ئەو كەسانەی نیازی هاوردەكردنی تلیاكیان بۆ هەرێم هەبوو دەستگیركران
چاودێر
هێزەكانی ئاسایشی سەر بەبەڕێوەبەرایەتی ئاسایشی ڕاپەڕین لەسنوری قەزای پشدەر، لەدوو چالاكی جیاوازدا، سێ كەسیان دەستگیركرد، كە بڕێكی زۆر ماددەی هۆشبەریان پێ بووە .
محەمەد فازڵ، وتەبێژی بەڕێوەبەرایەتی ئاسایشی ڕاپەڕین، رایگەیاند: لەئەنجامی هەوڵ و گەڕانە بەردەوامەكانیان بۆ ڕووبەڕووبونەوەی دیاردەی بازرگانی و بەكارهێنانی ماددەی هۆشبەر، هێزەكانی سەر بەرێوبەرایەتی ئاسایشی ڕاپەڕین لەیاریدەدەرێتی ئاسایشی قەڵادزێ بە هاوبەشی بنكەی ئاسایشی هێرۆ توانیان ( دوو ) تۆمەتبار دەستگیر بكەن.
وتیشی " ئەو دوو تۆمەتبارە، بڕی پێنج كیلۆگرام ماددەی هۆشبەریان پێ بووە، لەجۆری ( كریستاڵ ) كە ویستویانە لەوڵاتی ئێرانەوە بیهێنن بۆ هەرێمی كوردستان".
ئاماژەی بەوەشكرد: لەچالاكیەكی دیكەدا هێزەكانی بەشی ماددە هۆشبەرەكانی بەڕێوەبەرایەتی ئاسایشی ڕاپەڕین و بە هاوكاری یاریدەدەرێتی ئاسایشی قەڵادزێ، كەسێكیان دەستگیركرد بڕی (300) گرام ماددەی هۆشبەری لەجۆرەكانی ( هیرۆین و كریستاڵ )ی پێ بووە، لەئێستادا بەپێی ماددەی (14)ی هۆشبەر لەیاسای سزادانی عێراقی، پەڕاوی لێكۆڵینەوەیان بۆ كراوەتەوە و لێكۆڵینەوە بەردەوامە.