رەخنەی چاودێر

خۆشم دەوێیت ... ‎

پێش 2 هەفتە

خۆشم دەوێیت ... ‎

 

ئەمە شیعرێكی وریا مەزهەر شاعیر و چیرۆكنووسی (كورد_فارس) ە ئەو 29.2.1976 لەدایكبووە، 26.4.2011 لەتەمەنی 35 ساڵیدا لە شاری هێلنسكی خۆی كوشت و لە گۆڕستانی کێڵۆنومێن هاوتاوسما) ی هێلنسكی بەخاك سپێردرا. وریا دەربارەی ئامادە نەبوون، دەربارەی ونبوون و پەرتبوون و بێ یەكی دەینووسی.. ئەم شیعرەی وریا لەهەمان فەزاو جێگا دەدوێت كە بۆشاییە، كە تەنیایی و غەمگینییەكی قورسە. ڕەخنەی چاودێر جارێكی تر ئەم شیعرە بۆ خوێنەرانی بڵاو دەكاتەوە.

 

 

 

خۆشم دەوێیت ... ‎

چونکە نازانم برینی چەند چەقۆی لەعنەتی بە سنگتەوەیە و

‎ئێستا لەسەر تەختی کام نەخۆشخانە مردوویت یان

لە دایک بوویت،

‎چونکە ناتناسم،

تەنانەت نەمبینیوی (یان بینیومی و نەمناسیویتەوە)، ‎

خۆشم دەوێیت بە هۆکاری زۆر شتی تر ‎

کە بە پێویستی نازانم بیانڵێم

‎نا... پێویست نییە، هیچ شتێک پێویست نییە

‎پێویست نییە بڵێم: درەنگە، سبەی زوو وانەم هەیە

‎پێویست نییە بڵێم: خۆشم دەوێیت

‎پێویست نییە بڵێم: پێویست نییە ‎ها؟...

نا، هیچم نییە ‎تەنھا کەمێک ماندووم ‎

دەبێت بچم بخەوم

‎ئێستا تۆش وەکو هەمیشە لوتف بنوێنە و مەیە خەونم ..