داوا دەكرێت عادل عەبدولمەهدی لە پارلەمانی عیراق رونكردنەوە بدات
عێراق 13/01/2019
بابان – ئاژانسەكان:
پارلەمانتارێكی عیراق لەسەر لیستی ئیئتیلافی دەوڵەتی یاسا، داوا لە عادل
عەبدولمەهدی فەرماندەی گشتی هێزە چەكدارەكانی عیراق دەكات بچێتە پەرلەمان و روونكردنەوە
لەسەر ژمارەی هێزەكانی ئەمریكا و ئەركەكانیان لە عیراقدا بدات.
عالیە نوسەییف، لەلێدوانێكی رۆژنامەوانیدا
دەڵێت: ناڕونییەك لەسەر ژمارەی هێزەكانی ئەمەریكا و بنكەكانیان و ئەركەكانیان لە عیراقدا
هەیەو هیچ رۆشنییەك لەلایەن فەرماندەی گشتی هێزە چەكدارەكانی عیراقەوە دەربارەی ئەم
بابەتە بونی نییە.
نوسەییف دەشڵێت: كۆمەڵێك نوسراو و داواكاریم
دەربارەی هەمان بابەت ئاراستەی كابینەی حكومەتی پێشوو كردوە، بەڵام بەرپرسان هیچ وەڵامێكیان
نەبوە.
هەر سەبارەت بەو پرسە، ئەو پەرلەمانتارە
داوا لە عادل عەبدولمەهدی، بەسیفەتی سەرۆكوەزیران و سەرۆكی هێزە چەكدارەكانی عیراق
دەكات، كە بچێتە پەرلەمان و روونكردنەوەی پیویست بدات، بەپێویستیشی دەزانێت لەوبارەیەوە
لێكۆڵینەوە بكرێت بەتایبەتی لەسەر رێكەوتننامەی ستراتیژی نێوان واشنتۆن و بەغدا، كە
تێیدا هاتووە ئەركی هێزە بیانیەكان تەنها راهێنان و راوێژكارییە.
سەرچاوە: سایتی (صوت العراق)