وەرزش

هازارد: لە یەكەم دێربی لالیگا هەڕەشە لە ئەتلەتیكۆ مەدرید دەكات

26/09/2019

لەگەڕی حەوتەمی خولی لالیگا ئیدین هازارد یاریزانی هەڵبژاردەی بەلژیكاو یانەی ریاڵمەدریدی ئیسپانی یەكەم یاری دێربی خۆی بەرامبەر یانەی ئەتلەتیكۆ مەدرید ئەنجام دەدات.
هازارد بەنیازە لەو یاریەدا تۆڕی گۆڵپارێز یانەی ئەتلەتیكۆمەدرید یان ئۆبلاك بهەژێنێت و بردنەوەیەكی گرنگ بۆ یانەی شاهانە دەستبەر بكات. كە بڕیارە شەوی شەممەی داهاتو سەعات 10 شەو لە یاریگای واندا متروبولیتانو ئەتلەتیكۆ ئەنجام بدرێت.
هازارد لە لێدوانێكیدا رایگەیاند: دەزانم هەستەكان چۆنن لەو جۆرە یاریانەدا بەتایبەتی هاندەرانی یانەی ركابەر، چونكە هەردو یانە دانیشتوی یەك شارن كە مەدریدی پایتەختە.
وتیشی: دەمەوێت گۆڵ تۆمار بكەم و بردنەوە مسۆگەر بكەم، هاندەرانی یانەی ریاڵ لە یاری دێربیدا دڵخۆش بكەم، وتیشی خۆم بەشێوەیەكی ئاسایی بۆ ئەو یاریە ئامادە كردوەو پێویستە پێش یاریەكە تەركیزی تەواو هەبێت بۆ ئەوەی بتوانم ئەركی خۆم لە یاریگادا بە باشی جێبەجێ‌ بكەم.
جێی ئاماژەیە، لەو یاریەدا هازارد روبەڕوی هاوڕێی پێشوی دیگۆ كۆستای بەرەگەز بەرازیلی دەبێتەوە كە لە یانەی چێڵسی پێكەوە یاریان كردوە، هازارد سەبارەت بە كۆستا وتی: دیگۆ كۆستا ئەو كەسەیە دەمەوێت بەرامبەری بوەستمەوە، چونكە پێشتر ئەو هاوڕێم بوەو پێكەوە یاریمان كردوە.