰ 
13.پاراستنی تەندروستی پێست و گەش بوونەوەی و نەهێشتنی چرچ و لۆچ و خاڵ و زیپكە و سیسی دەم و چاو 

ئایا تووی ڕەش باشترە یان سپی یان سوور؟

 هەموو جۆرەكانی توو هەمان سوودی تەندروستی هەیە، بەڵام هەر ڕەنگێك سوودی زیاتری هەیە:
۱ ــ تووی سپی : یارمەتی دابەزینی تا دەدات لەگەڵ یارمەتی چارەكردنی دڵەكزێ و ئازاری گەددە و كێشەكانی جگەر ۰ 
۲ ــ تووی سوور : چونكە وزەی كەم تێدایە بۆیە كەڵكی هەیە لە كاتی ڕێجیم و دابەزینی كێش ، یارمەتی ڕێك كردنەوەی لێدانی و پێك هێنانی ئێسقان دەدات لەگەڵ خۆپاراستن لە هەڵامەت و ئەنفلۆنزا ۰ 
۳ ـــ تووی ڕەش : ڕێگری كردن لە خۆێنبەربوونی پووك و كەم خوێنی و كەمی ماددەی ئاسن ، بەڵام زۆر گرنگە ئەو كەسانەی دەرمانی دژی مەینی خوێن وەرئەگرن دژی جەڵتە وەك وارڤارین و هیپارین پێویستە ڕەنگەكانی تری لێبخۆن ۰ 

سەرچاوە: د. كامەران ڕەسوڵ ژاژڵەیی 
پسپۆڕی زانستی خۆراك