مزەفەر نەواب، شاعیرو شۆڕشگێڕی عەرەب، لە سلێمانی دەدرەوشێتەوە
بە دروشمی (مزەفەر نەواب لە ویژدانماندا دەدرەوشێتەوە) رۆژی 22ی ئەم مانگە، بنکەی روناکبیریی گەلاوێژ، لە مەراسیمێکی ئەدەبی و روناکبیریدا، رێز لە شاعیر و شۆڕشگێڕی عەرەب، مزەفەر نەواب دەنێت.
لەو مەراسیمەدا، کە یەک رۆژ دەخایەنێت، چەند توێژینەوەیەکی گرنگ دەربارەی مزەفەر نەواب لە لایەن توێژەرانی پسپۆڕەوە پێشکەش دەکرێن، لەوانە: پ.د قاسم حسێن ساڵح، د. عەمار عەبدولباقی. غەزای درع التائی، د. قەحتان جاسم جەواد، د. سەعد حەسەنی، کازم غەیلان.
جگە لە پێشکەشکردنی ئەو توێژینەوانە، چەندین کەسێتی و روناکبیری عەرەب و بیانی لە دەرەوەو ناوەوەی عێراق، بانگێشتی مەراسیمەکە کراون.
مەراسیمەکە سەعات دووی پاشنیوەڕۆ لە هۆڵی عیزەدین مستەفا رەسوڵ لە هۆتێل گراند ملینیۆم، دەستپێدەکات و چەند بڕگەیەکی گۆرانی و خوێندنەوەی شیعریش لەخۆدەگرێت.
