هۆشداری دەدرێـتە مەكتەبی سیاسیی یەكێتی
هاوكات لەگەڵ پڕكردنەوەی پۆست و بەركەوتەكانی یەكێتی لە كابینەی نۆیەمدا، هۆشداری و پەیام دەدرێتە مەكتەبی سیاسیی یەكێتی، كە لەسەر بنەمای جوگرافی و شایستەیی پۆستەكان پڕبكاتەوە، نەك لەسەر بنەمای تەكەتول و باڵەكان.
لەوبارەیەوە، عارف قوربانی نوسەر و رۆژنامەنوس لە پەیجی تایبەتی خۆی لە فەیسبوك، پەیامێكی بۆ مەكتەبی سیاسی نوسیوەو تێیدا داوادەكات پشك و پۆستەكانی یەكێتی لەنێو باڵ و تەكەتولەكان دابەش مەكەن، لەسەر بنەمای شارەكان پڕیان بكەنەوە.
لایخۆشیەوە مامۆستا بورهان محەمەد فەرەج، كادیری پێشكەوتوی یەكێتی و پەرلەمانتاری پێشوی عێراق، پەیامێكی بۆ مەكتەبی سیاسی نوسیوەو تێیدا داوادەكات، پۆستەكان بەپێی چەند راپرسیەكی نهێنی لەناو خەڵك و مەڵبەندەكاندا نمرەی بۆ دابنرێت.
دەقی نوسینەكەی عارف قوربانی:
بۆ بەڕێز مەكتەبی سیاسی ی،ن،ك
تكایە پشك و پۆستەكانی یەكێتی لەنێو باڵ و تەكەتولەكان دابەش مەكەن، لەسەر بنەمای شارەكان پڕیان بكەنەوە.
یەكێتی 10 وەزیر و 2 پۆستی باڵا و چەند بریكارێكی وەزیری بەركەوتووە، بەشی ئەوە دەكات هەموو ناوچە جیاجیاكانی كوردستان بەشیان هەبێ لە پڕكردنەوەیان.
وا باش بوو ئەو سێ پۆستە باڵایەی سەرۆكی پەرلەمان و جێگری سەرۆكی هەرێم و جێگری سەرۆكی حكومەت بە یەكێتییەكانی سلێمانی و كەركوك و هەولێر پڕ بكرانایەتەوە، بەڵام هەرسێكی دراوە بە سلێمانی.
بۆ ئەوەی پۆستەكانی تریش بەو شێوە نادادپەروەرانەیە دابەش نەكرێت پێشنیاز دەكەم بڕیار بدەن پشكی پارێزگاكان دیار بكرێت و لەسەر ئەو بنەمایە كاندیدیان بۆ دیاری بكرێ.
سێ وەزارەت و بریكاری وەزیرێ بۆ هەولێر
وەزیری پلاندانان ، سەرۆكی دەزگای ئاسایش كە پلەی وەزیرە، سەرۆكی دەستەی مین كە پلەی وەزیرە، لەگەڵ جێگری وەزارەتی سامانە سر،وشتیەكان بدرێن بە هەولێر.
وەزیری هەماهەنگی نێوان هەرێم و بەغدا و سەرۆكی دەستەی ناوچە كوردستانیەكان كە پلەی وەزیرە لەگەڵ جێگری فەرمانگەی پەیوەندیەكان بدرێن بە كەركوك.
وەزیری رۆشنبیری و سەرۆكی دەستەیەك بدرێ بە هەڵەبجە.
وەزیری كشتوكاڵ بدرێ بە ئیدارەی گەرمیان
وەزیری خوێندنی باڵا بدرێ بە ئیدارەی ڕاپەڕین.
وەزیری پێشمەرگەو جێگری سەرۆكی حكومەت و جێگری وەزیری ناوخۆ بدرێن بە سلێمانی. كە جێگری سەرۆكی هەرێمیشیان هەیە.
بادینان لەبەر ئەوەی چەند سەفیرێك لە پشكی كورد لە بەغدا بەوان دراوە، دەكرێ ل هەرێم بریكاری وەزیرو دەستەیەكیان بدرێتێ.
بەم شێوەیە هاوسەنگی لەناو یەكێتی دەپارێزن و هەموو ناوچەیەكیش هەست دەكات بەشدارە لە حكومەت.
دەقی نوسینەكەی مامۆستا بورهان:
بەڕێز (م،س ) یەكێتی نیشتمانی كوردستان
سڵاوێكی ھەڤاڵانە:
پێشنیاز :
بۆیەكلایكردنەوەی ئەو پۆستانەی بەربەشی گەرمیان دەكەوێت و پۆستی سەرپەرشتیاری ئیدارەی گەرمیانیشەوە،چەند رێگایەك پیادەبكرێت وبەم شێوەی لای خوارەوە تەتبیق بكرێت :
١- راپرسیەكی نھێنی لەناوخەڵك لەسنووری گەرمیان بكرێت ،بۆ ھەڵسەنگاندنی كەسایەتی كاندیدەكان لەرووی ناو و ناوبانگ وئەھلێتیان لەسنووری (كەلار-كفری خانەقین)بەناحیەكانیشیانەوە. ئەو راپرسیە پلەی لەسەربێت بۆ نموونە ٣٠ ٪پلە.
٢-ھەڵبژاردنێك لەئەنجوومەنی مەڵبەند بەنھێنی ئەنجام بدرێت و٣٠ ٪پلەی لەسەر بێت بۆ ھەڵسەنگاندنی كاندید .
٣- لیژنەیەكی پسپۆر و شارەزا لەمامۆستایانی زانكۆ كاندیدەكان ھەڵسەنگێنن بۆ ئاستە جیاوازەكان،بۆنموونە ئاستی سیاسی ئیداری ،بروانامە، رۆشنبیری،ئەزموون ھەتا د........ئەمەش ٤٠٪ پلەی لەسەربێت
پێم وایە ئەم شێوازە باشترین رێگەیە بۆ ئەوەی ھەریەك ھەقی خۆی پێبدرێت.
لەگەڵ رێزی زۆرم
ھەڤاڵتان
م برھان محمد فرج