هۆكار و نیشانەكانی بەردی زارو لەگەڵ چارەسەرەكە بزانە

تەندروستی 20/11/2019

چاودێر- تابان رەزا
بەردی زراو یەكێكە لەنەخۆشیە باوەكانی ناو خەڵك، كە بەوە ناسراوە كە بەرێكەوێت نیشانەكانی  دەردەكەوێت، لە هەموو تەمەنێك ئەگەری توشبون بە بەردی زراو هەیە، رێژەی توشبون لەژناندا زۆرترە ، ئەوەش بەهۆی گۆرانكاری  لەهۆڕمۆنەكان و بەكارهێنانی حەبی مەنعە، پزیشكێكی پسپۆریش دەڵێت"  ئەوانەی قەڵەون ئەگەری توشبونیان زیاترە بە بەردی زراو"

 بەردی زراو بەڕێكەوت دەردەكەوێت
د. بەرهەم محەمەد، پسپۆڕی نەشتەرگەری گشتی‌و لابردنی  زراو بەنازۆر، بۆ چاودێر دەڵێت" زراو یان شلەی زراو، بریتیە لەو مادەیەی كە لەجگەردا دروستدەبێت‌و پێكهاتەكەی بریتیە لە چەوری‌و خوێكان‌و ئاو، هەروەها لەمادەی گلوربین كەئەمانە هەمویان بەم پێكهاتەیەوە یارمەتی هەرسكردنی چەوریەكانی ناو ریخۆڵەكان دەدەن  كاتێك دەڕژێتە دوانزەگرێوە، كە لە 80-85%ی  بەردی زراو بەڕێكەوت دەردەكەوێت كاتێك نەخۆش  سۆنەردەكات بۆ نەخۆشیەكی تری وەك گورچیلە و كاتی سكپڕی‌و  دەردەكەوێت كەبەردی زراوی هەیە"

نیشانەكانی بەردی زراو چین
ئەو پزیشكە،  باس لەوە دەكات، لە 15-20% ی نەخۆشەكان  بەئازاری بەشی  سەرەوەی سكیان دێن‌و سەرشانی راستیان‌و بەینی هەردوو دەفەی شانیان‌و  هەروەها دڵ تێكەڵ هاتنیان لەگەڵدا دەبێت، ئەگەر ماكەكانی بەردی زراو دەركەوێ‌و دابەزێتە بۆری زراو یان جۆگەی زراوەوە دەبێتە هۆی توشبون بەزردوویی‌و  لەرزو تا‌و  جاری وەهاش هەیە دەبێتە هەوكردنی  كتوپڕی پەنكریاس.

كێین ئەوانەی توشی بەردی زراو دەبن؟
د. بەرهەم محەمەد جەختی لەوەشكردەوە،رێژەی توشبونی بەردی زراو لەژناندا زۆرترە تا پێنج ژن توش دەبێت یەك پیاو توش دەبێت، ئەویش بەهۆی گۆرانكاری  هۆڕمۆنەكان‌و بەكارهێنانی حەبی مەنع ‌و چەوری‌و قەڵەویش دەوری خۆیە هەیە لەدروستبونی بەردی زراو،  ئەم نەخۆشیە زیاتر لەتەمەنی 20 بۆ50 ساڵیەوە دەردەكەوێت، بەڵام هەموو تەمەنێك ئەگەری توشبونی هەیە، ئەوانەی كە لەمنداڵیدا توشیان دەبێت، بەهۆی كێشەی خوێنەوەیە.
هۆكارەكانی توشبون بە بەردی زراو 
پزیشكەكە ئەوەشی ووت،  ئەو هۆكارانەی كە دەركەتوە بۆ دروستبونی بەردی زراو،  بۆماوەیی كەلەناو خێزانەكان هەیە، نەخۆشی تێكشانی خوێن‌و ئەوانەی توشی تالاسیما دەبن، یان بەكارهێنانی حەبی مەنع‌و  منداڵبوونی زۆر،ئەوانەی قەڵەون ئەگەری توشبونیان زیاترە بە بەردی زراو، یان ئەوانەی كە بەماوەیەكی كەم كێشیان دادەبەزێنن  ".  
چارەسەرەكان چین
ناوبراو، جەختی لەوەكردەوە، ئەگەر بەردی زراوەكە كێشەی نەبێت ئەوە تەنها  چاودێری دەكرێت‌و پێویست بەدەرمان ناكات، بەڵام ئەگەر كێشەی دروستكردبێت بۆ نەخۆشەكە ئازاری زۆربێت  یاخود توشی زەردوویی یان هەوكردنی پەنكریاس بكات‌و بەردەكانی   هاتبێتە بۆری زراوەوە  یاخود ئەگەر بەردەكە  قەبارەی گەورەبو لەسەرو سێ سانتیمەوە بێتە ئەوا  چارەسەرەكەی بریتیە لەنەشتەرگەری بەهەناوبین( نازۆر).
وتیشی" ئەگەر بەسۆنەر دەربكەوێت دیواری زراو ئەستور بوبێت  ئاو لەدووروبەری زراوەكە  كۆبۆتەوە بەردەكەی چەقیوە ئەوكاتە دەبێت نەشتەرگەری بكرێت،  لابردنی زراوەكە  ئەوەی ئێستا كە دیارە زیاتر بەنازۆر لادەبرێت". 
ئایا شێرپەنجەی زراو تاچەند مەترسیدارە
د. بەرهەم محەمەد، رونیكردەوە، شێرپەنجەی زراو یەكێكە لەشێرپەنجە زۆر هارەكان  كەلە ماوەیەكی كورتدا نەخۆش جاری واهەیە گیان لەدەستدەدات، هەروەها لەوشێرپەنجانەی زۆر  ئەنجامەكەیان باشنیە‌و لەتەمەنی پیریدا زیاترە، ئەگەر لەقۆناغی یەكەمی نەخۆشیەكەدا  بتوانرێت  دیاری بكرێت  كە ئەویش كاتێك دەزانرێت كە بەنەشتەرگەری زراو لابراوە بەنازۆر،  كەدەرچوە  نێدراوە بۆزەرع  دەركەوتوە نەشتەرگەری بۆكراوە، ئەوكات هیچ پێویست بە نەشتەرگەری تر ناكات، بەڵام ئەگەر قۆناغی دو‌و و  سێ بو دەبێت لەدوای لابردنیشی بە نازۆر  بەشێك لەجگەری لاببرێت بۆئەوەی نەخۆشیەكە بەگیاندا بڵاو نەبێتەوە.