کوردستان

دەستگیرکردنی باندێکی مەترسیدار لە هەولێر ڕاگەیەندرا

12/06/2019

چاودێر

 

بەڕێوەبەرایەتیی پۆلیسی پارێزگای هەولێر دەستگیرکردنی باندێکی مەترسیدار و هاوکات دەستگیرکردنی ئەو کەسەشی ڕاگەیاند کە لەسەر پێکدادانێکی هاتووچۆ کەسێکی تری کوشتووە.


لیوا عەبدولخالق تەڵعەت، بەڕێوەبەری پۆلیسی هەولێر لە كۆنفرانسێكی ڕۆژنامەوانیدا ڕایگەیاند: دوێنێ سێشەممە لە فلكەی باز لە كاتی ڕووداوێكی هاتوچۆدا هاووڵاتییەك كەسێكی كوشت، درەنگانی شەوی ڕابردوو ڕادەستی هێزە ئەمنیەكان كراوە و ئێستاش بە گوێرەی‌ ماددەی 406 لە یاسای سزادانی عێراقی دەستگیر كراوە.

 

بەڕێوەبەری پۆلیسی هەولێر ئەوەشی ئاشکرا کرد دوو کەسی دیکە دەستگیر کراون کە بە ناوی ئاسایشەوە خۆیان بە خەڵک ناساندووە و ڕێگرییان لە خەڵک کردووە، لەگەڵ دەستگیرکردنیشیان دەست بەسەر ژمارەیەک چەک و تابلۆی ئۆتۆمبێلی ساختە و مۆبایلدا گیراوە.